楊茜堯首爆與「撞肩宿敵」胡定欣秘密關係 樂意拍現實版花旦惡鬥劇丨獨家
發佈時間：07:00 2024-11-22 HKT
TVB台慶劇《黑色月光》劇情越來越入肉，「Moon姐」楊茜堯兇狠、仇恨、鄙視、凌厲、失焦的復仇眼神，自然流露的奸笑令人不寒而慄，連結了婚8年的羅子溢都睇到心寒，懷疑老婆是本性演出！楊茜堯咁好戲，坦言不介意同流傳中「撞肩死敵」胡定欣上演現實版《宮心計》鬥戲。重提兩人14年前的不和傳聞，楊茜堯拆開當中謎團，還向《頭條日報》揭露一個冇人知的秘密… 採訪：方騫平 攝影：朱偉彥 髮型：Jan Chiu @ Il Colpo Pacific Place 服裝：@marella_official @marellahk 場地：都會海逸酒店
相隔6年重返娘家拍劇，楊茜堯要做台好戲，登頂視后級演技獲網民激讚。她卻說：「其實今次係我拍戲以來最多內心戲，但冇諗過個劇反應係點，拍時只係諗住角色背景好沉重，唔使用言語去交代身世，相反用表情行為表達多年來忍辱負重嘅嘢，所以每個場口有唔同嘅眼神，特別係KO仇家。」
兇狠演技令老公心寒
她指老公羅子溢見慣大場面沒被嚇親，不過就入戲到對老婆有質疑，楊茜堯爆料指：「佢竟然對我話『嘩！你好恐怖呀！其實會唔會𠵱家先係你嘅本性演出呢？你同我結咗婚咁多年，你係咪一直做緊戲扮賢妻及好媽媽？』」楊茜堯坦言，現實中每個人都有瘋狂諗法：「好似嗰場帶馬志威去天台巡查地盤戲，其實戲裡戲外都會幻想推佢落去，我同馬志威講『我置身呢個環境狀況，會諗如果我將身邊人推落去會有咩感覺呢？出邊人有乜反應？』佢都嚇一嚇反問『你堅(咁諗)㗎？』
向「宿敵」下戰書唔讓獎
對於全城睇好她接佘詩曼捧做視后，她強調個人好簡單，不會有好大的獎項爭取慾，但信心一定有：「重返娘家都會有期望，劇中有咁好嘅效果已超出咗期望中預算。」不過，她認為每個演員拍劇都會付出好多心機，堅持不讓獎：「冇理由唔投畀自己呀？所以千祈唔好留守，將呢票投返畀自己。」被指向對撼的「宿敵」胡定欣下戰書，茜堯乘機釐清兩人關係：「胡定欣從來都唔係宿敵，其實每個演員都好努力做，都有吸引嘅地方，就算係都係良性競爭。」
澄清同胡定欣無心病
提到最近翻HIT 2010年台慶中，楊茜堯疑似用肩撞兼藐爆身旁的胡定欣，之後傳足兩人不和14年，茜堯重提都形容是得啖笑：「我哋從來冇不和，只不過啲好經典嘅片段喺網上流傳咗好耐，唔講又唔會記得囉，但一講就記返起『嗰條片呀！』仲有啲GIF表情動畫，咁我又衰嘅，嗰時啲表情都要檢討吓呀。哈…但唔會改呀，啲表情係我㗎，因為我係我，就算今時今日都係會咁做，我唔會後悔做過嘅嘢，因為我冇做任何嘢，只不過當時係同子珊講緊嘢嘅動態，(事後有冇同定欣提返？) 都唔係咩嘢有乜好提呀？其實我哋大家心照，知道唔係嗰啲嘢，只不過傳聞流傳出嚟。」茜堯強調不怕會有心病，她更爆出一個秘密鐵證兩人並非仇家：「其實定欣做畀我嘅結婚人情係好誇張，好厚㗎！事實真係冇不和，冇就可以坦蕩蕩。」楊茜堯預了今年台慶頒獎禮會一齊坐，她還幽自己一默：「到時我又可以重演一次(撞肩)笑下先！」另外，網民話可以將兩人內鬥拍成一套TVB現實版《宮心計》，楊茜堯舉腳贊成：「真係開拍都有綽頭，OK幾好玩呀，劇中會有好多女人，有好多肶踭事件出現囉…我會邀請劇入面撞薇薇，好犀利嘅姊姊楊卓娜演勝利一方；反而未諗到自己做乜角色，當然都會拉埋薇薇入局，至於定欣就睇下佢個期先。」
