美關稅戰終極目的是甚麼？ 投資恐遇漫長波動市｜晉佳
發佈時間：17:36 2025-04-16 HKT
美國展開關稅戰決心之大，反映美國想透過關稅戰而達到終極目的：削減財赤、捍衛美債，以解決美國眼前最大嘅弱點。不過，美國政府率先開出天價關稅，談判立場強硬，有決心亦要付出代價，美國經濟能否避過一輪經濟衰退實在難以預測。
未來數月陷衰退預期之中
雖然美國將關稅延遲90日生效，但市場亦要時間觀察關稅生效後對於經濟嘅影響，令美股未來幾個月陷於衰退預期之中，就算再樂觀，經濟冇陷入衰退，股市中短期仍好難表現得理想。
點解美國突然正視美債問題？美國2025年財赤預算1.89萬億美元，相當於2024年美國GDP嘅6.5%，數字相比舊年GDP升幅1.46萬億美元更多。適逢共和黨掌握參眾兩院話事權，於是正視美債問題，狠下心削減財赤，避免美債規模失控上升。
假如缺少關稅，美國政府靠增加效率、5年削減國務開支3,000億美元，仍需要減息嚟削減美債利息開支，就要賠上通脹代價。雖然減息嚟削赤最有效，但關稅係即時收錢嘅方式，立桿見影，但美國政府選擇以呢個以一敵眾嘅極端方式進行，同樣會催生通脹。去到有一日，關稅悉數反映喺物價之上，再之後進行減息，財赤、美債就重新進入可控水平，呢個就係美國政府嘅盤算。
散戶策略宜盡量簡化
預期一段時間內，美國與各國嘅談判拉鋸比預期漫長，好壞消息此起彼落。除咗特朗普團隊之外，冇人有水晶球能預測邊個時候有乜嘢消息，將心比己，當大部分投資者都冇能力預測面前狀況，於是市場一時盡反映壞消息，一時盡反映好消息，舞高弄低，股市維持偏高波幅。
作為一個小散戶，最簡單而有效嘅方式就係當壞消息出得夠、市場夠恐慌，就嘗試分段低吸博反彈，等到彈為止；好消息出到咁上下就考慮做淡，等到跌為止，過程中好好控制注碼。面對越複雜嘅市況，將策略盡量簡化便行。
晉佳
https://www.patreon.com/user?u=28525578
相關文章：
投資靠「抄功課」 損手與人無尤 克服人性弱點 李聲揚：別高估自己應分散投資
Coldplay震撼全場 惟Cityline負視角成敗筆 | 梁偉聰
