「靚股」易賣「喳股」難賣｜曾智華
發佈時間：06:00 2024-10-29
《星島日報》逢周一特別抵睇，除了附送資料甚勁的《投資王》外，B疊（財經及地產版）更加料登出頗多值得一讀的專欄。小弟尤其喜歡「包租大王」湯文亮在《地產論壇》刊出的專欄，因佢經常用日常例子去比喻投資，相當貼地又過癮，他上周一《「靚樓」難買易賣「喳樓」易買難賣》一文，講到「追女仔/飛女仔/買賣樓論」，抵死得來又非常到肉。
筆者睇後不禁會心微笑，其實老湯的理論，不止可以應用在投資物業，而是幾乎所有金融產品皆適用。
佢由阿媽教仔開始，中學時湯伯母見阿仔開始發育，對女仔發生興趣，慢慢主動出擊追女仔，立即拉佢過兩招：「阿仔記住，追女仔一定要追靚女，雖然難度好高，兼且分分鐘成身汗得個吉。不過追到後，你會發現一大優勢，正是追錯咗想甩好容易，因靚女大把人要；相反，若你一開始就但求就手追個質素差的醜女，咁就喎河，因到你想飛佢時就慘啦，邊個肯接受！」
老湯用這個追女仔理論引證買物業，必定要選優質中上層，人人想買的一類，幾艱難都唔使怕，因只有買貴冇買錯。一旦想「飛」間樓時，大把人排隊爭；相反，你平買間「二樓對垃圾房」的劣質樓，想甩時真係搵鬼要。
貪平買股 低處未算低
這個理論，股票投資者一定會會心微笑，因股市有2,000幾隻股票，大部分是「爛樓」。呢類「樓」可以平到得人驚，每股只值幾仙，如果你一時傻吓傻吓貪平買入，咁就真係祝你好運啦。因為垃圾股的價值，絕對低處未算低，你想沽？真係好難搵下個傻瓜接㗎。
相反，你買優質藍籌股，當然可能幾十到過百元一股，但好處是，任何時候你想「飛佢」、「甩佢」、「撇佢」（湯文亮用詞）絕對唔使擔心，因為當你呢秒決定非、甩、撇時，下一秒已即時有人肯接，真正可以做到無縫咁犀利㗎。
本欄從不會鼓勵讀者貪平買「爛樓」，要買必定是升值能力強，最少肯定保本收息的「靚單位」，例如中電控股（002）、港鐵公司（066）及港交所（388）等。
同一個價錢你會選擇擁有十間爛樓，還是一間靚樓？已可見到你的投資智慧。
資深傳媒人 曾智華
相關文章：
趁市旺執倉 清貨換馬6大原則 「一定要有決心 見到唔掂就要清倉」｜林本利
港若跟美按息升「供平過租」恐又將消失 後市還看租金走勢及人口流動｜李聲揚
港股成交金額縮小 郭Sir籲觀望為妙 大市形態反覆欲試底｜郭思治
