劉青雲肉赤「囡囡」瞓棺材演出向導演投訴 翁子光踢爆演《爸爸》撻着真父愛丨獨家
發佈時間：07:00 2024-12-05
劉青雲在翁子光執導新作《爸爸》首度合作，飾演真人真事改編、弒母殺妹兒子的父親。青雲被故事打動首肯演出，在現場亦被戲中「家人」觸動，在拍攝現場一改作風，主動傾閒偈吹水，增強「家人」關係。翁導更踢爆青雲拍攝時，對一對仔女動了真情，因肉赤「囡囡」要瞓棺材演出，一度向導演投訴：「你唔使擺佢落去我都演到！」採訪：杜杜 攝影：朱偉彥 場地:The Mira Hong Kong
翁導以2010年「荃灣享和街弒母殺妹案」作為故事藍本，最初是受聘寫劇本，但完成後卻不捨，「我花咗好長時間求個導演，不如畀返我拍。」因案發地點跟他家只相隔一條街，對故事特別有感覺，「嗰個生活環境、階層，算係比較小巿民狀態，反而唔係咁奇案，係個家庭倫理故事，雖然係慘劇，但好日常，好大部份畫面係好輕鬆，呢個係我想做，喺電影度搵啲生活真諦。」他執導和編劇過不少慘案電影，他坦言不想再做「專業戶」，「我心理係健康，有人問我家庭係咪有咩問題？係非常之健全，正正因為咁，見到啲慘案會比較大驚小怪，會諗多啲人喺故事裹面嘅嘢，我都希望盡快擺脫呢個標籤，哈哈！」
原型「爸爸」提供資料
翁導接觸過案件中的「爸爸」，對方亦提供很多資料給他寫劇本，而為何選青雲演出？他解釋是憑直覺，而跟青雲傾談後，發覺觀點有很多共通點，不希望故事太煽情。不過青雲就笑翁導，「相信你唔係好多人揀囉，哈哈！我從來唔會諗點解導演會搵我去拍呢套戲，亦唔會去問，第1知嚟冇乜用，第2問佢未必會好原整去表達。」翁導笑指，「未必會講真話！」拍攝前翁導沒刻意安排青雲跟原型的「爸爸」見面，「佢同我哋講咗好多佢嘅故事後，已經有足夠元素去做作品，好多人問我哋有冇得到事主同意？我哋冇第1時間講電影係啟發自呢個案件，就係唔想對當事人有太多打擾。」翁導又指當事人亦知電影將上映，「同佢有好好嘅溝通，佢都祝我哋順利。」
青雲接拍電影因很喜歡劇本是非一般，「唔係啲正與邪、對與錯，或者一啲社會控訴，其實成件事冇得去搵邊個去鬧。」劇本用很少對白交代劇情，亦是吸引他的原因，「有啲嘢未必可以講到出嚟，喺我哋成長演出嘅年代，成日都講最好嘅對白就係唔好講，現實生活好多時都係咁，相信觀眾睇時會好明白，呢個人點解會變成咁，感受到佢發脾氣、唔開心、孤獨，係完全理解。」跟谷祖琳繼2009年《再生號》後再合作，並首演夫妻，青雲力讚對手，「佢係好實淨嘅演員，唔覺得佢有演過啲咩，就係嗰個人，最好演出就係咁。」
創造善良片場環境
戲中有不少家庭溫馨相處戲份，觸動到平時好似cool爆的青雲，「見到屋企人、啲仔女嘅時候，大家關係係好close，但又唔係攬頭攬頸嗰種，望住個仔，會發現又真係幾似谷祖琳喎，哈哈！大家就好似一齊生活咁。」他又指故事是悲劇，但拍攝過程並非經常浸淫在悲傷中，「我拍呢部戲幾開心𠻹！認識到咁多新演員，成隊crew我都未拍過，導演提供咗好好嘅工作環境畀大家，令大家好放鬆、好舒服、好自由去演。」翁導認為善良的片場環境是青雲一手創造，因台前幕後見到青雲難免會緊張，「呢個策略相信佢花咗好多心思，有人同我講劉青雲喺現場係唔講嘢，但今次佢對小朋友、小谷會畀好多提議，或者釋出好多善意，會同我哋傾好多閒偈，製造日常感。」
不過青雲認為真正製造「家」的感覺，反而是戲中一對小演員，「佢哋演出方法好自然好舒服，留意佢哋見到我會點，個仔最初係有少少拘謹，男仔嘛，但個女就冇乜，可能個女唔知我係邊個，哈哈！」翁導笑着話：「佢冇睇《孖仔孖心肝》（1990年TVB劇集 ）啫！但有睇《明日戰記》嘛！」青雲又認為一對「仔女」經常爆肚演出，令到家庭戲更「和睦」，「兩個小演員可以好隨意，將啲對白亂咁講，哈哈！或者改咗對白，作為一個老竇我咪由得你講囉！總之講得唔啱，咪話『咁講係咪唔係幾好呀』。」翁導又踢爆「青雲爸爸」對戲中仔女更動了真感情，「講多個小秘密，劉青雲喺片場係冇發過脾氣，只係有一次，有場戲拍殯儀畫面，小演員要擺喺棺材度，後嚟畫面我係冇用到，講劉先生瞻仰遺容，個小朋友本嚟玩咗成晚好開心，但瞓咗落棺材後起身就喊，劉生走過嚟同我講咗一句，『其實你唔使擺佢落去我都演到』，佢又唔係嬲嘅，但係對個女真係有愛，肉赤呀！佢話我時我心諗都係拍戲啫！原來佢呢個爸爸肉赤！」青雲表示當刻明白到，當事人冇辦法接受事實的心情。
相關新聞︰劉青雲《爸爸》藍本「荃灣享和街弒母殺妹案」 品學兼優15歲少年 「殺人救地球」
