張繼聰收情人節禮物隔空向謝安琪示愛 : 期待做老夫少妻 笑方力申群組教人book求婚飛機 望對方盡快加入「爸爸會」
發佈時間：23:45 2025-02-14 HKT
張繼聰（阿聰）今晚（14日）情人節出席「相約2.14 飲樂相聚 激爽心聲」，他趁機會即場跟太太謝安琪、外母及媽媽以表愛意，現場並有無人機在夜空上表演，由張繼聰聲音導航。
人生3個重要女性
談到情人節開工，張繼聰笑言特別有意義，由於他現任金像獎董事局成員要參與會議及出席記者會，所以今早已跟太太吃早餐慶祝。他說：「今年我行返啲世俗，同太太行名店買手袋、耳環同戒指，靈性同物慾都要平衡嘛！太太就送咗Labubu公仔畀我，個女都好鍾意Labubu，嗰個公仔好似我戴牛仔帽同衫。」阿聰笑言日常好少公開跟太太示愛，但十年前試過在海旁彈結他唱歌，但認為間中要做這些事件，萬一有事可當作求情信拿出來，亦籍著今次活動跟太太、外母及母親表白。他說：「呢三個人係神聖嘅三角，買嘢畀外母同媽媽我畀錢一件事，呢啲外交關係交返畀太太處理，但太太對老人家日常照顧好好。」提到他大讚太太keep得好，阿聰笑言期待跟太太變成「老夫少妻」，年紀再大自己變成Suger Daddy，希望朝著這個方向進發。
與電影評論版主同是愛電影之人
提到應屆金像獎提名名單，有不少圈中好友入圍角逐獎項。張繼聰坦言今年有很多出色作品，今年他代表演藝人協會加入金像獎，所以需要開會了解過程，亦抱著跟前輩學習辦好金像獎，令他佩服很多同行為舉辦這個盛事去表揚業界。談到他可會加把勁，明年角逐提名。他說：「呢啲年年都加把勁，提名呢啲隨緣囉！」
提到早前電影評論版主睇0.7套賀歲片勁踩賀歲檔電影，令擔演賀歲片《祥賭必贏》的男主角張繼聰，留言表明罷睇該專頁，更開直播回應。張繼聰表示原意不是這樣，也不想網主牽涉討論有負面情緒。他說：「其實我都唔想，都想講句唔好意思！大家都係愛電影之人，希望件事告一段落。網主亦好大方回應返。但呢個行業牽涉好多崗位，好多前輩都話可能今年係最艱難。（網主睇戲後作出負評。）無所謂！網主睇完發表意見係歡迎嘅，我唔係唔可以批評，但可以睇晒先，就算網上有人留言Tag我都會覆返佢。（一時之氣指不看該專頁？）我依家直情乜都唔睇，睇緊劇本。」
大讚方力申是「筍盤」
另外，提到好友方力申（Alex）於社交網公布與女友葉萱婚訊。張繼聰笑指方力申在他心裡面是「筍盤」，亦是認識朋友當中超現實的乖仔。他說：「佢好孝順父母，個人好正直，都好戥佢開心！祝福佢哋，佢哋呢段婚姻好有價值。佢又好搞笑，交代返點樣book飛機同預算，好似想推介返群組嘅人，但我哋全部已婚。但不嬲都知佢係好老公，知佢喜歡小朋友，希望快啲加入我哋『爸爸會』。」
