桃爸忍淚談愛女猝死細節：一世都唔ok 《中音3》100強止步圓愛女遺願
發佈時間：08:00 2024-12-06
44歲樂隊Ever主音何家豪(桃爸) 拎住8歲愛女的結他遺物，海選時自彈自唱《擁抱這分鐘》，令評判肥媽及周國豐感動流淚，可惜比賽時選唱《後來》表現強差人意被foul，100強止步。不過，功成身退的桃爸表示已圓愛女遺願。提到8歲愛女突然離世的細節，桃爸坦言兩公婆一世都不能忘懷。 採訪：方騫平
何家豪其實最想唱到和囡囡有關的歌，除《抱擁這分鐘》外，還有每晚唱畀她聽的兒歌《Daddy finger》，父女最希望合唱的《Tears in heaven》，及桃桃之前比賽時唱過的《Talking to the moon》，只可惜受歌曲版權所限唱不到，然而能夠借用《中音3》平台分享到結他聲，宣洩到情感已好好，但他強調從來不是靠「賣慘」去搶分，自問不是發歌星夢，反而享受做樂器老師。
痛失愛女8個月的桃爸難忘今年4月18日的噩耗，他多次強忍淚水說：「囡囡走前一日如常返學，放學後發現佢發燒就去咗診所睇醫生，但翌日高燒唔退，診所姑娘電話中回覆『小朋友唔退燒好正常』，未幾囡囡喺屋企抽筋暈倒，不過，喺救護車抵達前已清醒，仲有意識去廁所，只係比較攰，送院過程都能保持穩定狀態，直至正常程序由急症室上到兒童病房，其中一位較機警嘅護士察覺桃桃口唇發紫有唔妥，再量度維生指數有異常，即急call醫生，好快20個醫護圍埋進行急救，當時我同老婆都呆咗唔識反應，只隱約透過床簾見到做緊心外壓，啲針筒掉滿一地，之後有醫護過嚟叫我哋為病人祈禱…等咗個幾鐘醫生宣布死訊。」眼有淚光的桃爸感恩兒童病房的醫護盡心盡力，延長病人生命一分一秒，唯一反映是急症室的處理時間及醫護的同理心有待改善，更希望診所醫生認真判斷病人病況，不要隨便話是傷風感冒，開些藥就算：「最後衛生署公布係『8歲女童因甲型流感身亡』點都好，再追究都冇意思，放過人等於放過自己。」
生育問題仍在猶疑
對於桃桃猝逝，桃爸夫婦大受打擊每日喊不停，幸得桃桃同學家長鼓勵能平復心情，桃爸直言：「其實兩公婆呢一世都唔ok，但日子都要過，唯有正面面對，𠵱家我哋搬咗去郊區住，依然保留一間房放置愛女遺物，每晚我繼續會喺佢房唱《Daddy finger》…」他又指自己年紀唔細，除心結外，不知還有沒有力氣陪伴下一個成長，所以生育問題仍在猶疑中。
