JW嬲豬投訴朱敏瀚態度變差 由拍《痞子無間道》講到旅行勁有火藥味丨獨家
發佈時間：07:00 2025-02-22 HKT
朱敏瀚（朱仔）和JW（王灝兒）2021年首合作《痞子殿下》時，關係好到一度傳出緋聞，想不到2年後再拍《痞子無間道》，竟然變成嗌交多過食飯，朱仔更一度搞到JW喊，這次訪問他們由拍攝講到去旅行，一樣勁有火藥味，搞到要在隔璧訪問的陳瀅和周嘉洛要幫口做和事佬，幸好真朋友冇隔夜仇，有望再合作下輯《痞子》系列。採訪：杜杜 攝影：林賓尼 髮型:Hugo Poon@PRIVATE i salon(JW) 化妝:Chloe Yu(朱仔) 服裝:LE17SEPTEMBRE@Harvey Nichols(朱仔) 場地:花圖
JW為演好大力可愛捕快「高強」，為藝術犧牲 除專登剪短髮仲增埋磅，「特登去增肥，𠵱家套劇出街，為連貫所以我特登去增肥，我除咗細個外冇試過剪短頭髮，真係特登為咗個劇去剪，剪完好肯定塊面會變咗個波，角色傻傻哋又係做阿妹，成個人好似肥嘟嘟，笨笨哋。」朱仔笑着認證她好落力，「佢真係好畀心機去增肥㗎，我見佢食好多嘢，戥佢辛苦！」朱仔演媾女王「慕容恭梓」，作為周嘉洛口中「露肉專業戶」，繼續有晒肌戲，他無奈話：「次次都係冇着衫，我諗觀眾都會睇到厭。」幸好他已搵到好方法來Keep住身材，「基本每日都去做Gym，嘢食就睇吓使唔使除衫先戒到最清，唔係我就咩都食，食好多嘢特別係肉，要除衫就食雞胸肉番薯，所以每次除衫都比上次輕鬆，最辛苦係第1次，因為好驚食多咗。」
講「案發」情況各執一詞
上輯朱仔和JW跟陳瀅和周嘉洛初次合作，已擦出好超強火花，這輯更熟絡反而拗撬更多，朱仔解釋：「大家多咗自己意見，同埋拍攝時間好緊逼，第1輯多啲時間籌備，可以停機慢慢度，今次唔得，一定要跟返rundown，完全唔可以over，有個無形壓力，加上第2輯大家都想進步，令大家會緊張啲。」早前記者會朱仔主動自首搞喊了JW，重提「案發」情況，兩人各執一詞甚有火藥味，朱仔說：「有個位我要踎低，導演要拍2 shot，佢就企咗喺度，我話『2 shot你落嚟啦』，個態度唔好嘅。」JW強調：「呢個先係問題，你態度係唔好！」朱仔澄清：「係直接，唔係唔好，係態度直接！」JW有火說：「係態度直接得嚟唔好。」朱仔再澄清：「態度冇以前咁好！」JW𤷪𤺧謂：「算啦！佢講得唔啱，拍嗰時佢踎咗喺度夾住咗張凳，我企咗喺隔籬諗緊咩位置拍好啲，佢話『你咪踎落嚟呢度囉』，好明顯態度唔係咁好，唔係咁客氣啦！」朱仔搶着講自己版本，「我已經喺固定位置，唔能夠上去，梗係郁得嗰個落嚟啦，呢啲咁簡單嘅嘢！」JW火再大，「我絕對認同我要落嚟，啱呀！但你記得我係第2次拍正劇㗎呵？！你都可以好客氣咁講，『你落嚟踎低喺呢度』。」見JW咁大火，朱仔即打圓場，「我承認拍第2輯過程，係冇第1輯咁nice，對所有人都係，因為第1輯我個人物角色係nice啲，第2輯係唔nice，我喺片場就會keep住喺嗰個狀態， 呢個係我平時做法。」JW都認同朱仔可能太投入角色，「佢對人衰或者唔客氣，因為喺個角色入面，唔緊要啦！」
急搵陳瀅周嘉洛撲火
兩人雖然事後已傾返沒記仇，但講到早前朱仔跟陳瀅和周嘉洛去日本旅行，JW再扯火，指他們沒有心預她同行，「我本身係同朋友去咗日本，但係佢哋3個plan咗去日本冇同我講，臨飛前佢哋先話畀我知佢哋去日本，我話唔該晒，多謝你哋嘅資訊喎，thank you！」朱仔無奈解釋早在通訊群組講，但JW認為只是出發前幾日，非搵她一齊計劃，朱仔再解釋有諗到解決方案，「知道佢會去日本，我哋有叫佢落嚟嘅，我同嘉洛仲話請埋佢機票𠻹！」JW堅持話聽唔到這番話，朱仔即求救隔壁同樣訪問中的陳瀅和周嘉洛，大叫他們幫口，「我哋係咪有講過，請佢搭飛機落嚟？」幸好陳瀅幫拖承認，但JW仍未消氣：「太遲啦！好似啲人結婚，臨結婚前一個禮拜先問，睇吓你嚟唔嚟啦！」問到平日是否真的「3人行」沒預她？JW呷醋謂：「偏多囉，冇辦法啦，哈哈！」朱仔完全投晒降，「𠵱家先第1單訪問咋，好辛苦！」他們承認由於拍攝時關係變差，想過不再有下次合作，朱仔說：「拍緊時覺得好似差唔多，唔好再開啦！但過咗一排又覺得可以喎，《痞子》呢個系列可以長做長有，希望今次個反應好！」
