Gao首演雙性戀兼暗戀大20年Uncle冇難度 強尼自豪打邊爐買料達人15分鐘搞掂丨獨家
發佈時間：07:00 2024-10-14
結緣於《全民造星IV》的Gao（沈貞巧）@COLLAR及強尼（許博文），在ViuTV新劇《出租大叔》首演父女，第2次拍劇的前者要演繹雙性戀，甚至暗戀父親老友陸駿光（嗱渣），Gao好叻女唔覺太難拿捏。問到若然提供出租服務可以做啲乜，兩人都對可提供的技能非常自豪，一個是打邊爐買料達人，一個是放狗專家，香港人咁鬼忙，應該真係有得做。採訪：杜杜 攝影：朱偉彥 形象:Daniel Cheung、Natalie Lin 髮型:Ricky Lam化妝:Cathy Zhang 服裝:Sandro Paris
51歲強尼跟Gao相差20歲，事實真係生得出，所以不用衝破心理關口，「中學同學啲女都已經係律師醫生，畢業出嚟做緊嘢，所以冇呢個包袱。」劇中強尼早年離婚，Gao就跟媽咪去了美國生活多年，父女再碰面有好多誤解同衝突，他們慶幸早已認識，演對手戲有幫助。
Gao成長充滿愛
因為有強尼做爸爸，加上陸駿光、張達倫等「大叔」相助，令初任主角的Gao冇咁擔心，「有佢哋陪住我，用佢哋嘅行為show畀我睇應該要點做。」而強尼知道Gao演自己個女亦安心咗，「可以好直接同佢溝通，唔需要兜圈，出面嘅演員就要由頭開始認識，。」
Gao認為演「林瑪莎」最難是成長環境跟她有很大分別，「我不嬲見到嘅大人都好有愛，冇乜出現單親或好不負責任，成長環境都充滿愛。」而父母對她做任何事都全力支持，是跟角色的最大分別，「我讀書差啲，但係父母冇迫我要幾多分或者讀到啲乜嘢，反而好支持我做鍾意嘅嘢，由我跳舞開始，佢哋每個騷都會嚟睇，我成長環境唔算好富裕，但係好幸福，同『林瑪莎』超級唔同，佢即使跟咗媽咪去外國讀書好有錢，其實唔幸福。」
強尼好崇拜老竇
講到角色是雙性戀，跟李敏有段情，亦會暗戀老竇好兄弟、大叔級的陸駿光，Gao就演得好Free，「『林瑪莎』唔會太care性別上嘅嘢，會比較着重愛嘅感覺。因為細個時有感被遺棄，青春期好孤單亦好渴望有人愛佢，當李敏個角色出現，佢冇care佢係男定女，好想得到愛，好想要個屋企。」強尼搞笑搭嘴，「先到先得，哈哈！」至於要暗戀職業詩人的大叔陸駿光，強尼一聽即狂笑，「哈哈！sorry我唔應該咁笑！佢係詩人。」Gao跟陸駿光初合作都有點擔心，但接觸後已放下心頭大石，「『嗱渣』本人好大差別，佢係好搞笑，第1日講嘢佢就好friendly，好在暗戀嗰啲戲，唔算好明顯，唔會有好尷尬或者唔知點算好嘅情況出現。」
強尼演的「林木森」跟個女關係差之餘，跟高翰文演的老竇亦是火星撞地球，「佢覺得老竇有嘢欠咗佢，到有毛有翼仲唔反咬你一口，加上Gao又憎我，但阿爺錫佢嘛！」不過現實中他跟爸爸關係就非常好，「阿爸阿媽好後生結婚，老竇22歲左右就生我，佢係好溫和嘅人，我哋冇嘢需要拗，由細到大都覺得老竇好權威，佢講我就會聽，細個已當佢係role model，佢會踢波又有好多friend，我大個都要咁，結果我真係好多朋友，鍾意踢波。」
最強買餸及放狗
《出租大叔》講述一班大叔提供不同的出租服務，強尼覺得可以出租買餸服務，因為買餸可以長知識，「平時你淨係食之嘛！去到海鮮檔，蝦有咁多種㗎？！菜又有咁多款，所以我好鍾意去街巿。」至愛打邊爐的他，必親自到元朗街巿入貨，「屋企打邊爐打得好密，我堅持要自己買餸，其實我工人已經好好，但係我都鍾意自己揀。」而每次必入手本地手切肥牛，「基本上每次去係機器式去嗰幾檔，一開始擺低錢畀牛肉檔轉頭去攞，跟住係海鮮，15分鐘就買完打邊爐嘅餸。」強尼笑言打邊爐冇手切肥牛好失色，「試過幾次牛肉檔冇開，買啲雪藏嘅會唔開心。」
Gao除可出租擅長的教跳舞外，還可以幫人放狗和湊仔，「我鍾意同小朋友、小動物相處。」強尼亦見證過她趁拍劇空檔返屋企放狗，「佢好勁㗎！朝早06拍到3點，跟住嗰場冇佢份，佢飛返去放完狗再返嚟。」Gao認為放狗好減壓，「見到佢笑，我會更加開心，等我放工到時未必想陪佢行，下午行天氣好就更開心。」而湊BB一樣難不到她，「最細幫人湊過2、3歲嘅BB，幫佢換尿片、陪佢玩，同埋教跳舞時有教過4至11歲小朋友。」不過1歲以下她就未必夠膽湊，「我冇湊過，都有啲驚，軟淋淋咁。」
