77歲汪明荃首爆退休方案 ：做網紅 分享成功藝人心得 : 生活要檢點丨獨家
發佈時間：07:00 2024-11-15
77歲汪明荃(阿姐)德高望重，深受後輩愛戴，陳慧琳、容祖兒、楊千嬅、林家謙和盧瀚霆（Anson Lo）撲住去做她個唱表演嘉賓。紅足超過半世紀的阿姐分享作為成功藝人之道，除要具備個人風格及緊貼潮流不斷求變外，最重要私生活一定要檢點，尤其強調：「任性只會自食其果。」另外，打算做埋這幾年的阿姐首爆將來的退休方案，原來打算轉做網紅：「重溫舊事，就算講隻狗都有排講啦。」 採訪：方騫平 攝影：朱偉彥 服裝提供：Issey Miyake@Alphago International Limited 化裝 ：Stephen Lau @ Stephenmakeup 髪型：Eric Yu
等咗7年，汪明荃於本月23及24日舉行紅館個唱，阿姐相當期待：「fans成日睇我做大戲唔夠嘛，佢哋未必係大戲迷。」阿姐更特地搵來林家謙及黃偉文等星級團隊打造演唱會主題曲《Make my day》答謝fans多年來支持，順道孖住鍾柔美、謝安琪、Anson Lo、林奕匡共舞造勢。
年青一代讚MIRROR幾好
阿姐能融入年青人世界：「我哋梗係想有多啲年輕人啦，我同班後生都夾㗎，佢哋都受我玩。」雖然阿姐認唔到太多後生面孔，但就讚MIRROR幾好：「其實要喺男團入面突圍而出好難，要靠自己，一定要有個人風格，如果個個都係韓仔咁嘅樣及衣著，就冇辦法認得到㗎啦。」當問到阿姐，靚仔是否會望多兩眼時？她爆笑回應說：「𠵱家(做藝人)一定要靚啦，唔靚就睇《中年好聲音》…」
科技主導自己人生
對於陳志雲網台節目中提及的「阻人上位」論，阿姐強調自己不會阻住地球轉：「就算係做大騷司儀，我只係做頭及尾，畀晒機會佢哋㗎，咁樣我仲會嘆啲！每個人有自己嘅角色，𠵱家我嘅位置係輔助佢哋，每個階段要做啲適當嘅嘢，就算年紀大咗做阿媽依然有得發揮。」提到退休問題，阿姐形容應該都是做埋這幾年：「希望5年後都做得到演唱會啦，但當感覺到體力都唔得，連台詞都記唔到點做落去？連自己都接受唔到就冇謂勉強。」阿姐又首爆退休生活方案：「到時自然有嘢做啦，鍾意做就做，除咗可以做導師教人，甚至開個網台重溫舊事，是但講個獎都可以，咁多獎足夠講一年，就算講隻狗都有排講啦，好多網民鍾意睇我啲開箱片，即使生活日常，喺花園曬衫、曬袋、盂蘭節燒衣都成熱話。」被記者大讚好有諗頭的阿姐秒答：「我諗頭梗係唔差啦。」阿姐仲自爆係YouTube迷，會睇些關於政治的網台節目，亦感恩科技發達：「𠵱家可以喺社交網做宣傳，自己主導自己人生，咁樣好好呀。」
投訴老公危險駕駛
演戲超過半世紀的阿姐認為所做的事都有成績，所以沒遺憾事，反而覺得演藝人生好幸福，阿姐又分享作為成功藝人之道，除咗不能停留不斷求變外，也要保持個性及keep住好形象，謹記要做個正常人：「因為我哋嘅米飯班主係觀眾，佢哋識得分辨藝人戲裡戲外嘅『角色』，尤其大家都接受唔到嘅私生活，咁就會自食其果，所以做藝人要檢點啲，做人做戲都要做得好，只管任性做啲自己喜歡嘅事就要負返責任；反而肯幫人、愛護長者、回餽社會自然會加分。」另外，保持心境開朗、生活簡單是阿姐77歲的保養心得，她強調怕痛不做微調：「我唔介意畀人話有皺紋，覺得自然老去會好啲。」阿姐生活開心，身為老公的羅家英當然有功勞，他帶給阿姐不少生活情趣：「我哋都好錫對方，咁兩公婆對幾十年，日日夜夜嘈交唔得㗎嘛。」阿姐唯一投訴是家英哥時常「危險駕駛」：「佢好多時開車行到兩線中間，咁危險點會唔出聲？我都好驚呀！但佢會唔鍾意，咁我咪收聲囉。」
