黎瑞恩離婚10年罕談前夫 陳友忽略太太致患癌努力補償做好老公丨獨家
發佈時間：07:00 2024-10-30
陳友太太Pauline於2013年突然患上罕有骨癌差啲冇命，令一直忽略太太的陳友反省，自此不斷做見證會，發覺變成音樂劇唱出嚟可以分享畀更多人，《娛樂圈夫人》就此誕生，更搵嚟黎瑞恩飾演陳太一角。離婚10年的小恩子坦言為老公可以無限付出，就算捐器官都冇問題，更有感而發表示男人只要肯改變，女人一定會原諒。採訪：杜杜 攝影：羅安強 髮型:Taylor Wan@Leonardo 3 Hair Corner(黎瑞恩) 化妝:Seven Lai(黎瑞恩) 場地:The Fullerton Ocean Park Hotel Hong Kong
72歲陳友自責一直忽略73歲太太Pauline，爆當年溫拿經理人要求不公開已婚，「話最好就唔好啦！會見到佢喎，不如佢今晚早啲返屋企瞓啦！嗰個年代係咁，畀人知都唔好提。」他還鬼馬即唱劇中歌曲交代，「你要識吓撈，你存在成個行業難撈，哈哈！」小恩子亦好明白，「以前娛樂圈唔可以透露你有男朋友或者老婆，比較秘密，會有偶包，𠵱家唔同晒，大家會接受。」
小恩子似梅艷芳夠義氣
陳友之後搞移民做太空人，太太獨力在加拿大湊兒子陳良韋 ，之後他再到內地發展，他坦認多年來太太有老公等如冇老公，「搵錢係男人最好嘅藉口，其實搵錢搵得其所，夠就好啦，有時係想要唔係需要。」小恩子認為男人能全力發展事業，背後的賢內助功不可沒，「男人要賺錢，女人幫唔到手喺後面打理晒啲嘢，其實都會好煩，乜嘢都要問咁點呀？有個妥貼嘅女人喺身邊係好幸福。」
陳友越認識小恩子，越覺得她是絕世好老婆，「佢絕對係好好嘅女人，真係相夫教子，唔係有咁多女人做到㗎！」小恩子笑着多謝陳友，「多謝晒幫我賣廣告！」陳友繼續狂讚，「佢講畀我聽啲經歷，點安排雪茄、翅、鮑魚嗰啲妥妥善善，真係做得好好，佢係就算另一半眼角膜有事，自己都會捐出畀對方嗰種女人嚟。」小恩子覺得為老公，真係可以乜都肯，「如果我老公需要捐乜嘢，個腎、肝，我都一定會捐，做老婆應該係咁！」陳友認為小恩子夠義氣，不單對老公好，對朋友一樣正，令他想起離世好友梅艷芳，「佢有阿梅嗰種feel，為朋友多過為自己，大姐咁出嚟照顧晒身邊嘅人。」
太太患骨癌企都企唔到
2013年Pauline患上罕有骨癌，企都企唔到，陳友才識得後悔，「嗰時佢真係好痛，佢啲骨碎晒要搵機吊起先郁到，個脊椎都差啲座咗落嚟，啲神經壓住晒，醫生話畀我聽，佢可能得返幾個月命。」當時陳友用盡方法救愛妻不果，並非教徒的他唯有試埋祈禱，更承諾若太太好返會將經歷分享畀更多人，結果翌日醫生指有方法可醫到太太，太太之後亦奇蹟好返，於是他不停周圍做見證會分享，更促成這個音樂劇誕生，「成日喺教堂講見證，不如改成音樂劇唱出嚟，所以一定要搵小恩子幫手，係佢先唱得到咁好。」
小恩子出道時，陳友已在內地發展，處於不同界別所以並不認識，但小恩子收到前輩邀請好榮幸，再看音樂劇故事大綱已很喜歡，「我覺得唔單止講娛樂圈，所有已婚女士，睇咗都會好有感觸。」故事跟她某些經歷很相似，「有好多部份都似我，例如先生成日唔喺香港去咗做嘢，同先生又好耐都冇見，好多嘢要自己一個去管理，小朋友或者生活上嘅嘢，同埋我都有唔舒服，但冇咁大鑊啦！」
陳友感恩太太完全康復
陳友感恩Pauline已康復，還愛上跳拉丁舞，而他為了補償太太，近10年都陪在身邊做好老公，「依家成日煮飯囉！哈哈！其實係補唔返，過去就過去咗，都係盡量做㗎啫，點解要演呢個劇？原來思想上轉變，可以改變一生，希望呢個劇畀到啟發大家。」小恩子認為男人肯改變，作為太太一定會原諒，「如果個男人咁樣對返我好，之前嗰啲都唔記得㗎嘞！」她又爆陳友夫妻相處勁sweet，「上次同佢哋食飯，我話畀佢太太聽我演佢，佢好開心，佢望住陳友哥哥係好崇拜嘅眼神，好傾慕咁㗎！」
