Hey Brother計劃今年狂出歌再拍埋電影 5子夾埋280歲組男團逐新人獎唔尷尬丨獨家
發佈時間：07:00 2025-01-23
李思捷、黃智賢（Ben）、麥長青（麥包）、曹永廉和唐文龍最近以280歲之齡組成男團「Hey Brother」， 並推出首支單曲《我為人人》。5名中佬講明已籌備了2年多，今次並非玩玩吓，所以除了這首新歌外，今年計劃再推出3、4首歌，他們笑言望狂谷攞新人獎，仲打算下半年開拍電影，由思捷親自出任監製、編劇和導演。採訪：杜杜 攝影：譚志光 服裝:均DENIM 場地:The AIR (The ONE)
男團「Hey Brother」的誕生早在2年幾前，5子在一個飯局開始構思，思捷說：「嗰時疫情大家好想搞啲嘢，尤其是隔離緊，大家唔單止喺香港，都想喺大灣區搵啲嘢搞吓，就諗到不如一齊搞，係時候要郁，要奮鬥嘞！我哋5個唔使1日就say晒yes，嗱嗱聲整隻新年歌《祝福你》出嚟先，但唔夠原裝，之後搞咩好呢？！」由於大家各有各忙，到最近才再推出首支單曲《我為人人》， Ben說：「成日話搞啲嘢咁搞咩？！係綜藝定網上開個channel，最後共識一個團應該有首自己歌，就開始諗主題係講啲乜嘢，逐關咁去傾，過程我哋好享受，由零開始去孕育一件事。」講到《我為人人》主題，Ben續說：「人到中年都睇咗好多人情冷暖，喺人生嘅階段都不自覺戴咗個面具，面對老闆、父母、家人、老婆係1個面孔，究竟真正嘅面孔係啲乜嘢呢？！乜嘢係最初心，我哋就諗住呢個主題，同作曲填詞去講，內容有份參與，會應景啲入肉啲。」
隊員互補不足
思捷解釋男團命名「Hey Brother」前，曾想了很多個名，但最終覺得此名最適合，「試過諗過好多，有諗過叫叔叔、鐵男，後尾又係2年前，我哋拍咗個抖音嘅短片，喺度行catwalk懶型咁，底個音樂係不停『Hey Brother』。」麥包說：「幾有國際性，brother係冇年齡限制，好多觀眾朋友認識我哋都係由細睇住我哋大，睇住我哋成長，就係Hey Brother。」講到各人分工，阿廉笑言：「組團有個好處，大家可以互補不足，個個都有唔同嘅技能喺度，當然靚仔係我擔當啦，其他人係用腦筋、跳舞同型嗰啲。」思捷笑指：「靚仔，佢霸咗啫！」 Ben說：「呢班兄弟有啲係策劃嘢叻啲，好似思捷做咗咁耐監製，佢知道個節目、歌曲係要點搞，過程中我都學咗好多嘢，我係比較冷靜理智啲，佢哋衝得太行時，就拉住佢哋。」思捷就自稱是阿四，「佢哋有咩意見，我聽晒之後盡量阿四咁總結歸納。」文龍說：「思捷同阿包個進取能力好強，策劃方面我哋唔夠佢哋咁犀利。」麥包亦自認是阿四，「文龍負責騷胸，我負責騷肚腩。」但阿廉卻不認同，「阿包識好多人，幫我哋搵到好多工作同贊助。」
成軍即有登台
講到組男團目標，原來除了出歌，5子還打算有很多新搞作，Ben說：「開心都係個幾大目標，我哋都唔細啦嘛，過往我都係偏向被動，我哋自發搵啲嘢嚟搞過程係開心，過程就賺咗，了解對方多啲，真係好主動去策劃啲自己好想做嘅嘢，未來我哋除咗唱歌，仲可能會拍戲，或者拍啲綜藝。」文龍補充：「舞台劇，棟篤笑我哋都會考慮。」他們踏入新1年已有新工作，年廿九已經會到馬來西亞雲頂登台，3月又會在港出席公開活動，麥包透露還不止於此，「我哋希望今年出到3、4首歌，咁新人要出多少少歌。」Ben說：「新人要勤力啲，我哋要多啲人識。」麥包指着思捷再爆料，「希望下半年我哋套戲開得成，導演監製編劇喺度，大家同工同酬，個監製又肯做埋編劇、導演就最好，我哋梗係畀佢做啦！」思捷笑言：「啲阿四做晒！」他們又坦承出多些歌是搏攞獎，仲話就算平均年齡55歲，就算競逐新人獎也不尷尬，麥包說：「我哋真係新人嚟，好意思點會唔好意思，夠膽畀我哋點解唔夠膽上台，只要我哋唔尷尬就冇嘢尷尬。」文龍說：「平台願意考慮我哋，我哋願望被考慮。」思捷謂：「無錯，得啖笑都好！」
