周吉佩放唔低對張繼聰心結：做咗蠢事 開「第三人生」個唱談半生撞板事丨獨家
發佈時間：07:00 2024-11-14
年半前贏得《中年好聲音1》冠軍的周吉佩（吉吉）依然爆紅，挾住人氣月底於麥花臣球場舉行「第三人生」處男個唱。吉吉回望兩次出道做歌手曾撞過不少板，自爆初出茅廬時對不住張繼聰，令他難堪，回想起還耿耿於懷，自責說：「我真係好蠢！」幸而經歷及智慧累積教他沉穩地重返「第三人生」舞台，即使最近被街坊抨擊「冇人識」，吉吉都能從容面對，坦言多謝阿Bob(林盛斌) 的提點。 採訪：方騫平 攝影：朱偉彥
38歲周吉佩早於2007年奪得有線歌唱比賽亞軍入行，但歌手夢不夠一年就玩完；2015年他再以樂隊sp’ACE隊長兼主音出道，後來因理念不同而散Band；直至年半前參加《中音》封王後，有機會出單曲及開個唱：「好彩個唱反應好好，門票喺一日間售罄，少咗票房壓力。」個唱中吉吉除會唱自己及sp’ACE嘅歌外，仲會選唱一些陪住成長的好歌，甚至入行前做商場駐場樂隊常唱的國語歌，包括五月天《第一天》及光良的《童話》等。
年少氣盛提出散Band
人到中年的吉吉展開「第三人生」，回望半生，都令他有得著，尤其「第一人生」悲喜交集的學習期：「當年歌星夢好快被打沉，2010年轉行做媒體，公餘時間做樂隊出音樂。」不過，吉吉最深刻的，反而是曾經對張繼聰做了件傻事：「轉做媒體時只係得22歲，冇乜人生經驗唔懂得同人溝通，最記得嗰次被委派做張繼聰專訪，我以為自己好有趣，劈頭就介紹係『謝安琪老公張繼聰』，期間更直接引用網民評語『廢柴老公』去追問佢，雖然佢好Nice冇黑面，但事後我就畀上司怪責冇禮貌，呢件事至今依然耿耿於懷。後來聽到森美大哥傳授做人訪嘅心得，最忌係冇禮貌令嘉賓難堪，所以覺得自己真係好蠢！」放唔低心結的吉吉曾經在一個電台節目中提過，及後阿聰反過來安慰他，傳訊息話：「件事都過去咗啦，唔記得喇。」至於「第二人生」撞板事件，就係跟樂隊成員意見分歧鬧到火紅火綠，為了啖氣即使隊Band漸有起色都堅持唔玩：「當年視sp’ACE係人生最後嘅演出機會，突然間冇咗變得好抑鬱，花咗好多時間釋懷，𠵱家睇返件事覺得係好結果，至少唔係咁樣，就唔會有機會展開『第三人生』，而且學會待人處事變得更成熟。」
唔理抨擊做好自己
踏進「第三人生」的吉吉，坦言都試過做得唔好：「《中音》後面對網民嘅負評，特別係攻擊埋我家人，我為咗保護屋企人就好嬲咁反擊，激動到連老婆都反問我『點解咁抵唔住頸？唔好咁衝動！』」對於最近他在將軍澳一個商場內舉行個唱記招，竟有將軍澳嘅街坊喺FB，以「無人識你喎」為題出po，取笑吉吉知名度唔高「冇人識」，而周吉佩在帖文留言回應：「多謝將軍澳主場呢個post，由原本我冇乜人識，𠵱家多人留意咗，Thanks so much！」獲讚高EQ的吉吉重提舊事，坦言是受到阿Bob影響：「佢教過我話『有價值先會俾人講，好似佢咁俾人攻擊完會突然多咗3個廣告，所以唔使擔心，作為藝人係要娛樂大家，就算俾人鬧當開心下。』所以呢年嚟我都係做好自己，正評亦越來越多。」另外，問到「第四人生」是否要更上一層樓，進軍紅館開個唱？吉吉自爆道：「其實早喺初入行做新人時曾寫紙飛機將紅館夢飛出去，仲低能到希望半年後可實現，真係天方夜譚，做歌手好唔容易…所以都係順其自然，做好眼前嘢。」
