陳柏宇後悔錯過買比特幣最佳時機 考慮搵被認錯洪卓立任演唱會嘉賓丨獨家
發佈時間：08:00 2025-01-17
陳柏宇（Jason）最近推出新歌《關於後悔》，理性的他坦言比較少後悔，唯一後悔是錯過投資比特幣最佳時機。談到下月舉行演唱會主題「LIFE IS LIVE」，他認為生活中最重要就是家人，所以過億六合彩金多寶必買，又考慮搵早前被樂迷認錯的洪卓立任演唱會嘉賓。採訪：杜杜 攝影：林賓尼 形象:@exactly.the.sam 髮型:Billy Hai@The Attic化妝:Jessica Chan 服裝:@cos 場地:BLACKROOM@blackroomhk
Jason對於新歌《關於後悔》他指內容是填詞人黃偉文「賜給」他，又稱本身很少會後悔，「好後悔冇做，咪去做返囉，嗰啲嘢冇得做返，咪向前行囉！」唯一令他後悔至今，就是一個投資決定，「好後悔當年個friend叫我買Bitcoin（比特幣），嗰時只係3千蚊粒，我冇買到，去到3萬蚊粒先識買。」不過他好快就釋懷，「都係成功咗先至後悔啫，如果𠵱家Bitcoin只值10蚊粒，就唔會後悔冇買，直情慶幸做咗個啱嘅決定，所以咩都後悔就有少少攞苦嚟辛。」
為家人買六合彩
Jason下月在港舉行的演唱會以「LIFE IS LIVE」為題，他認為生活除音樂外，家庭是最重要，「對我嚟講，為自己嘅動力係冇為其他人咁大，為自己好多嘢冇乜所謂，但係為家庭會想佢哋過得好。」訪問當日剛巧是六合彩金多寶達1億2千萬開彩前夕，他工作中仍抽空去買，「呢次去到9位數字喎，真係要買啦，哈哈！」他認為令屋企人生活得更舒適，是努力搵錢最大推動力，「家庭負責唔畀你儲錢，但係為咗家庭係要搵錢，冇咗家庭未必搵咁多錢，有時太舒服真係會好難推動去進步。」
講到早前跟囡囡直播時，遇到有歌迷誤認是洪卓立，Jason坦承不感到尷尬，而剛巧洪卓立都準備開騷反而可當宣傳，「大家互相抽少少水幾好，哈哈！演唱會搵佢做嘉賓都可以諗吓喎！如果真係佢做嘉賓，《彌敦道》就佢自己唱啦！」相隔3年再在港開演唱會，他一樣緊張，唯有靠多練習，「以前冇咁早做準備，但係今次係早咗做準備，可能以前唱得唔好，唱得太多會仲差，傷聲嘛！𠵱家多咗好嘅習慣就可以練多啲。」
