細細粒真人索到爆 減肥年半體重唔反彈有妙法 超靚檢查報告踢走負評 丨獨家
發佈時間：07:00 2025-02-21 HKT
39歲的陳嘉佳(細細粒)曾因急性糖尿病入院，健康狀況亮起紅燈，醫生警告暴肥下去，只剩得10年壽命。因此，細細粒自創必瘦減肥法，減肥年半，由最高峰286磅減到𠵱家體重154磅，真人版不獨唔憔悴超索，體重仲Keep得好好冇反彈，而最新驗血報告更顯示「3高」、肝腎功能都非常好，她滿足說：「變靚係其次，最重要係冇咗『十年之說』。」她自爆想當年，糖尿高到令私密部位痕到要搽藥膏止痕，諗起都驚。 採訪：方騫平 攝影：羅安強
去年3月，減肥才半年的細細粒，首次公開超靚嘅體檢報告時激動爆喊，趁住下月13日大驗一周年前夕，細細粒已急不及待做了一個小檢查，報告依然有驚喜：「尿酸、脂肪、血糖、膽固醇、三酸甘油脂都正常，肝腎功能非常好，𠵱家健康晒啦，推翻咗之前醫生講嘅『十年之說！』(壽命)」不過，懂得重視健康的她還嫌未夠詳細，下月會再去做多次更詳細體檢。
索爆真人仲有肉地
對於網民曾指細細粒生圖跟自家圖體態不同，《頭條日報》記者所見，細細粒搣甩130多磅肥膏後，身穿貼身黑色長袖衫的她，雙腿纖瘦，身形比例均勻，雖然肚腩及手臂仲有啲肉地，但精神飽滿狀態唔錯，真人版好索。她表示，現階段體重游走154-165磅內，腰圍經由 54吋減至33.5吋，仲有肚腩及「拜拜肉」。減定咗反而乜都照食，採訪當日她食完最想食的馬拉糕後轉戰日本菜，點了頂級壽生定食、天婦羅蝦及壽喜燒。她又公開維持體重的最佳方法：「早午晚飲3杯咖啡提高代謝，朝早係齋啡，飯後15ML以上蘋果醋加水，維持穩定心臟血糖及血壓，仲會食啲抑制食量嘅益生菌補充品。」
否認剪皮食減肥藥
提到被網民質疑她打減肥針及食減肥藥「助攻」，甚至好奇疑問：「點樣可以減肉又減到皮？」細細粒拆解說：「唔好將減肥妖魔鬼怪化，減肥係為健康，食西藥減就係唔健康，而且我長期喺杭州邊得咁易買到減肥藥？」她又解釋由20歲開始注重食用骨膠原產品，多年來日子有功，所以面上冇皺紋，加上皮膚每28天會有更新期，會自然修復，但坦言：「以前脹到似蘿蔔；瘦咗之後一定會有鬆弛，畀啲時間佢喇，至少唔會係難睇。」被負評攻擊，她聲稱唔會嬲：「打從做藝人開始就有，我心理質素強大，係個快樂寶寶唔會介意人哋點睇。」不過，她從經驗之談悟出減肥大道理，提醒：「如果樣樣都唔食得，咁樣係唔會想減肥，用強迫食嘢方式永遠係失敗嘅。」她強調現階段著重健康多於外表：「以前真係好Crazy，會追住食唔知飽，對食物渴求好高，覺得食慢咗會蝕底；呢年半間活出自己嘅一套生活方式，會保持舒服飲食狀態，中午起身飲杯齋啡，直至夜晚7點就食啲想食嘅嘢，先食菜再慢慢歎…唔想食就停筷子。」她回顧暴肥階段好恐怖：「除咗月事失調冇時準外，血糖更高令私密部位痕到係咁抓，要擠藥膏止痕，𠵱家生理期誤差唔到幾日！」𠵱家細細粒開埋「細細粒健康生活網站」開心分享代言瘦身產品及自家減肥法。問到對身形可感滿意時？她拉起衫展示肩膊位：「天生骨頭係咁粗冇辦法，可以減多30磅全身脂肪比例，不過，純減脂肪就越來越難，唔想勉強虐待自己，所以冇時間表。」
唔介意大肥佬男友
索返晒的細細粒仍保持A0狀態，還自揭瘀事：「內地朋友曾做媒，但個男仔不感興趣，連提出交換微信都冇！我諗有冇拖拍係睇緣份，唔係關乎樣貌身形。」講到揀偶條件，細細粒唯一要求年紀比她大，要成熟型。被問到肥佬又如何？她大笑說：「呢啲冇問題，我會幫佢減肥，因為我知道用乜辦法減會成功。」
