鄭伊健歎人生最大遺憾恨重回中學時代 拍《久別重逢》教許恩怡主動打開Ian心扉丨獨家

鄭伊健跟許恩怡（Natalie） 在梁禮彥執導電影《久別重逢》首度合作，兩人年齡雖相差37年，但伊健的親切令 Natalie放心溝通，更鼓勵她主動打開Ian心扉，幫助演出。電影有提到重回人生重要時刻，梁導就想返回此片在日本拍攝時，而伊健和Natalie同樣想重返中學時代，不過伊健因當時有太多遺憾，特別想有個正規校舍跟同學開心度過。採訪：杜杜 攝影：錢文坤 髮型:John Chung@Barbieri Privata 化妝:Shuen Kong場地:FWD House 1881

梁禮彥導演構思故事時，已認定鄭伊健是男主角「蘇昇華」不二之選，「呢個故仔必需要係擅唱歌嘅人，仲要好善良嘅人先得，因要同個後生女一齊出發，稍為冇咁善良，個感覺冇咁舒服，而佢仲有份童真，呢3個條件就諗起佢，亦只有佢可以做到，佢肯應承我好開心。」伊健覺得故事有趣外，還有「私心」想接拍，「戲裏面呢個世界好有意思，仲有個原因話去日本拍，哈哈！我覺得成件事好吸引，係個挑戰。」伊健為角色專登買結他苦練，就是老婆蒙嘉慧在ViuTV《呢度住吓嗰度住吓》中平賣那支，「支結他最近賣埋畀（吳）保錡啦！」他解釋最初導演要求彈琴，後尾才轉彈結他，「但係我喺日本喎，咪即刻去買支結他， 有個課程唔知幾錢一個月，唔理學啦！就勉強應付到，琴有得遮，結他一定要拎住，一定要學唔係唔似，但係好難。」

鍾意同新生代合作

57歲伊健今次跟年輕班底合作，他覺得新鮮又好玩，「你知我不嬲將工作呢個戰場會變成遊樂場，會覺得好好玩，同埋唔同年代，導演、攝影師成個班底好年青，又可以感受吓，𠵱家導演唔會鬧人，我哋個年代導演會好大聲，𠵱家冇㗎啦！」他解釋連續兩套作品跟年輕導演合作原因，「我其實係刻意，有好多戲我係唔接，我想做啲我見到鍾意嘅嘢，譬如《深宵閃避球》、《久別重逢》，我想做啲未做過未玩過，想同新世代合作先有化學作用，如果做到或者將自己一啲嘢放低喺佢哋身上，或者佢哋可以將啲立場放咗喺我身上，嗰件事已經成功咗。」訪問時Natalie跟伊健互動好搞笑，會不時互窒，她坦言完全感受這個大前輩的優點，「第1次見佢就feel到佢嘅energy，超級溫暖，佢唔係開工變另一個人，係一模一樣，拍攝時係超級包容，演戲時好舒服。」這令她拍二人感情戲時，亦更易投入，「成個團隊一齊去日本係個聯繫，即刻覺得close咗少少，佢即刻對我好好。」伊健忍不住笑，「即刻，哈哈！佢啲中文係有啲問題。」

Ian最似內歛性格

戲中Ian（陳卓賢）＠MIRROR飾演伊健年輕版，梁導解釋搵Ian除了其音樂才華，還發現他跟伊健都有內歛一面，伊健都相當認同，「佢同我以前好似，唔知你記唔記得？我以前係好少講嘢，記者話訪問鄭伊健就弊嘞！試過同DJ做訪問，我淨係話係呀、唔係呀、好呀，佢都唔知點應付，Ian啱啱見我哋時都係唔講嘢，我叫Natalie 同佢傾多啲偈，呢個係幾共通。」Natalie感激伊健鼓勵她將Ian「這個冰山劈開」，因對演出有好大幫助，「我頭幾日同Ian拍，佢比較嚴肅啲靜啲，同伊健哥哥拍，佢問Ian點呀？叫我唔好放棄，要堅持落去繼續同佢講嘢問佢問題，如果佢冇同我講，我有少少位覺得係咪要畀啲空間Ian呢？！佢咁講我就擺喺我心入面，係咁同Ian講嘢，佢慢慢開朗啲，都傾到偈，對我哋角色好緊要，如果冇呢個連繫係睇得出。」

恨有正規校舍上堂

電影中提到重回人生重要時刻，問到3人會選擇那一刻？梁導就最想返回電影在日本拍攝時，「拍呢套係人生一個太大轉變，去到日本 我係最輕鬆，唔知點解，我哋喺香港拍咗19組，停咗一陣再去日本拍，去到日本拍係我發揮得好、最舒服時間，個人又鬆，好享受喺日本成個拍攝過程。」20歲的Natalie已經想重返學生日子，「我無論遇到人同老師都好好，嗰時最大煩惱行返學時畀蚊咬，最鍾意食嘅曲奇餅賣晒，唔記得帶衫上PE堂，𠵱家諗返呢啲好少事。」伊健無奈話：「你就好啦！我未試過畀蚊咬，冇帶去操場啲衫，我連操場都冇。」伊健羡慕因中學時代並非太愉快，「我又係想返番去中學階段，因為中學階段太唔幸福，人生過得最唔美滿就係讀書時，原因係因為資源問題我學校得半日，係冇操場可以好健康去上堂。」冇正規校舍令伊健相當遺憾，「從來都冇，冇得同啲同學仔正常返全日，一齊放飯，一齊讀書做課外活動，我睇佢哋拍好開心，喺度踢水係好無聊，但最快樂，因為最冇壓力。」

《我的歌》同電影超夾

伊健1996年歌曲《我的歌》在電影中起重要作用，梁導指最初是希望在伊健作品中搵首歌配合電影，意外發現到此歌，「呢首歌係天意地連歌詞都啱埋『現在過去到未來』，嗰時我同伊健同陳光榮講想用呢首歌，佢哋有講呢首歌係點嚟，嘩！好啱。」伊健解釋歌曲創作過程，跟電影主題有很多不謀而合地方，「當時我同陳光榮去尖沙咀錄音跑住去攞車，突然見到個老人家，揸住支結他好似冇乜意識咁，就諗不如寫隻歌係講個創作人好勁，但有日佢把聲冇咗改為彈，但最後都係彈唔到，但隻歌其實喺佢心裏面，隻歌畀咗黃偉文填，佢改咗少少唔講創作人講歌手。」戲中Natalie會翻唱《我的歌》，她直言未拍這戲前未聽過此歌，伊健笑謂：「未知我呢個人嘛！」但伊健大讚她拍攝時，即場演繹得很好，「佢喺現場要彈要唱仲要演埋，佢竟然做完話覺得唔夠好，後尾再做都話唔夠好，我話你點解覺得唔夠好？我覺得好好喎！死啦！唔通大家有分別，佢哋要求咁高，我要返去三思吓。」