黎耀祥自爆曾被劉青雲「潑冷水」批評演技 突對衝擊四屆「視帝」失信心丨獨家
發佈時間：07:00 2025-01-15 HKT
《萬千星輝頒獎典禮2024》將於本周日舉行，3屆「視帝」黎耀祥憑《巾幗梟雄之懸崖》有望4奪大獎，刷新最強「視帝」紀錄。演戲近40年的祥哥分析賽前形勢，神預測是TVB力捧中的張振朗及張曦雯世界；而羅子溢搭張曦雯就是次熱；他更自爆曾被老友劉青雲潑過冷水，彈他演得麻麻地就失去信心：「佢老實不客氣評我『冇演劉醒演得咁好。』」 採訪：方騫平 攝影：林賓尼 場地：hotel icon the market
60歲黎耀祥對演戲好有研究，唔止戲好還眼光獨到，過往預測「視帝」、「視后」都有8成準，他分析說：「一個人喜怒哀樂、表情、講嘢、語氣唔會變化得太大，每個演員演繹嘅方法，會有人鍾意會有人唔鍾意，所以都係從角色上出發，而非睇功能及演技。」
振朗曦雯年青化組合
今年祥哥都有點心水，會用張振朗及張曦雯做膽，拖陳豪、羅子溢及楊茜堯、林夏薇做腳：「我覺得振朗《反黑英雄》中角色幾討好；阿Mo勝在去年攞過，今年蟬聯會係一個話題，而且佢演技穩穩陣陣唔會太差；譚俊彥跟阿Mo同係《企業強人》戰友，兩者選其一陳豪比較成熟啲，成個戲壓場感重心好啲；羅子溢係隻黑馬，《婚外情》都做得好；『視后』反而好難揀，因為林夏薇《黑色月光》做得好；同劇嘅楊茜堯夠經驗，壓場感好強，而且個戲圍繞住佢；胡定欣《巾幗》個戲複雜要加分，以『七爺』角色取勝；張曦雯《企業》角色都好，加上佢cool cool哋fit晒個角色，而且受力捧，又做咗咁多年，計返客觀條件由佢拎都唔差，所以佢都係大熱，但如果計埋私人感情，梗係想胡定欣得啦。至於張振朗及張曦雯齊齊獲獎呢個畫面好睇，好年青化。」
做朋友要老實不客氣
他對再衝「視帝」信心都是麻麻地：「其實角色係寫得唔錯嘅，個劇有張力，人物關係、事情轉接及峰迴路轉結局係最複雜嘅，亦都盡咗力演出，但《巾幗》始終唔係最hit嘅戲種，民初戲比較老派啲，近年大家都鍾意睇時裝劇，要求年輕化及時代感，呢方面係蝕咗嘅，我成日覺得攞唔攞獎，跟角色、戲種及觀眾鍾唔鍾意好緊要，演得好好，但觀眾唔鍾意呢個好尷尬…」他又自爆相識幾十年老友劉青雲不時會給他評語：「佢話我『呢個戲演得麻麻哋㗎咋！』覺得我冇演《巾幗梟雄之義海豪情》『劉醒』咁好，但冇詳述原因，其實我有估過嘅，可能『劉醒』比較踏實，佢係鍾意一啲實在沉得住嘅人物。(青雲潑你冷水？) 係好老實唔使客氣，朋友先唔使客氣，佢嘅意見好啱，我梗接受，做得唔好一定有啲原因，睇返《懸崖》係有好多不足之處嘅，對自己會有失望，只能叫僅僅合格。」祥哥又彈自己近年有幾套劇作都做得唔好：「除《殺手》比較好啲，《輕.功》只能話係OK；《拳王》又犯咗另一種錯，冇考慮到氣氛，將成件事壓得太低沉，作為主角難辭其咎。」
要發掘新血承傳行業
問到是否劉青雲的坦白，打擊了他角逐「視帝」信心時？祥哥就直認：「唔會只得佢，佢只係其中一個啫，會綜合好多意見去睇嘅，我堅持唔可以用人哋讚賞做標準，因為讚你有好感、有同情分、有啲體諒…有好多原因，呃到人呃唔到自己，反而人哋彈就你就要留意。」最後黎耀祥強調頒獎禮其實是一個宣傳推廣活動，用意有個選擇心態帶起觀眾留意，投入去睇戲：「作為同業邊個攞獎都要支持，每個演員都要辛苦付出，而且𠵱家生意難做，電影、電視行業非最蓬勃階段，係咪要努力發掘多啲新嘢出嚟？係時候佢哋要接捧，承傳對成個行業係有需要嘅。𠵱家我仲做緊，再畀(獎)我，咁幾時輪到佢哋呀？」
