高海寧想拍相親節目搵屬蛇老公邊賺錢 馬國明失控帶「仔」睇病證做到好老竇丨獨家
發佈時間：07:00 2025-01-24
高海寧（高Ling）和馬國明在《麻雀女王追男仔》再度合作，更興奮首度擔任賀歲片男女主角，相信蛇年會更旺，搵到盤滿缽滿。馬明就不心急蛇年做老竇，但帶愛貓睇病時失控表現，盡顯有做好爸爸潛質。高Ling自言屬蛇好旺她，但不心急新年搵對象，就算想休息都寧願邊拍綜藝搵錢，但接受馬明建議可拍相親節目搵屬蛇老公，賺住錢搵幸福。採訪：杜杜 攝影：譚志光 服裝:@maxandco(高Ling) 場地:K11 Art House
高Ling首次孭飛賀歲片感到興奮，「第1次做電影女主角，又係賀歲片，更加值得開心，我覺得好旺啦，入場睇我哋賀歲片，會旺上加旺。」馬明心情亦一樣，「我直情係第1次拍香港電影𠻹，之前只拍過內地電影，仲要係第1次做男主角好開心。（競逐新人獎？）呢個我真係唔知呀！」戲中高Ling演麻雀女王，牌技高超，但真人竟連計番都未識，「呢2年去啲朋友屋企拜年，會搵我戥腳，學識咗啲基本技巧，雖然我唔叻但有運仔，食過摸返嚟嘅十三么，但我淨係識砌靚副牌，食完都唔知幾番。」
去到邊瞓到邊
一向恨塞爆工作表的高Ling，龍年發展好滿意，「見得最多係助手同經理人，爹哋媽咪都少機會見到，keep住飛嚟飛去，但好享受，入行咁多年終於feel到可以咁瘋狂㗎！雖然好攰，但好充實，希望事業運繼續延續落去。」她講明有錢搵可以不放假，仲因忙練到特殊技術，跟曾志偉睇齊，「我𠵱家train到個技能，就係去到邊可以瞓到邊，一起身就做嘢。（好似總經理咁？）哈哈！有呢個技能好開心，唔係人人做到，多謝個天畀我做到。」蛇年她想繼續努力搵錢，但愛情就隨緣，「我相信命運，有啲嘢唔係我控制，呢2年行正事業運，我會順應命運，如果真係有桃花畀到我唔抗拒，但唔會強求。」
搵阿佘問意見
高Ling又指玄學家講過蛇會旺她，「蛇係我嘅財富，蛇年財運會幾好，都期待。」馬明建議她，「你應該搵個屬蛇男朋友都幾好喎！」高Ling認同，「師傅講無論係屬蛇或者叫阿佘都旺我，所以有嘢會message阿佘（佘詩曼）問吓做唔做得，佢都好樂意答我。」她又認為將來若有對象，必定帶給馬明過目，因信物以類聚，「價值觀相同嘅人會玩埋一齊，佢係好男人，若同嗰個男仔溝通到，就係同一類人。」她又相信原生家庭父母恩愛，下一代也會對另一半好，她和馬明就是好例子，「佢爸爸對媽媽好好，由細薰陶男人係要咁樣對女人，所以要搵個家庭都係好好嘅男仔。我爹哋媽咪都好好，所以我唔缺愛，喺感情上唔急，幾有安全感。」
樂做貓奴爸爸
馬明稱龍年平穩過度，高Ling忍不住窒他：「咁都算平穩，旺嗰時係點㗎！？我未停過你都未停過喎！」馬明笑言只想蛇年越來越好，不過講到做老竇，跟太太湯洛雯好隨緣，「話有plan亦可以話冇plan，我同太太覺得就算冇小朋友都冇乜所謂，屋企有兩隻貓貓已經好掛心。」講到一對「仔女」，貓奴爸爸就冧晒，自爆早前「囝囝」病倒超擔心，「好驚，原來真係會發癲㗎！有次隻貓過敏，我即刻剷架車帶佢去醫院，將架車就咁擺喺街唔理抄牌，時隻貓已經喺架車度瀨尿，我唔理就抱住佢衝入去醫院，好失控！」高Ling也見識過他貓奴樣，「佢拍嘢唔出聲，但會突然話老婆send咗啲貓貓相好得意，又開啲片畀我睇。」高Ling估計若馬明有下一代，應該不會出街，馬明都同意，「應該一收工就見我唔到，要補shot呀？！我出咗隧道就返到屋企啦！」
老婆陪上綜藝
展望蛇年，兩人都希望多拍綜藝節目，但馬明不夠膽單拖拍，「有啲擔心，雖然老婆成日鼓勵我，但我好驚令到成個氣氛變得好悶，試過有內地綜藝搵我，但我真係唔知講乜，國語又唔叻。」高Ling提議他跟老婆一齊上講婚姻的節目，「老婆都提議一齊去，咁我就會放啲，我老婆幾幽默，如果一齊去我會大膽啲。」高Ling就想拍旅遊綜藝，「一班人去旅行或者喺個地方生活，可以認識多啲朋友，成日拍劇好需要生活，喺自然環境下搵返高海寧，放慢個節奏，但又唔想放棄搵錢喎！最完美方式係賺住錢去綜藝節目度享受生活。」馬明提議她不如拍相親節目，「哈哈！你賺住錢搵個屬蛇嘅男仔。」高Ling冧笑好滿意話：「陳喬恩都係咁樣，呢個可以考慮下，哈哈！」
