50歲吳文忻谷底重生：唔想攤喺屋企等死 乳癌復發人生觀大變搵返自我價值丨獨家
發佈時間：07:00 2024-10-22
1998年港姐季軍吳文忻（現名吳忻熹）近月自揭兩年前罹患乳癌，手術後曾康復，惜今年復發更去到第三期，癌細胞擴散至淋巴，上月底要接受另類的免疫細胞療法。剛「入五」的吳文忻冇垂頭喪氣，反而感恩上天畀第2次機會，讓她認真面對人生，修補心靈上缺失，她亦感謝相識逾40年的舊同學彭秀慧鼓勵，開心面對每一日的她坦言，「呢刻會多謝呢個cancer。」採訪：方騫平 攝影：朱偉彥 場地：露火生活
剛踏入50歲的吳文忻享受馬拉松式賀壽，她坦言：「自從公開患病後大家都珍惜見面，今年多咗好多朋友同我慶祝，好耐冇見嘅朋友都主動聯絡，所以好開心及正能量。」吳文忻還報喜，透露輸入了222億個免疫細胞去「打仗」後，報告顯示好多癌細胞已被清除，亦冇再周圍轉移，稍後會做正電子斷層掃描，若癌細胞冇再變成良性腫瘤，就可以選擇做切除腫瘤手術。
彭秀慧鼓勵寫日記
吳文忻憶述病發經過，跟好多病友一樣有過掙扎期：「2022年去美容院通淋巴發現乳腺有粒硬物，經醫生抽針化驗後好快證實患上左胸原位癌，當下真係接受唔到，腦海一片空白，醫生講乜都唔入耳，更加接受唔到要切晒個乳房，不停反問『我咁健康，平日注意飲食又有做運動點解係我？點算呀？』」吳文忻坦言該段日子好抑鬱，連揸車都會喊，「最後決定唔通知父母、兩女及家傭，靜雞雞住院3日切咗腫瘤就算，直至去年開始feel到舊患有啲變大，到今年4月變得更大及更硬，仲有啲發炎狀況真係避無可避，醫生證實Cancer已轉移到淋巴要做化療。」化療副作用有幾大相信好多人都知，吳文忻亦辛苦到有一種攤喺屋企等死的感覺，「體重跌到得返99磅，好彩得到相識40多年嘅小學同學彭秀慧不斷鼓勵我，話『唔使咁強悍，可以軟弱啲！』更建議我寫抗癌日記減壓，又可以share心得。」自此令她搵返生存價值，之後發生的事情亦好神奇，她突然覺得成個世界唔同晒，「由原先沉溺谷底到高調發放正能量，好似由一個極端走到另一個極端，原來好多時只係一念之差，只要我肯行前一步，𠵱家外間嘅支持及祝福絕對幫到手。」
網上節目助同路人
吳文忻更多謝這個Cancer令她完全改變心態，「係個天畀第2次機會及時間令我認真面對人生，深思熟慮回顧過去，點解會患病？唔可以再好似以前咁當冇事發生過，就算切除腫瘤都係治標不治本。」她明白以往從來冇照顧自己的心靈，又長期浸淫在家庭的舒適圈，多年來只匿喺屋企湊女，其實內心有好多陰暗面冇處理及認真面對。「好記得10年前上人生課程時，人生導師認為我好有感染力可以做得更多，能力唔限於只係照顧家庭，我就好似一隻沉睡山窿嘅老虎一樣，就算有好多諗頭，遺憾冇付諸實行，諗咗當做咗，變相做人冇乜生存價值及滿足感。」「重生」的吳文忻經常笑，更打算感染更多同路人，未來有好多計劃要實行：「第一個project就係眾籌做網上節目，會邀請癌病康復藝人訪問發放正能量，然後出書及做慈善攝影展。」至於重返幕前，吳文忻表示有機會一定會試。
