薛家燕對香港有信心會繼續投資 持雙位數物業變「樓王」坐擁2億身家丨獨家
發佈時間：07:00 2024-12-27
74歲的薛家燕趁樓市「撤辣」及銀行減息，最近叫價近千萬，沽出西半山豪宅592平方呎低層兩房單位，淨賺近400萬。家燕姐名下所持的物業有9個，加埋公司名義購入的物業單位及工廈，身家超過2億。由坎坷單親媽媽捱到今時今日的成就，苦盡甘來的她直認好滿足，更表示會繼續投資香港物業，有機會再執平貨換新樓，因為她對於香港的未來充滿信心：「我喺香港咁耐唔會移民。」 採訪：方騫平
薛家燕沽出的單位有35年樓齡，1997年她以585萬元購入，持貨27年，大半年前曾叫價1200萬放售，直至最近連2.3萬元的租約一併沽售，降價為980萬元，但仍比銀行網上估價872萬元高出約12%，家燕姐表示啱價就賣，沽出可套現換貨。
人情味濃唔打算移民
雖然近年樓市持續下跌，但作為「樓王」的家燕姐卻冇有怕：「呢幾年樓市可能會有啲回落，咪收住租先囉，香港地少，對住屋好有需求，所以都可以趁低吸納。」她強調好鍾意香港：「喺度住咗咁耐有咁多人認識我，人情味濃，好多時仲得到優惠，所以唔打算移民，有錢投資返喺呢度都ok呀。」
向任姐學買磚頭保值
投資有道的家燕姐由童星出身，1984年嫁給生意人石保慶；11年後被離婚，當年湊住3名年幼子女復出養家，捱了近30年生活總算好ok，感恩上天對她好好，加上觀眾緣令她工作不絕：「其實我唔識投資，細個時聽到任姐(任劍輝)、仙姐(白雪仙)及陳寶珠都係買磚頭，故搵到少少錢就買，而且當年一個月內買賣樓宇毋須畀釐印費，所以成日去睇樓，買完即放，每次轉手都賺到幾十萬，見到有潛力嘅就買落嚟收租，因而積少成多。」家燕姐最自豪在置業方面從冇蝕過，當年幾百萬買入，現在全部升至千幾萬起。
買縮水鋪致雞毛鴨血
家燕姐唯獨最嬲「中伏」，在最難過的時候竟買了麥翠嫺老公龔汝華推介必賺的縮水舖，累她勁蝕200多萬：「1992年以250萬購入佐敦廣場兩個舖位樓花，點知收樓時先發現嚴重縮水3至7成，租又租唔出，但每月硬供萬幾蚊，其後嗰商場仲變咗死場，後來我做埋苦主召集人，向大業主追討賠償，搞咗18年直至2010年賤價沽舖，250萬僅剩返27.6萬，僅收返1成資金…」重提她依然有火：「嗰時老公走佬，投資失誤搞到冇晒啲錢，真係幾乎做唔到人，被呃好陰功。」幸而《真情》帶給她登台、廣告等工作機會，又拍到周星馳電影，最後都跑到數。
因為近年市道唔好，家燕姐坦言要積穀防饑，不會減產：「𠵱家拍嘢係攞滿足感，開開心心又一日，長遠投資反而喺樓市及品牌方面、包括自家品牌曲奇、家燕媽媽藝術中心，遲啲仲會有大搞作，1月率先喺星馬推出Captain Nancy護脊、輕量嘅學童書包。」今次家燕姐搵埋3歲半孫仔Julian上陣，兩嫲孫一齊做代言人：「個孫仔好叻好醒目呀，一埋位就識得唸對白及跳十字步。呢個係健康產品，對小朋友成長好有幫助嘅，算係為下一代作出貢獻。」
