記得「投資」樂悠咭|曾智華
發佈時間:17:09 2024-07-22
![記得「投資」樂悠咭|曾智華](https://image.hkhl.hk/f/1024p0/0x0/100/none/c2b4c7c871eb6dbeaa9fadfd916a100c/2024-07/20240208_fin_quote_2.jpg)
根據非官方調查,《星島日報》有極多成年人讀者,而本欄因不時提供退休投資貼士,故此有不少「老友記」熟客。今期小弟並非叫你買乜或唔好買乜,而係肉緊提醒大家——快快快行動,否則到8月底就冇得做「兩蚊雞族」㗎喇。
查實有關當局早於幾年前大聲疾呼,由2024年8月底開始,65歲以上長者不可以再用長者八達通得到「兩蚊雞」優惠。
原因簡單,過去N年長者八達通被無數人濫用,要捉必須花費龐大行政資源。點搞?一於推實名制,一人一張有埋相片,以後借畀人用或者用別人的,全部犯法。
小弟早早響應呼籲,於兩年前已搞掂「樂悠咭」,都唔知幾好用,當埋「長者卡」周圍有折扣。不過我雖然反應快,但原來大量老友記過去幾年仍大安旨意,唔殺到埋身就「懶懶閒」,反正長者八達通仍可日日「嘟」,冇問題就費事麻煩去換。
搞搞吓唔少人已忘記原來「死線」(deadline)已到,再唔行動將會自動脫離兩蚊雞一族。幾位有心人上周分別提出要求:「碌Sir,你老友記讀者特別多,唔該做吓好心,幫手發功啦。」
11萬長者尚未申請「樂悠咭」
點解佢哋咁心急?原來到上月底,仍有11萬名65歲以上長者未申請「樂悠咭」。若果佢哋7月28日前再唔行動,咁8月25號開始,就冇兩蚊雞搭車優惠啦。
記錄顯示,以上11萬人中,大部分是80歲以上長者,可能住護老院,也可能從不看新聞時事,希望照顧者幫吓手,提醒又或者替佢哋申請,此乃一項必須做的「投資」(用上時間!)。
相信交通機構及八達通甚至政府都好着緊,試想想,若然8月25日當日,有數萬計長者搭公共交通工具時,先至發覺冇咗兩蚊優惠,到時會點?一定會產生好多怨忿及爭拗,咁就無謂產生社會大矛盾啦。
小弟再提提大家,「樂悠咭」申請表格可於八達通網站下載,亦可在任何港鐵站客戶服務中心及眾多政府辦事處索取,方便到不得了,大家實在再無藉口話「唔知」或「麻煩」。
作為負責任市民,自己都要做好本分,7月28日前交form啦。
資深傳媒人 曾智華