肥媽經歷痛恨「小三」 嘲諷五索：人格唔係人人有 傳授留住老公絕密心得丨獨家
發佈時間：07:00 2025-02-12 HKT
去年肥媽、黑妹拍住上，以「媽妹」組合開騷賺大錢過肥年。「媽妹」同聲同氣，堅持做人要有道德、講情義，尤其肥媽曾經歷前夫偷食外傭事件，更痛恨「最強小三」。對於富商馬清鏗情婦五索（鍾睿心）高調晒命，肥媽反「讚」五索夠僵：「人格呢啲嘢唔係人人有㗎嘛！最緊要係個男人肯制。」認識馬家全家人的肥媽更強調，過往在馬家派對中從不發現有五索，直言：「佢又唔突出，馬生周圍都有女人啦！呢個又唔係第一個！」講到咁！明就明！ 採訪：方騫平 攝影： 場地：hotel icon the market
肥媽、黑妹同撈同煲，兩人齊齊撈龍蝦菜絲沙律，好講意頭的肥媽說：「撈起撈起，風生水起大吉大利，有名有利。」兩人互相祝賀，肥媽祝黑妹財色兼收；黑妹祝肥媽兒孫滿堂，最緊要是健康。對於去年合體賺大錢，黑妹姐形容是夠生活；肥媽就坦白更正：「點止夠生活呀？舊年真係好OK。」
Rick臨終曾「托孤」
「媽妹」相識多年是生死之交，黑妹最感動是3年疫情令她的流動資金變零時由肥媽出手相助：「全世界知我係一個大使嘅人，仲要養伙記，感恩阿媽拉我返嚟，令我出鏡率多咗。」肥媽感覺到當年黑妹環境不好：「我主動問佢『仲乜無嗱嗱返上內地生活？你係咪等錢使？你要幾多我畀你！』但佢唔肯要，我叫佢返嚟，包佢有嘢做。」其後肥媽老公Rick病重，臨終前「托孤」叮囑黑妹說：「我差唔多㗎喇，我老婆冇咗我好大穫。」故黑妹日日陪住失眠的肥媽，肥媽坦言當時狀態連自己都驚：「突然喺兩個月內唔見咗個20年老伴…」肥媽指老公是排NO 1：「我哋每隔5-6年就結一次婚，因為犯太歲時就要沖喜，好記得第2次喺拉斯維加斯教堂行禮時兩公婆喊爆，真係有下嫁嘅感覺，直至提出結第4次時，佢話好病好攰唔應承我…」
唔認同價值觀
重視婚姻的肥媽藐視「最強小三」五索：「人格呢啲嘢唔係人人有㗎嘛，有啲人可以賣鬼咗佢㗎嘛，冇錯與對！我覺得五索係冇問題，人哋鍾意點做都得，打劫銀行個個都識啦，問題唔夠僵做啫！人哋個膽大個沙煲，有咁嘅條件又有人肯制，咁關我哋乜事啫？」不過，肥媽唯一不認同是價值觀：「𠵱家啲人睇嘢唔一樣，最緊要有新聞，哪怕係醜聞，同埋係會用錢嚟衡量啲嘢，我哋跟唔上亦唔想跟，可能佢嘅幸福係住山頂豪宅，有幾多錢，買幾多個包包，佢自己嘅幸福由佢自己去衡量，但，我覺得如果乜都睇錢，做人有意思咩？𠵱家我哋好開心，幸福係睇到一家人齊全，兒孫滿堂朋友又多，唔使用錢去買朋友，我個幸福同佢嘅幸福標準唔一樣。」
讚大婆好靚女
作為過來人的肥媽堅持做女人是要管住個男人，因為不論有冇錢，大部份男人都身痕，她還有一套教學心得：「第一，先要保住男人個胃，等佢肯返嚟食嘢飲湯；第二，一定要做姣婆，周街都有姣婆，你唔做咪人哋做囉，其實有好多會收埋嚟姣，只不過佢(五索)真係夠僵啫。」肥媽還爆識得馬家全家人，尤其同馬生大哥馬清偉好熟：「馬清鏗老婆係書香世代，大家閨秀係靚㗎。(過往去馬家大派對，有冇留意到五索呢個人？)佢又唔係好突出，唔會知佢係邊個，馬生周圍都有女人啦！呢個又唔係第一個，只不過佢好嘢有幾條煙，而我哋呢啲咁蠢嘅人只識佢老婆！」另外，「媽妹」直言暫時不敢去泰國，肥媽更自揭恐怖經歷：「2016年同黑妹、古淖文、蘇珊去菲律賓一間新酒店登台，全程有保鏢保護，最好奇酒店點解只得菲律賓菜？原來個老外總廚畀人標咗參，嚇到我哋唔敢踏出酒店門口！」
