193為入戲幻想胞妹畀姜濤害死慘變浮屍 拍《無用的謊言》求突破主動要求演癲佬丨獨家
發佈時間：07:00 2025-01-06
193（郭嘉駿）@ERROR在改編自韓劇的《無用的謊言》中，飾演為妹報仇窮追不捨，外表潦倒行為癲狂的「高嘉豪」，他自爆求突破主動要求演此角，還不介意造型極醜，又盲又有疤痕兼頭髮勁油。他笑言為投入角色情緒，在腦海中胞妹郭嘉盈是死了很多次，更靠幻想胞妹是姜濤前女友，卻被姜濤推落海慘死，變成爛面浮屍。採訪：杜杜 攝影：林賓尼 形象:Lok Fong 髮型:Harris Lai@Chic Private I salon化妝:Cori Wong@Annie G. Chan Makeup Centre 服裝: Mastermind WORLD、Both Paris
193謂最初安排試鏡時並非做「高嘉豪」而是其他角色，但他認為太本色演出，所以極力爭取此機會，「本身casting係啲靚靚仔仔偶像角色，原著就係coffee shop裏面嗰個同埋歌手嚟，但我不甘於太似現實嘅自己，想做啲比較有突破性啲。」他又直言好有自知之名，「真心話係人都想做主角，但係呢個係姜濤，爭唔到㗎嘛！」
造型令姜濤認唔出
193認為演「高嘉豪」也不錯，但唯一顧慮是年紀跟韓版分別太大，「原著哥哥係40幾歲阿叔嚟，但導演覺得我做冇說服力，青靚白淨，年紀又唔老，唔會說服到觀眾，演技幾好都冇用。」他跟導演溝通後認為可加點缺陷給角色，「本身話跛腳，但係長期有打鬥會冇說服力，傾傾吓不如從外貌着手，令到觀眾一睇，唔使演技都覺得慘。」於是設計年輕時皮膚粗糙，年紀大時缺陷更多，「我幻想佢係炒散，冇專業技能就做地盤，喺地盤工業意外，令到隻眼有一邊睇唔到嘢，我要長期戴住隻白色con，面度多咗幾條疤痕，成塊面好粗糙，頭髮好似10日冇洗咁超級油。」這造型不單令他放下193身份，更有助他演繹，「我第1日見到阿姜（濤），佢唔認得咁滯，咁樣幾好，亦都幫到自己入戲，化完妝就會覺得呢個人好慘，想同情佢。」
易衝動愛為妹出頭
拍攝時，193最難應付是跟姜濤一齊拍動作戲，「我同阿姜搏鬥得最多，佢同我份量都有番咁上下，我又搬唔郁佢，佢又搬唔郁我，我哋每次搏鬥都超級攰。」本身跟阿姜好老友的他，要投入對方是殺妹仇人時，就要靠無限幻想，「角色係好錫阿妹，因係唯一親人，我就幻想阿姜係渣男，以前係我阿妹個ex，係阿姜殺咗我阿妹，唔係戲入面個妹Alice（許寶恆 ），而係諗住自己個妹，所以我阿妹喺記憶中係死咗好多次，直情每次見到阿姜就幻想佢推咗我阿妹出海，我阿妹係條浮屍，流晒血爛晒面，得返對鞋喺沙灘。」不過他坦言不敢跟胞妹講，「絕對冇呀，費事畀屋企人知道。」戲內為妹妹報仇可以不惜一世，現實胞妹有事他一樣會出頭，「我個妹有發明星夢，之前佢畀啲公司呃，我知道咗想出面，夠膽恰我個妹，我係黐線嘛！會直接出post 數臭間公司，但有啲中間人叫我唔好咁衝動，幫我搞掂，唔想我又有新聞，其實我性格同角色一樣衝動，只不過劇入面用暴力去解決，現實193唔會用暴力，最多係用言語去解決。」
新1年望出更多歌
193坦承自《季前賽》後，領悟到做演員的真正意義，「反而想將我感受傳遞畀觀眾，《季前賽》係個好例子，觀眾會同我一齊喊，希望呢個角色觀眾同我一齊唔開心，最尾同我一齊釋懷。我寧願令觀眾記得，令觀眾戥我唔開心或者同情我，好過多戲份，但觀眾未必代入到。」越來越愛演戲的他，若要在歌手和演員身份二揀一，他都寧願選後者，「可以同觀眾一齊經歷好有趣，好enjoy每做一個角色，經歷咗一次人哋嘅人生，而令到我有其他反思同感受，好有趣，同埋有啲嘢宣洩唔到，原來角色可以幫你宣洩，當然唱歌都鍾意，歌嘅參與度同創作性高好多，但二揀一會揀演戲。」講到新1年願望，他希望有更多演戲機會，最想演黐線佬角色，「想做啲天生唔知點解會short咗，好似《JOKER》本身有精神分裂症咁，畀我將內在嘅黐線發洩晒出嚟。」音樂方面，他嫌2024年出得《B出口》1首歌太少，2025年望有所改善，「我plan係有3至5首歌，同埋全部嘢都一定要自己參與。」
