陳靜罕談神秘情史：邊個想會有第三者 被葉念琛指係「小三」防盜器丨獨家
發佈時間：07:00 2025-01-28 HKT
由葉念琛執導的賀歲片《麻雀女王追男仔》中，陳家樂與港、台女神33E陳靜(DaDa)及32E林襄發展出搞笑嘅三角關係，現實中，索爆的DaDa自爆好lucky，拍拖以來從冇出現過第三者，坦言：「邊個想會有第三者？」葉導抵死地形容索爆DaDa本身已經是「進擊小三」的「防盜」！但當DaDa被問到感情狀況時，她堅持將私生活「留白」不願分享，令35歲「性感女神」添上神秘感。 採訪：方騫平 攝影：林賓尼 化妝：Bubuumakeup 髮型：Jack Hung@JPAW Salon (K11 MUSEA) 服裝：Alice + Olivia 場地：K11 Art House
由王晶及葉念琛領軍的於賀歲片《麻雀女王追男仔》於今日大除夕上映，片中DaDa飾演片場親密戲指導員，是戲劇發燒友，卻遇上看不上的4屆躁狂影帝陳家樂，撞出了喜劇火花，再加埋新晉演員林襄的錯摸，感情事更錯綜複雜。DaDa好欣賞陳家樂投入度：「佢拍到聲嘶力竭，好尊重自身演員呢個職業，同佢合作好放心。」
拍戲冇不快經歷
葉念琛認識DaDa多年後首次合作：「想拍到與別不同嘅DaDa，覺得佢仲有好多可能性，尤其可以做多啲喜劇。片中佢表現都幾有驚喜，拍到從來未見過咁可愛嘅DaDa。」DaDa大讚葉導好照顧演員：「佢知道演員心態，每人都想有得發揮，同埋接受新嘅挑戰，唔想重覆演同一個角色。」葉念琛又話外國電影為免男女主角拍親熱戲尷尬，會由親密指導員商討相關尺度，從而保護女性在健康環境下拍攝。DaDa慶幸以往拍親熱戲時冇試過不快經歷：「咁同導演會有溝通嘅，如果唔想做嘅嘢冇人會迫到你，當然有呢個崗位就更加好，唔止女，就算男演員都好需要，咁樣能減少誤會。」
運氣好逢賭必贏
片中不乏打麻雀及玩德州撲克場口，葉導又爆DaDa賭術精湛，精通玩Poker：「見佢喺賭枱度唔出聲觀察，完全知道派咩牌，佢玩得叻。」曾在節目中玩過Poker的DaDa直認有研究：「我覺得Poker同做戲有關，可以捉到心理，好好玩。」她更自爆運氣太好逢賭必贏：「新年會同屋企人打下麻雀仔，但冇人會再同我打，因為我逢賭必贏，尤其Poker冇乜輸過，朋友一定爭住夾要我做莊，我唔算好賭唔想玩太耐，但贏咗又唔畀我走…」
堅拒談感情生活
提到片中嘅三角感情關係，DaDa被追問到現實生活中有冇遇過「進擊小三」時？葉導即代搶答：「有咗DaDa，就唔會有『小三』過嚟搶，因為佢本身已經係『防盜』啦。」DaDa則避談道：「咁要有咗感情先知喎，不過，我係好幸運嘅人，以前未遇過有『第三者』，當然大前題係相處過，會清楚知道要揀個咩人做對象啦，我一定會揀過三觀好嘅男仔，邊個想會有『第三者』㗎？」語畢，DaDa大笑反問：「點解話題會扯到呢度嘅？」她反而想講，好想拍些純純的愛嘅題材，今次算是完整的愛情故事。續問相隔幾耐冇拍拖？她卻有所保留：「感情嘅嘢希望有好嘅嚟，我保持神秘喇，就算有冇我都唔會分享，對我嚟講呢樣嘢好私人。」她強調，現階段是清心寡慾，健康養生為主，亦冇刻意「封胸」，最重要角色啱就wellcome，有好嘅劇本及角色就夠：「拍賀歲片開開心心熱熱鬧鬧最好，做人都係要開開心心。」
