肥媽聞鄭梓浩不屑： 我哋眼角比較高 爆黑妹揀「中二」靚仔小鮮肉做演唱會嘉賓丨獨家
發佈時間：07:00 2024-11-29
肥媽（Maria Cordero）與黑妹（李麗霞）相隔7年，再孖住於下月舉行《媽妹笑住唱演唱會2024 Part 2》，肥媽繼上次瞞住黑妹安排扮學生妹環節，今次再有新搞作，提醒觀眾要帶紙巾和着定紙尿片，以免上下「失守」。肥媽早前做通波仔手術已漸康復，但中呻被黑妹姐監控飲食，兩人不停鬥嘴好搞笑。提到請幾位「中二生」做嘉賓，肥媽踢爆是黑妹親自揀靚仔「小鮮肉」，問到為何沒選鄭梓浩？肥媽不屑話：「佢靚仔咩？！我哋眼角比較高！」採訪：杜杜 攝影：朱偉彥
肥媽和黑妹在2017年舉行《黑．媽媽笑住唱演唱會》時，反應熱烈，肥媽說：「嗰次好笑到剪唔到片，因為一開始都係大家嘅笑聲嚟，哈哈！」當時最爆笑環節肯定是兩人以學生妹look亮相，今次會否經典重現？肥媽好肯定話：「梗係唔會啦！有新嘢！」黑妹就答得老實，「嗰件衫我哋都着唔落，哈哈！」
提觀眾着紙尿片睇騷
肥媽笑指當年怕黑妹口疏，要瞞着她攞尺碼，但現在已不用，「我買咗套衫畀佢，佢一着好啱身，我幾醒呀！」黑妹笑說：「唔知點解，佢對我身材特別眷顧，哈哈！永遠買啲衫都係fit到漏，多啲啲肉都唔得。」肥媽拆解隔空度身都咁fit之謎，「我係大佢一個size多啲，如果我着咗扣唔到鈕，佢着就啱啱好，我用我身材同你試身，仲想點呀，哈哈！」至於今次有何特別演出，肥媽就大賣關子，只提醒觀眾，「如果笑得緊要會標尿嗰啲，記得着條紙尿片。」她認為帶紙巾只能幫到笑到喊，保護力還不夠，「唔得要留有準備，上下都要Protect，哈哈！」不過兩人寫包單不論造型、歌曲和笑話都會令觀眾滿意，肥媽說：「包大家有個好開心，好美麗嘅回憶，我哋主題叫『唱好香港』，會有返嗰個感覺喺身邊。」她們強調歌曲必定是大家耳熟能詳，肥媽說：「無嗱嗱整咩新歌，我哋唔得閒搞，我哋都想大家一齊開口唱，咁先至帶返起個情懷，唔係咩叫香港情懷啫！」
逐一品評「小鮮肉」嘉賓
講到演唱會除了請來黑妹契女羅敏莊（Mimi）任嘉賓外，更搵來《中年好聲音2》的古淖文、黃劍文和譚輝智演出，肥媽就踢爆是黑妹主意，「唔係我揀，佢契女Mimi就一定啦，另外嗰幾個靚仔喎！佢好鍾意小鮮肉，佢係外貌協會嘅會長，我鍾意有鬍鬚，好似我老公好man嗰啲！」問到負面新聞多多的鄭梓浩，同屬「中二生」為何榜上無名？肥媽即露出嫌棄表情，「佢靚仔咩？！」黑妹亦不滿話：「咦！我講緊揀靚嘛！」追問她們可能有人覺得鄭梓浩靚仔呢？肥媽即不屑謂：「嗰個人一定唔係我哋兩個，我哋眼角比較高。」之後黑妹再逐一品評眼中的靚仔「小鮮肉」，「古淖文佢越嚟越有型，個樣就不嬲都靚仔；輝智就傻傻哋，最近我又見到劍文，佢好用心每場騷，所以我揀呢3個都係啱嘅。」肥媽見到黑妹個冧樣，即忍不住笑她，「你見唔見到佢對眼，不停眨眼，你有冇見過黑妹姐咁嘅樣！」黑妹講明到時只有她有機會跟「小鮮肉」合唱，肥媽都冇份，「梗係唔畀佢啦，佢都唔鍾意靚仔，等我嚟！」
黑妹苦勸肥媽要戒口
肥媽9月時自爆突在家中暈倒，要急送醫院做通波仔手術，這天見她已中氣十足，她表示康復情況理想，但向來為食的她就扭晒計望着黑妹話：「呢個皇家御用嘅監督，去到上海大閘蟹都只係畀我食兩隻。」黑妹反駁：「我畀佢食一隻咋，佢一定要食多隻！」肥媽續說：「以前冇人管我，我一次起碼食8至10隻大閘蟹，每日就燒鵝、燒鴨、咖哩嗰啲，𠵱家有好多大內總管，我個仔、工人、朋友都係啦！」黑妹踢爆肥媽仍然好為食，見到大閘蟹就會忍不住，「佢想食，要喂！喂！喂！咁嗌住佢。」肥媽無奈呻，「我睇見啲羔就想擺入口，最衰我個仔企喺前面，牛咁眼咁，佢冇講出嚟，但係叫緊我唔好郁呀！我咪好心幫人拆肉，可以聞吓啲羔都好，返去未洗手都聞吓，陰功！」不過肥媽都明白身邊人都是關心她健康，「我都知，但係有啲嘢真係唔忍得。」黑妹苦口婆心再勸，「你有兩支支架喺心臟，仲未完全康復，你再食啲油膩嘢塞住佢，就搵嚟搞！醫生講咗畀我聽，叫你唔好偷食蟹、鵝嗰啲，係西醫唔係中醫嚟。」肥媽好似小朋友一樣駁嘴，情況好搞笑，「個醫生話我叻㗎，70歲之後先至擺支架，但𠵱家都擺咗啦，過去嘅嘢唔好提。」
