周嘉洛畀陳瀅報復式喪摑20巴痛到堅喊 《痞子》17分鐘「裸露」戲怕現形狂着打底褲丨獨家
發佈時間：07:00 2025-02-20 HKT
周嘉洛和陳瀅繼《痞子殿下》相隔2年多再合作《痞子無間道》，兩人變得更熟，對戲時直話直說，拗撬反而有增無減，幸好最終無損友誼，陳瀅更有機會20倍奉還上輯嘉洛一摑之仇，被喪摑的嘉洛就痛到堅喊。講到17分鐘「裸露」戲，嘉洛坦承拍時好尷尬，為免重要部位現形，更狂着肉色打底褲遮醜。採訪：杜杜 攝影：林賓尼 髮型:@singglam_ysl@ilcolpogroup 化妝:@makeupvanessa 服裝:@yanyanknits 場地:花圖
嘉洛演粗口爛吞無恥又無賴 「費仁」，他對演這類人有一定把握，而「費仁」既貪錢又爛賭，這方面嘉洛就話一點都唔似，「我知道錢嘅重要性，但係錢唔係最重要。」陳瀅幫口力讚，「嘉洛係我身邊最唔貪嘅人頭3名，好事嚟，佢冇貪念。」嘉洛連日前出席TVB賽馬日，都冇投注碰運氣，「純粹係個人冇賭運，如果畀我鋪鋪贏就瞓身買，好多時朋友贏開我跟買就會輸，同埋有認識嘅人都係衰賭，呢啲位會警惕自己，腳踏實地好過。」
嘉洛為角色專登增磅
靚女陳瀅要演唔沖涼一身臭的「符玲」，她不但唔介意，仲大呼好可愛，「CG做到有啲烏蠅喺我身邊飛嚟飛去幾可愛，好似啲公主有雀仔狗仔伴住。」嘉洛賣晒口乖，「但佢keep到好靚，啲頭髮好順滑，身材又好好，造型又好靚，我成日好辛苦話佢好臭，要勉強做嗰啲反應，其實佢好香想聞多兩啖，呢啲位考演技㗎，好彩我都專業。」不過陳瀅覺得「符玲」另有難演之處，「佢係情緒化嘅女仔，好神經質，對我嚟講好難演，要攞個平衡，如果個角色太過神經質驚會好煩，個平衡好難拿捏。」
嘉洛劇中有17分鐘露肉戲，他笑言無論身材和經驗都跟朱敏瀚冇得比，「我冇佢咁有經驗，亦都冇佢嘅效果，佢係露肉專業戶，佢唔着衫拍攝時間係多過好多TVB甚至香港嘅藝人，我就係sell才華！」劇情交代他是全裸，重要部位後期先遮，拍攝時他做足安全措施，「着咗幾條肉色打底褲，任何形狀都唔想畀人睇到，全部遮晒，係會有啲尷尬，現場都幾多人，同事外仲有啲臨時演員。」嘉洛被陳瀅爆為角色專登增肥，可惜因太辛苦越拍越瘦，搞到唔連戲，「佢係乞人憎角色，我想做到肥嘟嘟咁樣可愛啲，拍呢套嘅身形係前所未有咁肥，我刻意再食多啲，夏天消耗好快特別係拍古裝，每日流成噸汗瘦得好快，但呢場戲見到我啲身材係唔連戲，有啲係3月拍有啲係5月拍，肥啲瘦啲差5、6磅。」
陳瀅曾不想再有合作
《痞子殿下》時，嘉洛因不懂就位，有場戲摑到陳瀅喊，陳瀅自爆今次終可復仇，「我還咗第1季佢打我嗰巴，今次10倍奉還，應該係20倍，我唔係拍一吓，係啪啪啪咁打，嗰場講佢拋棄我，我唔明佢點解咁做就發咗癲，角色有少少神經質我係放晒出嚟，控制唔到，但最後監製係覺得太誇張，冇用到嗰個take，再拍我就冷靜咗，拍完feel到我有啲過份，真係當佢係個公仔咁打。」嘉洛卻大方話，「唔係嘅，我哋喺個戲度，我好OK，嗰場啲眼淚，係因為你打我打到好痛流落嚟，唔關情緒事，幫到我個戲，幾好。」陳瀅仍不好意思，「但係演戲唔使咁大力，未試過咁樣打人。」但陳瀅坦認因對着嘉洛會更放膽打，「如果係朱仔（朱敏瀚），我未必咁夠膽打，可能會溝通咗先，但係我係冇溝通就做咗，如果有人咁打我都會反枱，佢對我包容性係高。」聽到陳瀅這樣講，嘉洛即冧晒，「幫我講埋，呢個女仔非常好。」
兩人早因合演《痞子殿下》成好友，今次溝通方式更直接，反而嗌交更多，嘉洛說：「第1套佢係有傾有講，呢套佢自己諗法多咗，我都多咗自己諗法，最終都有結論，但唔係咁和諧。」陳瀅補充，「呢套劇令我哋成長咗，好似一家人咁冇咁禮讓，永遠對最親嘅人就會直接啲，同埋今次急咗好多冇時間討論，上次係諗好晒先做，今次一定要準時收，呢個係公司新規定。」關係起了變化，陳瀅坦言拍完不想再合作，「拍完嗰陣有個感覺唔想再一齊拍，𠵱家反而想再拍，可能嗰時太多壓力，大家又唔係好和諧，令到我有呢個感覺，因為對厭咗，但過咗2年大家關係keep得好好，大家都成長咗，做演員進步咗同專業咗。」不過她建議改拍時裝，大家冇咁辛苦，嘉洛認為冬天拍更佳，「時裝嘅夏天，香港都好熱，宣傳咪冬天着古裝衫，溫度好舒服，氣氛好和諧，嗰時我好強烈諗幾時開第3輯呢？！」
