再搭港交所順風車｜曾智華
發佈時間：06:00 2025-02-18 HKT
時光飛逝，本欄《智豬在握》已面世20周年，究竟可有為你增加財富或蝕到甩褲呢？唔知！但大家一定知，有隻股，若你這幾年跟足小弟指示，應遠遠跑贏大市，就係香港交易所（388）。
你毋須翻閱太遠的稿，單單過去3年已足夠。我再三強調一條買賣港交所而收穫極豐厚的簡單方程式──280元買第一注；跌破260元買第二注；跌破240元買第三注；跌破220元就手頭有多少現金或股票都賣晒瞓身落去！
政府政策「特別照顧」
筆者絕非亂炒亂買，一切有理論基礎。港交所乃一間被特別照顧的上市公司。「特別照顧」因政府政策指定佢獨家經營，不准有任何直接或間接競爭，所有證券交易，一律要經港交所，即硬性規定要俾佢「過水濕腳」。
這種優待，這種眷顧，試問2,000幾間上市公司中，那一間有此特權？冇！一間都冇！你揸嘢佢賺，你沽嘢佢又賺，總之有成交，港交所就賺，越大成交佢越多賺。
咪睇香港股市在過去兩年好似呆呆滯滯，其實只要郁一郁，又或有風聲北京出政策，即時就會大炒特炒，短則幾日，長則以月計，此時港交所股價就會戲劇性飆升。本欄在去年9月正正公布，小弟9個月內賺了3轉港交所。
於文章刊出後，此股竟又落到240元，筆者當然又入貨（不知你可有照做？）。神奇的是只經過7個交易日，又再升至379元，搵夠「落車」！
等到1月13日，又到上車價277元，筆者隨即入500股坐坐順風車。又是話都冇咁快，過了不足20個交易日，到上周四高見340元。我當然不會賺盡，就在325元落車，每股賺了50元，總共2.5萬元。
港股隨時炒到寧德上市
港交所可會短期再回落到280元以下？難料。但睇走勢，香港股市應仍有段時間反覆上升，起碼直至寧德時代來港上市。
此股上市可能帶起一次瘋狂IPO，既然萬眾矚目，大戶當然做旺個市迎接，此時各方人馬都不會容許恒指落入低潮！
資深傳媒人 曾智華
相關文章：
獅王發威重返16年前高位 到底滙控在升甚麼？ 李聲揚：早在DeepSeek爆紅前已強勢
