Di-Dar音樂劇場丨葛民輝跳舞多過軟硬兼打側手翻感謝團隊照顧周到有望再合作自爆臉盲唔認得邵美君以為茶水阿嬸

影視圈

更新時間：15:45 2024-09-10
發佈時間：15:45 2024-09-10

梁祖堯、葛民輝（阿葛）、邵美君及岑珈其等昨晚（9日）在演藝學院為其主演的舞台劇《Di-Dar音樂劇場》作尾場演出，眾人在Encore又跳又唱《死氣洋洋》及《火熱動感LaLaLa》令全埸high爆，而阿葛更在台上打側手翻，影大合照的時候又跳落台，勁活潑。

對於第二次做舞台劇，阿葛表示很開心，因導演與監製比他更喪之餘，演員也比他更癲，所以玩得非常開心：「上次同林海峰做成場悶雞雞咁，我今次出場都唔夠一半，幾舒服。（你跳得多過軟硬！）因為中間唞得多！不過呢度都對我好好，知道我搭着咗拉闊，所以阿祖（梁祖堯）安排我做校長，之後就做半司儀，令我唔使咁大壓力。」

阿葛指劇團在每一方面都照顧得他很周到，大家也特意為他早點綵排，讓他先熟習，之後就安心去排拉闊。阿葛又自爆自己是臉盲，雖然以前曾看過兩套邵美君的舞台劇，但見面仍然不知道她是誰：「今次認得，但下一次又唔認得，當新人咁好抵玩，上次合作《填詞L》佢做我太太，但我仲以為呢個阿嬸係茶水，到導演同我講呢個係邵美君，我話唔係咁嘅樣，（佢今次得唔得？）梗係得，你見我喺校長室幾狂野就知。」

而在劇中要坐阿葛大脾的邵美君就笑指自己當時紥馬，並非真坐，阿葛坦言與她合作很開心，因對方就好像褓母及媽媽一樣照顧他，又似導盲犬帶着他周圍走，所以很安心，提到他剛才在台上打側手翻，阿葛就指事前有練過。問到會否打算再演舞台劇？阿葛表示最主要是看團隊，若似風車草般那麼愛錫自己的話就可以，因可以無後顧之憂地做。