74歲李龍基蛇年再做新郎：唔會走王青霞數 「爺孫戀」開花結果揀定金鈪信物丨獨家
發佈時間：07:00 2025-02-03 HKT
2023年尾落實迎娶王青霞（Chris）的李龍基，去年初卻被《星島頭條》踢爆突然玩縮沙，將婚期無限期押後。事隔一年，基哥堅持會履行結婚承諾唔會走數，倒數Chris獲釋日子還有5個月(7月7日出獄)，74歲的李龍基強調一定會做蛇年新郎。情深款款的基哥除了在本月25日舉行的《笑看人生演唱會》中隔空向Chris唱情歌外，更落金鋪揀足金手鈪做定情信物來表達誠意：「等佢對『老公』有返啲信心。」 採訪：方騫平 攝影：譚志光 場地：富麗華珠寶金行
形容跟Chris情比金堅的李龍基，新春期間到深水埗一間金鋪揀金飾，自言要畀少少信心Chris，話佢知：「今年一定找數娶硬佢。」雖然店主力推價值6萬多元嘅「鎮店之寶」流星錘雙囍龍鳳鈪，但基哥卻心儀每隻重4錢多的幼身金鈪，堅持不怕被人笑寒酸，還得戚地解釋：「我哋講心唔講金，而且知道Chris口味，佢比較鍾意簡約嘅長青款式，代表住永恆。」
提獄中「老婆」心痛流淚
基哥本月25日在文化中心開個唱，票房反應熱烈，他透露將會憑歌寄意送上李克勤的《一生不變》及張德蘭嘅《情義兩心堅》畀Chris。每當提到服刑中的Chris，基哥就老淚縱橫，見他多次唉聲歎氣，縱使強忍嗚咽聲，仍谷到雙眼通紅，最後掩面道：「好多次經過河上鄉(羅湖懲教所附近)都好心嗡，我喺出面同朋友聚會風花雪月，佢就一個人喺入面，我乜都做唔到…」基哥強調不會理會假喊評論：「就算話我喺度做喊戲都冇所謂，𠵱家我好少睇網上留言及報道，始終係兩個人之間嘅事，人哋講乜咪由佢囉。」
派定心丸做背後女人
74歲的基哥不再受任何影響做喜歡的事：「適值係雙春兼閏月，而且冇犯太歲，結婚一定會係今年嘅事，到時擺幾圍同親友食飯。」基哥相信Chris出來之後會重新做人：「佢經過反思後知道自己嘅不足，從書信中感受到佢經已戒囂張。其實都係怪我太錫佢，知道佢自尊心強，以前就算佢唔講，但我好精明，好多嘢我都知，一直採取鴕鳥政策，隻眼開隻眼閉，明知佢做得唔啱都冇出聲，亦疏忽咗嚴重性，結果闖出大禍要承受返過錯，𠵱家佢才肯誠實話返我知，所以我同佢講咗『以後唔好怪我唔再縱容你，覺得唔啱會出聲，咁做都係為你好。』而佢出獄後想低調地過啲平靜生活，做我背後嘅女人，我都覺得佢以前太高調唔係太好。」
爆青霞貪他窮願死跟
對於一直不被看好的「爺孫戀」，基哥有話要說，不吐不快：「我有返咁上下年紀，仍難得搵到個真心肯為我付出嘅老伴而高興，以前我唱酒樓，佢會笑咪咪喺台下望住我；我哋會好有情趣咁坐喺沙發上聽英文老歌...喺呢個世界想搵到個欣賞你嘅人唔容易，只要我欣賞佢；佢欣賞我就夠，呢份滿足感只有自己才感受到，好多金銀都未必有咁開心！同佢一齊就算有犧牲都係值得。」另外，上月李龍基在村屋住所內自彈自唱關正傑的歌曲《雪中情》隔空送畀Chris，被發現家居簡陋，兼有歲月痕跡，更全屋雜物，基哥直認只是過住普通人的生活：「我淨身出戶乜都冇帶走，返到香港唯有租屋住，間村屋住咗6年，由新屋畀我住到變舊。」他又爆Chris係貪他窮：「佢知我乜環境㗎，不過，甘願跟住我，外邊人係諗唔到嘅。多年嚟Chris喺我身邊幫咗我好多，會幫我整層架，將模型飛機零件分類放好，𠵱家我懶執屋，將啲嘢亂咁放，屋企變得亂糟糟，試過因為撞到雜物跌親。」
