吳鎮宇自爆智破恐怖電話詐騙經歷 張智霖受《誤判》啟發教仔免墮法網丨獨家
發佈時間：07:00 2024-12-20
吳鎮宇和張智霖在電影《誤判》再度合作，劇中前者演檢控官後者扮師爺，但角色正邪難辨好有發揮，Chilam為角色主動變「老」，鎮宇更有場超搶戲搵甄子丹隻揪。講到現在騙徒手法層出不窮，Chilam受《誤判》劇情啟發會教囝囝「魔童」小心保護自己免墮法網，鎮宇更自爆曾收恐怖電話詐騙，幸好夠醒目成功逃過一劫。採訪：杜杜 攝影：譚志光 髮型:Gary Poon(鎮宇)、Herman Law@ii Hair & Nail(Chilam) 化妝:Andrew Wong(鎮宇) Hetty Wong(Chilam) 場地:The Mira Hong Kong
Chilam戲中演的師爺「歐柏文」，表面幫窮人發聲，實則奸到出汁，對於繼網劇《家族榮耀》後再演反派，他認為兩個角色相差極遠，「上次始終都係個好人，今次始終都唔係好人，所以好唔同，對於我係好玩，作為演員，想試多啲，壞到底係會點呢？！」他更親自為角色設計白髮鬍鬚look造型，「我同平時反差大啲，反派比較少機會可以做到，變咗諗多啲嘢，同埋睇吓對手係邊個，原來係子丹，覺得自己會唔會平時太小朋友個態度同個樣，所以今次喺個造型上，希望令到自己個重量會多啲，令到自己成熟啲，希望畀到對方一啲壓力。」
曾演阿姐同學
飾演檢控官「楊鐵立」的鎮宇，看似偏幫有錢人，他解釋是劇本需要，「呢啲人好容易令人覺得係奸，成日黑晒口面，唔知點解乜都執到正，都好出嚟有呢個效果，都係佢哋想要，都開心。」他亦開心相隔多年可以跟阿姐（汪明荃）再合作，「佢哋查返，《萬水千山總是情》我做過阿姐同學，哈哈！我以前做過李司棋個男朋友，又做過阿姐同學。」可惜當年沒有正式對手戲，「邊有機會呀！你估我係鄭少秋、劉松仁呀，周潤發都未試過同阿姐演戲啦！記得有年返無綫見到阿姐，佢話你咁大個嘞！我識你嗰時有幾細個呢？！好得意，我臨走仲攬咗阿姐兩吓，抽抽水呀！」
子丹提出對打
戲中鎮宇跟甄子丹有場對打戲，他還主動叫子丹「我同你隻揪」成為熱話，他就解釋是子丹要求，「大家識咗好耐，佢入嚟無綫拍電視電影就係拍我，唔記得有冇周星馳份（1989年《無冕急先鋒》），直至拍《誤判》見返傾兩句，我話『啲觀眾好恨你畀人打㗎，不嬲你打人，我覺得做律師伸張正義，畀啲古惑仔打到爆晒缸咁先好睇』，佢唔知係咪聽錯觀眾好想佢畀人打，以為觀眾好想我打佢，哈哈！」他又自爆跟子丹商量時，講明不能「公平對打」，「我點同佢打一場呀？！我話『你冇得隔，如果佢隔我會痛，要搵到個理由，唔可以又係我演，我可以一衝入嚟就係我打你』，嗰句對白就係咁嚟！梗係會有效果啦！對『宇宙最強』講隻揪喎！佢要嘅效果，雖然明知會爆笑，但係我哋好認真對代，我冇壓力，佢唔可以隔同還手嘛，如果我受傷會爆佢㗎！哈哈！」
險收取違禁品
電影以真人真事改編，講年輕人誤交損友借地址寄包裹，慘被指販毒搞到一身蟻。鎮宇自爆早前收到詐騙電話，自稱海關指他有包裹滯留廣州，還知道他的名字，「恐怖在佢話『你係吳生，吳鎮宇係咪呀，你知唔知有啲肉乾寄嚟香港唔寄得㗎，滯留咗喺廣州』，我話我啲助手寄牛肉乾都唔得？！我話咪住先，幾多號寄，有冇地址呢？佢話冇，但係寄鱷魚肉乾。」他指助手曾寄過牛肉乾，但早已食完，所以覺得事件相當恐怖，「佢攞到我個電話，知你係吳鎮宇嗌你去收喎！如果係毒品去收咗咪拉你囉！當然我唔會去啦！但如果攞埋你地址長期寄嚟，佢寄毒品嚟都得㗎喎，無端端都搵到吳鎮宇個電話號碼，個世界就恐怖在咁啦！」
望兒子識自保
兩人兒子正值青春期，鎮宇囝囝吳費曼16歲、Chilam囝囝張慕童已18歲，鎮宇坦言騙案防不勝防，只望兒子醒目，「希望佢哋自己識得諗啦，1個18、1個16啦，大佬呀！教唔到你咁多啦！人哋話有啲嘢寄嚟你度再拎返畀佢，唔知佢有冇咁笨，希望睇吓《誤判》啦！借個地址畀人都幾恐怖，我舉個例子就更恐怖，如果真係寄到嚟屋企就麻煩。」Chilam亦相當認同，「18歲都係成人嚟，你自己要對自己所做嘅嘢負責，一定要更加謹慎，個腦老筍要生埋啦！網上世界係幾複雜，都唔知邊個係真邊個係假，甚至乎係咪同個人講緊嘢又唔知，嗰個人幾多數又唔知，好難去判斷一切，不如有時可能少啲上網，都係一個方法啩！」
