MC恨演反派望續集變做卧底 林家熙栢天男盼開《誤判2》跟甄子丹再學打丨獨家
發佈時間：07:00 2024-12-23
MC（張天賦）、林家熙（Locker）和栢天男（Adam）在電影《誤判》跟身兼監、導、演的甄子丹首度合作，他們坦承拍一套未夠喉，望開續集可以跟甄子丹學嘢繼續打。今次打到抽筋又嫌有肚腩的MC，好想再拍時操返fit一雪前恥，仲想挑戰反派角色，提議「李Sir」可大玩變節做卧底。採訪：杜杜 攝影：孔子 髮型:Cliff Chan@Myös(MC)、Lupus Chiu@O4(Locker)、Kenki(Adam) 化妝:Tammy Au(MC)、Will Wong(Locker)、Kyo(Adam) 服裝:Givenchy
難得甄子丹主動邀合作，MC透露背後有段故，「聽聞係佢一個好朋友介紹，都多謝佢同埋多謝佢嘅朋友，係透過音樂認識我先。」告知他除了歌曲令甄生留下印象，還因亦正亦邪外形，切合「李Sir」角色衝動性格，他搞笑話：「所以我用好運同好彩去形容，亦都要多謝媽咪賜咗呢個亦正亦邪嘅樣畀我。」
國際巨星全冇架子
跟國際級的甄生合作，3人都話壓力未有想像中大，MC說：「見前我係好擔心，會有好多想像見前輩會唔會好有氣場？但見到佢其實好friendly，第1次都幾傾得埋，後尾冇乜擔心同埋壓力，佢都知我係新人，會畀好多包容我。」Locker 都奇怪竟然冇壓力，「我都諗點解呢？又真係諗唔到，但絕對係好事，我哋新一輩演員同前輩合作，如果冇緊張、壓力，會演得輕鬆啲開心啲。」Adam雖然跟甄生對手戲不多，但無阻兩人溝通，他更直呼前輩英文名，與前輩以英文吹水，「我哋會研究啲角色喺邊度嚟，我冇諗過同甄生會有機會傾呢啲，都好驚訝，唔知道Donnie咁肯用英文講嘢，呢次合作後friend好多，跟佢學咗好多嘢，多過畀佢打幾拳。」
MC嫌肥肚腩礙眼
拍得甄子丹作品，動作戲當然不能少，MC坦承演戲經驗不多，《誤判》更是首次挑戰動作片，最初好擔心，「開頭知要打交，曾經拍過戲有少少係動作場面都辛苦，所以好擔心自己應付唔到，甚至乎會整親或者太辛苦，後尾發現佢嘅團隊處理好專業，就解決咗我嘅擔憂嘞！」團隊會因應MC能力去設計動作，反而是他認為自己準備不足，「啲動作以我嘅水平，譬如對腳可以踢得幾高去設計，相反我睇完戲覺得我身材有多進步空間，之後我係好畀心機鍛練我嘅身體。」他嫌自己不夠肌肉線條，拍打戲時唔夠好睇，「啲衫好貼身，貼完身仲要濕身呀！」動作戲應該可以分散注意力？Locker和Adam搞鬼話：「人哋慢鏡逐格睇睇啲肥肉喺邊度！」MC無奈話：「逐格睇個腩都……唉！」Locker安慰他說：「可能啱角色，督察係有啲㗎啦！」MC唯有期望有下次機會一雪前恥，「如果有續集，或者未來希望再sharp啲形象示人，有乜可能毒販仲fit過我㗎！」Locker和Adam再安慰，「咁我哋要走佬㗎嘛！」
各有難忘拍攝場面
講到戲中難忘一幕，戲中演督察「李景威」的 MC，會揀單拖捉賊，因當中牽涉太多不熟識領域，「場戲拍咗好多日，臨尾有啲改動，要再搭景拍多次，當時都辛苦，但真係好好玩。」他最深刻一個動作鏡頭，「有幕講我要避兩吓跟住踢腳，我係立即抽筋，但roll緊機唔可以嗌痛，就好有型咁扮企喺度，但後面隻腳抽咗筋，要企到好直，拍完佢哋問我做乜唔郁，我話抽筋呀，哈哈！」演毒販「陳國榮」的Locker，最難忘是最尾上法庭一幕，因角色精神狀態難處理，「嗰個狀態真係經歷咗太多嘢，又撞車、畀人打，精神又有啲問題，又畀人逼，終於見到個仇家，所以係好攰。」演毒販「劉少強」的Adam，最難忘是做有型大佬，「我幾享受做夜總會老闆，我啲𡃁唔少，都幾好玩，未試過呢個感覺，有咁多保鏢，咁多𡃁保護我，同埋同甄生係對立，冇諗過有呢種對手戲。」3人坦承跟甄子丹合作一套未夠喉，好想《誤判》再拍續集，更不介意比今次打得更甘， MC更諗埋「李Sir」角色發展，「呢套戲只係初出茅廬，可以講前期或者後期有返啲歷練嘅『李Sir』，我係好鍾意港產警匪片，有時反派盜亦有道，正派亦一樣有壞人，好鍾意睇嗰個拉扯，我都想演反派，或者『李Sir』叛變（做卧底？）都好喎！」Locker補充：「跟住我就洗清底，跟咗佢。」Adam說：「拍《誤判2》！」
