亨仔Jason近女色好驚青：驚俾佢哋Fans追住打咋 ROVER Lolly Talk首合演音樂劇多𤓓事丨獨家
發佈時間：07:00 2024-09-21
ROVER跟Lolly Talk的阿妹（黃敏蕎）、Elka（鄭芷淇）和Sinnie（吳倩怡），以及Eelyn（陳伊霖）首合演音樂劇《重拾：10分鐘》。各人輪住講難處，Kim（卓金樂）跟Eelyn自認跳舞屎，阿妹、亨仔（陳鎮亨）及Jason（雷濠權）表示最難拿捏感情戲；阿妹更笑住投訴亨仔唔敢正眼望住佢；Jason亦自首唔敢同Eelyn有肢體接觸，𠵱家啲Band仔真驚青。採訪：杜杜 攝影：林賓尼
Jason自《全民造星V》後，久未跳舞，「我哋係夾Band唔係男團，少接觸跳舞，雖然我同希晉跳得唔錯。」問到是否骨頭硬晒？Jason笑言：「應該Kim比較硬！」眾人即起哄笑Kim骨頭脆，又問使唔使補返啲鈣質？！非常小學雞。希晉更爆料：「佢話膝頭哥痛！」大家又指Kim是甩舞擔當，他無奈話：「跳舞真係有啲難度，郁手都好啲，郁腳郁極都郁唔到，記step好難。」Jason再補一刀，「基本上你係冇甩，因為你都冇跳，哈哈！」Kim解釋：「跳舞真係渣啲，但有盡力去跟，奈何老師覺得我彈bass好睇啲囉！」
互選甩漏之最
互選漏歌詞之最，大家直指亨仔，他就無奈解釋，「我好容易緊張，因為唱歌有演技嘅部份，呢樣嘢都拿捏咗一段時間，有時甩歌詞，因為個腦諗緊點樣加啲戲落去。」不過希晉就唔接受亨仔解釋，後者笑言：「信唔信我演出時甩畀你睇，講笑！𠵱家好好，已經梳理咗個腦，演出絕對冇問題，好有信心！」至於甩台詞之首，亨仔繼續勝出，他再解釋又是緊張累事，「緊張仔嚟講，甩嚟甩去好正常，但幾次大排練已經好順，大家甩得最多係第16場，我哋每個人都有甩。」他們解釋16場是大團圓結局，多人甩漏機率自然特別高。雖成為甩漏之王，但亨仔的執生能力亦提高咗，「排練時有個位講我太激動要抒發情緒，點知我成個跌低，即刻做掌上壓扮冇嘢，好專業堅持演出，但佢哋笑到黐咗線。」Kim和Jason稱該場戲亨仔需要踢走張櫈，「我哋仲討論緊好驚佢踢過嚟，估唔到佢跣低咗，哈哈！」
唔係怕女友嬲
阿妹和亨仔有感情戲，前者就投訴好難入戲，「一開始認識佢好怕醜，唔係好講嘢，有啲位要深情對望，佢眼神就會好閃縮，但有2個月時間排練，越嚟越熟，𠵱家冇問題，眼神冇再閃縮。」亨仔解釋並非要顧慮女友感受，「係驚俾佢啲Fans追住我嚟打咋！」他又感激阿妹主動幫手，「阿妹一開始有嘗試撩我講嘢，叫我唔好咁緊張，做就做啦，𠵱家都好咗，多咗時間相處都Friend咗好多，基本上冇乜尷尬。」至於戲份親暱程度？亨仔答得風趣：「喺7點半電視播得，所以大家應該會睇得幾開心，兒童適宜。」
驚有肢體接觸
Eelyn跟Jason演一對，事前約法三章要做「不尷尬情侶」，前者更讚後者好專業，「我哋完全唔認識對方，一開始好驚有感情戲，又怕有肢體接觸會尷尬，但埋到位，尷尬場面比想像中少好多，非常多謝呢位拍檔，畀咗我十足信心。」Jason亦最擔心肢體接觸，「我哋會攬，我唔知點就個力度，第1次同異性對戲，驚太大力攬會唔會整親佢，排咗幾場大概知點樣做好啲。」Jason亦不擔心女友詐型，「完全冇問題，我哋都係非常專業嘅演員。」除咗攬攬外，會否有更親暱戲份？眾人就大賣關子。
