鍾慧冰打擊「農場新聞」開YouTube節目爆娛圈真秘聞 輸身家重病險死諗通晒：炒股票幾乎心臟病發 丨獨家
發佈時間：07:00 2024-10-08
入行44年，68歲的鍾慧冰相識滿天下，收埋大量娛圈秘聞，為打擊一啲莫名其妙，呃流量兼冇求證的「農場新聞」，開設YouTube節目《冰姐的花樣人生》以正視聽，其中一集嘉賓王書麒講出面癱7年的真相，原來跟萬梓良及林嘉華有關。另外，冰姐人生亦非常曲折離奇，曾因雷曼事件輸過千萬身家；又曾患「血管炎」死裡逃生，財散人安樂後反而瞓得更好，甚至零物慾連麻雀都唔打：「𠵱家睇化晒，重病時買落嘅骨灰龕位，升價一倍都已原價賣返出去。」採訪：方騫平 攝影：孔子
鍾慧冰趁有氣有力及有記性開設YouTube頻道，藉住自己及嘉賓的人生經驗令網民有得著，將來「走咗」都叫有嘢可以留底：「我都會講下養生，2016年間突然患上罕見免疫系統怪病血管炎，經歷一場大病乜隱世醫生都涉獵過，亦睇過唔少醫書，大把心得可以分享。」
唔明演戲點解真打
曾面癱7年的王書麒亦曾於冰姐節目中提及患病經過，唔排除因當年拍劇時被林嘉華及萬梓良大力掌摑的後遺症，冰姐聽到好肉赤：「王書麒從拍《小時候》開始由細俾人打到大，拍劇時俾萬梓良打得最多，除14歲拍《大內群英》時被掌摑，拍《流氓大亨》時又被戲中『哥哥』萬子真打，冇受傷都好痛。」冰姐講到皺晒眉：「最慘係佢19歲時演《新紮師兄1988》俾林嘉華大巴咁摑，因為冇得借位要硬食，摑完後佢暈一暈，有啲痛，宵夜時食個麵，條麵都啜唔到上嚟，半邊面冇咗知覺，連眼都合唔埋，眼水直流…直至23年前因為免疫力低舊病復發，多年來用物理治療，藥物及做穴位耳療等多管齊下，𠵱家只係好返9成。」雖然王書麒冇怪過林嘉華及萬梓良，但冰姐忍唔住出聲：「做呢行好多時話要『嚟真』，但講明係演戲，點解要『嚟真』？好多時佢哋唔知道傷害會有幾大，到知道時後悔已太遲，好多時因為太認真，會唔覺意影響人哋一生。」
風光大葬勞民傷財
至於冰姐罹患的血管炎亦康復了9成，所以冇咁擔心：「7年前狀態差到連鈕都扣唔到，唔知自己捱唔捱得過，為自己諗定身後事，除買定骨灰龕位外，更寫埋平安紙將戶口啲錢交晒畀個女…但𠵱家梗係乜都攞返，個女咁勤力大把錢啦，畀咁多錢佢唔好，我連升價一倍嘅骨灰龕位都唔keep，用原價10幾萬賣返畀朋友。」大病一場後冰姐心態都改變咗，變成環保人士：「以前個人好執著，既憂慮死後被火燒好痛；土葬又俾蟲蛀…𠵱家乜都睇化晒，只要生前對我好，將來離世幫我開Party，大家過嚟唱下歌跳下舞就夠，之後天堂見！買名貴棺木都係勞民傷財，只係做畀在生嘅人睇，我唔需要呢啲嘢。」
零物慾戒埋打麻雀
冰姐甚至學會斷捨離，將家中少用的家電送出，例如微波爐：「其實一個人需要嘅嘢好少，生活越簡單越好，以前真係錯晒，咁用心去研究邊間銀行高息口做投資；提心吊膽炒股票，無時無刻去睇住價位上落，搞到幾乎心臟病發要call白車…諗返起都好白痴，最後咪輸身家，仲因為長期壓力太大搞到免疫系統出咗大毛病。」鍾慧冰形容財散人安樂，她將僅餘嘅積蓄做定期，手頭上再冇投資，所以乜都唔使諗，晚晚瞓得好安樂：「雖然發生咁多事，但都好感恩咁嘅年紀仲有嘢做，連男朋友都有埋。不過，免疫系統病係跟一世嘅，只能控制住發炎指數，等佢唔會攻擊身體各部份，否則會令器官衰竭，情況會好危險。𠵱家情緒要好平和，唔好畀自己咁大壓力，小心飲食及多做運動。」冰姐家陣零物慾，食素菜，告別名牌包包，連麻雀都唔打，只enjoy種花及上唱歌班。
