壽包VS壽桃？中秋做節酒樓送壽桃食客嬲爆投訴經理「對老人家講個壽包上得」網民：原來有分別！

更新時間：16:35 2024-09-05
發佈時間：16:35 2024-09-05

「壽包」、「壽桃」大不同？大時大節做節食飯，不少酒樓都會奉送壽桃包，不過近日就有食客趁中秋與家人到酒樓做節，因酒樓經理一句被惹怒：「佢不斷對老人家講『個壽包上得』！」事主將不快經歷發佈網上分享，更怒指：「以後唔X幫襯！」不少網民表示恍然大悟，留言指：「而家先知兩者有分別！」

壽包VS壽桃？中秋做節酒樓經理上壽包惹怒食客

最近有網民於Threads發文分享做節時遇到的不快經歷，日前與家中長輩到酒樓食飯，點了奉送壽桃包的套餐，但是卻因經理一個舉動感到不滿：「個經理不斷講『壽包壽包』，我哋不斷更正講『壽桃壽桃』。到最後都不斷對老人家講『個壽包上得！』」嬲爆指不再光顧該間酒樓：「頂佢個X，以後唔X幫襯！」

「壽包」、「壽桃」大不同網民：原來有分別！

原來「壽包」、「壽桃」的意思有極大分別，「壽桃」是蟠桃形狀，內餡一般都是蓮蓉或豆沙，用於壽宴上、慶祝生日之用；至於「壽包」則是粉紅外皮的白麵包，包上印有紅色「福」字，「壽包」都是用於祭祀和喪事之時，在解穢酒時為參與白事之人祈壽。雖然只差一個字，但兩者意思差得遠，因此事主對經理稱「上壽包」而感到不吉利。

事主經歷引起網民熱議，不少人表示「長知識」：「我真係唔知原來壽包同壽桃意義有分別」、「大鑊，我過往咁多年都係叫佢做壽包，我阿婆都係咁叫……」有人指認為現今已「百無禁忌」，不少人都未必知道兩者有分別：「咩年代，介意啲小事」、「睇完留言知道原來咁多人唔識分，咁經理唔識分都有可能。」、「好多人唔知典故，見係祝壽，又見係包，又見佢桃形，咪叫壽桃包。」

不過亦有不少撐樓主，認為「大吉利是」：「我都試過！我提完個侍應係壽桃，佢都仲係繼續講壽包⋯…最後我忍唔住爆佢：白事先會食壽包㗎！佢先即刻笠水。」、、「我明白你感受，而家香港酒樓啲人亂咁講嘢。」、「唔ok!!! 做呢行都唔識分更加不能接受!!」、「身為飲食業的經理，竟然不知壽桃和壽包的分別……」亦有人分享自己經歷：「有一次成家人去酒樓食飯，有啲食物食唔哂，個侍應竟然講『我幫你打包呀！』我即場想鬧佢，其實係唔係已經無人知咩係『打包』？打包係指『醫院職員將屍體用床單包好處理』」、

來源：Threads