何超蓮驚賭王千金扮牛雜妹冇人信累票房 首拍電影親邀曾志偉黃宗澤傍住壯膽丨獨家
發佈時間：07:00 2024-12-14
已故賭王何鴻燊千金何超蓮最近首度主演電影《多想和你再見一面》，戲中除了跟內地男星此沙首度合作，還親自邀請曾志偉演爸爸以及黃宗澤客串，望搵熟人傍住可取經兼壯膽。對於角色「Sandy」是名平凡女孩，更要擺檔賣牛雜被外界質疑說服力，超蓮都好理解賭王千金扮牛雜妹觀眾難入信，令她對票房有一定壓力，「希望大家放低呢樣嘢，畀個機會入去睇吓。」採訪：杜杜 攝影：譚志光 髮型及化妝:Sharon Xu 場地:Yes!Culture
超蓮參與過不少內地綜藝節目，但始終沒演過戲，原來她一直有心理關口，「我唔係演戲出身，又唔專業又唔識，無端端去拍戲，驚演得唔好會拖累大家，演咗出嚟又冇觀眾想睇，又會拖累票房，唔係好敢孭呢個飛。」今次《多想》她終首肯演出，全因電影有特別背景，「呢套戲出現嘅時間點啱啱好，係慶祝澳門回歸25周年，我作為澳門人覺得好榮幸，另外就係大家姐（何超瓊）搵我，去演呢套戲。」年屆33歲的她又直言機會可一不可再，「我已經去到呢個年紀，我再唔拍就唔會拍，其實我細個到𠵱家一路都有人搵我拍戲，但係我都係一路係咁推，今次覺得呢個契機幾好。」
澳門燈塔睇煙花超靚
戲中超蓮飾演澳門生活的牛雜妹「Sandy」，她對於這角色特別有感覺，「一攞劇本覺得最特別，就係陪住我成長嘅一個澳門人，佢又係叫Sandy，就係我媽咪助手。」而她覺得「Sandy」跟自己亦有很多共通點，「佢好樂觀、好開心、好活潑，比我更加勇敢、果斷，我好鍾意呢個角色。」故事發生在澳門，她身為澳門人覺得很有親切感，更難得令她發現以往沒去過的秘境，「就係燈塔，我以前係未去過，原來喺嗰度睇澳門煙花係最靚，我以前係唔知，知道咗有呢個地方，如果下次澳門有煙花，可能會選擇去燈塔睇，唔使同人逼。」這秘境是該片導演徐欣羨提供，最搞笑她一度懷疑，「佢本身都係澳門人，就係拍《骨妹》嘅女導演，佢講燈塔我仲質疑佢，咩嚟㗎？！邊有人去嗰度睇煙花，我都未聽過，去到發現真係喎！哈哈！」
同此沙合作有安全感
首度跟男主角、內地演員此沙合作，超蓮就大讚對方很照顧她這個新丁，令她非常安心，「我第1日開工同佢講我係個小薯仔，請多多指教，同佢講我要好自然先表現到，佢就會順住我去做，好多時要跑要郁嘅戲，有可能會跌親，佢會喺隔籬扶住我，係個好有安全感嘅男對手。」至於飾演其父親的曾志偉，原來是超蓮為自己「着想」而親自邀請，「我知道佢係勁嘅，咁就一定可以帶到我入戲嘛！」不過曾生因太忙並非一口答應演出，「佢拒絕咗我2次，最尾佢頂我唔順。」不過有這個「爸爸」傍住，確實令她演出技巧有所提升，「佢教咗我好多喺鏡頭面前嘅表達，同自己就咁演戲係唔同，點樣令到鏡頭見到你，佢教識咗我好多呢啲嘢，同埋佢唔會點跟對白做，好多嘢現場會改。」她舉例「爸爸」的改動全為她這個「囡囡」着想，「好似喺花絮見到，有場我坐喺門口，佢出嚟掉垃圾嘅戲，係佢諗出嚟，原本我係入屋企，佢喺度整緊其他嘢，佢覺得畀個陰暗位我去演，等我情緒可以更飽滿，令我好快入到角色。」原來客串的黃宗澤亦由她親自邀請，「佢角色叫『周潤發』，就咁聽個名都知係個好有喜感嘅角色，好適合佢演，導演叫我問吓佢得唔得？我就膽粗粗問吓佢，佢又OK。佢都可以帶我入角色，有啲位係要搞笑，佢就自然令到我笑到癲咗。」
狂練習剪牛雜整傷手
除搵曾志偉和黃宗澤傍住壯膽，超蓮為演好角色做了很多準備，單是練習剪牛雜已花很長時間，「我𠵱家真係剪到牛雜，仲有把自己私家剪，哈哈！都整到隻手好多傷，因要好俐落咁一下剪斷，就好容易夾中自己啲肉，我係要做得夠多，對住鏡頭先剪得自然，令觀眾相信真係剪慣牛雜，唔係姐手姐腳，經驗呢啲感覺係演唔到出嚟。」電影即將上映，早前首映超蓮獲家人拉隊支持，不過她心情依然勁緊張，「我見到網上有啲聲音話，賭王千金演個牛雜妹好冇說服力，我都覺得係講得啱嘅，但係希望大家放低呢樣嘢，畀個機會入去睇吓。」她的壓力主要來自票房，「好驚冇人睇，驚票房唔知點。」有了這次經驗，她都想再繼續嘗試做演員，「我覺得好好，如果有適合劇本都會想去拍。」不過角色方面可能要小心選擇，「下次或者同自己完全相反，或者完全一致嘅角色。」
