趁牛尾拋垃圾股｜曾智華
發佈時間：07:00 2025-03-04 HKT
恒指由1年前的16000多點，升到24000點附近，升咗7,000多點，是否令人如痴如醉，開始失卻警覺性？
近日收得最多的提問為——有乜可以再入？睇升到幾多？各位你估我係神仙咩，小弟一切分析，皆只用常識推斷。本欄過去20年再三強調——What goes up, must come down。股票如是、樓市如是，人生的好景也如是。
股市充斥垃圾公司
恒指升咗7,000幾點，早有牛市味道，理財班學生頻頻問，應點部署？
有此一問，因各人在未識我前，個個皆典型散戶。即係乜？即係「股市盲俠」，亂鬼咁買，毫無知識與常識就入市。例如見到仙股以為平就買；見到財經演員（其實是上市公司宣傳大員）推介又買；見到網上人人談論（其實是微信女合唱團）又買；最傻的，連見到「中國」或「科技」兩字，也會以為正嘢又買。
買買買而從不深究揸到成手係的股票，公司究竟做乜，市場前景如何，董事局管理層是否「奸人當道」？總之十問九不知！
小弟大膽的講句，香港2,000幾間上市公司中，超過一半乃垃圾公司，股票是垃圾股票（絕對歡迎對號入座！），根本由零開始就不應持有。
假若懵懵地買咗，唯一途徑，快快快甩掉，希望蝕少啲執返身彩。不過你想甩掉垃圾股，機會不常有，因可能「鑑平鑑賤」出貨，掛牌都冇人吼。
咁幾時會有機會呢？正是牛市尾聲之前，通常實力股升到咁上下，不少股市盲俠以為升乃「永恆」的，開始乜都買，咁就會出現雞犬皆升情況，連垃圾股都有機會坐上直升機。
集中研究「鐵股」搵食
此時成手爛貨者，必須當機立斷，不問價位，有人肯接就立即「斷捨離」，將倉內所有垃圾股掃走，然後再輕身上路，學下只集中研究及投資3至5隻「鐵股」。
乜叫鐵股？唔識唔明，搵返我過去1至2年的專欄推介啦，肯定冇死錯人兼賺到變肥仔。簡簡單單一隻港交所（388），已賺完又賺。有此鐵股，你為乜再吼垃圾股？
資深傳媒人 曾智華
相關文章：
港股生猛 按年狂升9000點 樓市又何時見底回升？ 李聲揚：現水平已有不少實力投資者願意入市
