Joey公開梅啟明虐兒證據再報警指控重婚 梅媽養成兒子酗酒習慣發酒癲又家暴丨獨家
發佈時間：07:00 2024-10-31
因工傷官司敗訴後欠訟費未付，遭前僱主入稟高院申請破產的梅啟明，早前宣布跟泰籍女友查頌美（May May）結婚，慘被離婚的馬籍老婆Joey嬲到爆炸，向《頭條日報》提供報案紙，指控有酗酒習慣的梅啟明家暴及虐兒，有關證據及男方宣布重婚片段已向大馬警方報案。Joey提醒曾於大馬宣誓結婚的梅啟明：「港馬兩地重婚屬刑事，最高刑罰要監禁7年。」另外，Joey又公開梅啟明發酒癲事件，件件都非常乞人憎。採訪：曾盻堅
56歲Joey本是梅艷芳海外鐵粉，當年因為追星「好幸運」認識到梅家兩母子，更被梅啟明瘋狂追求，Joey說：「當年我唔知咁多嘢，講到美國返嚟有幾慘，我只係聽佢嘅版本咪俾佢呃到囉，佢口甜舌滑，除咗May May外，仲有好多爛桃花，包括另一個泰妹及交往多年嘅富貴女人。」
飲醉酒推兒子落地
Joey跟梅啟明結婚12年，兩母子受盡對方冷暴力，唔係發酒癲就為咗泰妹失理智，她更爆梅媽寵子，以往一箱一箱紅酒買返屋企，每晚開兩枝「餸飯」，個仔飲到酩酊大醉，養成酗酒習慣：「一家3口住跑馬地時，Richard(兒子)只得5歲，梅啟明飲到醉醺醺經常踢門大叫『開門』嘈住隔離，又話要生又話要死。」Joey唔畀梅啟明繼續飲更遭梅媽阻止，甚至幫口，「有乜理由唔畀佢飲酒㗎？唔飲酒似咩男人呀？」
2022年1月1日，梅啟明涉虐兒而報警，Joey說，「當晚佢醉晒上嚟我哋住嘅酒店，送壽司畀個仔食，行去廁所時跌咗封信落地，我叫阿仔嗱嗱聲執嚟睇，原來係泰妹嘅精神科覆診信，佢為搶返封信推個仔落地，撞傷咗阿仔隻手，我為咗保護個仔就報警，因為唔想元旦坐救護車去醫院(同阿仔驗傷)，最後備案了事。」事後警方將個案轉介社工跟進，但梅啟明唔合作，社工冇符只能不了了之。
呃母子回港睇樓盤
同年2月10日，Joey再向警方求助：「留港期間，每晚同阿仔去梅媽租住嘅城市花園，要梅啟明返嚟煮飯畀個仔食，佢飲咗兩杯就手持菜刀喺廚房大大力斬嘢，啪啪聲連家傭都嚇親，我同阿仔驚到匿喺房，後來報完警就開門衝落街，梅啟明拎住紅酒樽跑住尾隨，好彩警方及時到場將我哋分開，警員見冇損傷就收隊。」Joey為保護母子，返回大馬後即向當地警局備案。
另外，Joey又爆梅啟明發酒癲乞人憎事件，試過大力拍打兩母子的酒店房門，更大聲話：「我要陪個仔多啲，我好錫個仔。」又試過唔開門就發癲打爛門鎖同酒店啲嘢，「有啲賠償了事有啲報咗警，酒店都有晒紀錄。」長期受到精神虐待的Joey更被恐嚇，稱梅啟明不時跟她說，唔好搞泰妹，「唔好踩親佢條尾，佢真係癲㗎！」梅啟明又試過扮改過，但被篤爆速逃，「去年8月，佢話租咗跑馬地一個唐樓單位，叫我哋返去睇租盤，到時一家3口一齊住，又安排個仔留港升學，點知去到發現係白撞，地產經紀都唔識佢，梅啟明被踢爆後發晒癲，一枝箭咁衝落街再衝上電車，阿仔追住佢幾乎被車撞，可能佢怕我尾隨知佢住邊。之後就玩失聯，就算阿仔傷心到發高燒都冇理。」Joey狂鬧梅啟明係『X街中X街』，家用又唔畀走去玩女人，糟質到個仔病。
大馬重婚監禁7年
Joey強調只係想個「X街」負返老竇責任：「佢仲夠膽同個仔講『爸爸梗係唔係玩女人啦，咪聽個『癲婆』講，𠵱家爸爸拍緊啲嘢』真係黐線。佢搞到阿仔左右為難，知老竇做錯又唔想媽媽追究，屈咗兩年猛話心口痛、氣促，梅啟明兩母子真係極品。」自宣布同泰妹結婚後，Joey曾多次致電梅啟明，但都聯絡不上，故她只能透過《星島頭條》對梅啟明講：「喺大馬、香港重婚屬刑事，好大罪，最高刑罰要監禁7年，你要記得曾喺大馬宣誓，打鑼打鼓話要結婚，口噏噏當秘笈呀？𠵱家大馬份份報章都有大肆報道，大馬政府會保護人民，唔會放過你。」最後Joey向梅啟明「贈興」：「May May陀衰家喎，呢頭高調話再婚，嗰頭梅媽就被破產。」
