《異空感應》「渣爸」陳嘉輝搶鏡！曾任職政府土木工程署 太太梁小冰曾爆老公有驚人技能
發佈時間：18:30 2024-12-18 HKT
TVB劇集《異空感應》逢星期一至五晚8時30分翡翠台播映，由陳家樂、陳曉華（Hera）、阮浩棕、譚凱琪主演。除一眾年青演員搶鏡外，劇中兩位老戲骨都引起熱議。陳嘉輝飾演「懦弱渣爸」邢有山，睇得網民咬牙切齒，但現實中他卻超錫老婆梁小冰，大學畢業後更曾任政府高職；呂珊首演衰阿媽角色的勁像真被指專業，又吸毒又做一樓一，但實情她要在鬧市拉客，感覺好尷尬。
異空感應丨陳嘉輝渣到出汁
《異空感應》劇情成為網民熱話，其中陳嘉輝叫網民睇得超肉緊。邢有山年青時因經不起引誘背著妻子淑娟（龔慈恩飾）偷食舞女莊玉玲（呂珊飾），誕下私生子 Duncan（阮浩棕飾）。啞忍老公偷食多年的淑娟，因 Duncan「回歸」大爆發，一度激動至擸刀喊打喊殺！夾在私生子及老婆之間的有山，再度顯示渣男本色，選擇一再辜負 Duncan；昨晚（17 日）一集，原本誓神劈願會陪 Duncan 送別亡母莊玉玲的他，再次因淑娟大發雷霆失場， 間接令Duncan跌落萬劫不復的深淵。
相關閱讀：《異空感應》阮浩棕靠眼神演技大爆發！梁舜燕孫仔顏值超高 由兒童節目做起變男二
相關閱讀：《異空感應》陳家樂嬌俏助手何沛珈掀劇情高潮！將與老鼠曱甴激鬥陳屍後巷：拍完踎坑渠邊沖水
異空感應丨陳嘉輝一絕招收服梁小冰壞脾氣
對於有山這位失職父親及丈夫，不少網民睇到眼火爆，直斥無情無義！不過現實生活中的嘉輝，不但有情有義，更是圈中知名「愛妻號」兼「絕世好爸」，嘉輝與小冰相愛足足三十年依然恩愛，是圈中廣為人知的模範夫妻，二人於 2007 年誕下兒Lewis，一家三口感情甚佳。小冰曾開心分享老公的氹老婆大法：「我老公每日起身都會話：『你好靚喎』，結婚 20 幾年都係咁。同埋我性格係一有問題就會blablabla 講出嚟，佢就叫我慢慢講、唔好嬲，同埋叫我可以選擇用另一種方式（表達），例如喺最嬲時唔好講嘢，寫出嚟，寫完幾千字都已經唔嬲啦。」
相關閱讀：《異空感應》25集劇情懶人包 線上看最新劇情發展 陳家樂、陳曉華主演TVB穿越劇
異空感應丨陳嘉輝曾任職政府土木工程署
除了愛妻有道，嘉輝亦教子有方。小冰曾經大讚本身背劇本過目不忘的嘉輝，教到兒子經常默書100分！嘉輝更公開傳授背誦心得謂：「最重要係培養讀書興趣，理解課文內容；背劇本就主要係理解角色同故仔，死背會好快忘記。」其實嘉輝年青時頗有才氣，除曾以 90 分獲得第28 屆香港學校朗誦節中二男子英語詩詞獨誦冠軍，畢業於香港理工大學土木工程系的他，更曾在政府土木工程署任職工程監督。
異空感應丨呂珊做衰阿媽入型入格
而《異空感應》前晚一集，莊玉玲（呂珊飾）不但認不出Duncan 上前兜搭；當知道 Duncan 是親生仔後，莊玉玲還向 Duncan 苛索五萬蚊「斷絕關係費」，一切似為Duncan 埋下黑化伏線！
監製王心慰：我對唔住呂珊
出名好戲的珊姐，這次拍攝《異空感應》雖然出場次數不多，但每一幕均令人留下深刻印象，無論是點算 Duncan 所付「肉金」時爛撻撻市儈樣、無恥至極地向Duncan 荷索金錢樣，抑或哮喘病時的痛苦樣及死亡時的「死唔眼閉」樣，均相當有記憶點。監製 Amy 姐（王心慰）笑言，每次找珊姐演戲都巧合地將對方醜化，直言感到內疚：「我對呂珊唔住，平時睇佢演唱會都係好靚、好高貴咁，佢真實性格又好有活力同樂觀，但我次次搵親佢做嘅角色，都咁啱唔夠靚。今次呢個角色，我第一個就諗起珊姐，因為佢夠瘦、夠晒入型入格，難得佢又唔介意做一個咁嘅角色。不過佢有話未試過喺條街度咁樣演兜搭戲，有話好尷尬。」
相關閱讀：《異空感應》「陸文輝」蔡誌恩驚揭與周慧敏神秘關係 私下以一字匿稱對方勁有愛 二人相識13年
呂珊為難忘郭晉安經典場口
談到角色，珊姐受訪時坦言為劇集至少獻出了演藝生涯三大第一次，分別是在九龍城賣淫、吸毒及瞓鐵床演待被解剖的死者，珊姐不忘感激監製謂： 「感謝 Amy姐給我機會試新性格嘅角色。」自 2000 年開始參與無綫劇集拍攝的呂珊，曾兩度提名《萬千星輝賀台慶》「本年度我最喜愛的實力非凡女藝員」，亦曾提名「最佳女配角」殊榮，演技實力早獲肯定；與 Amy 姐合作無數的她，當年在《與敵同行》中遭養子郭晉安掟落地下一幕亦相當經典，Amy 姐更謂十分感恩當時的台前幕後為了拍好這一幕相當齊心：「佢哋傾咗好耐，拍出嚟好似真係跌咗落去咁。」
