屯門單車位新年突發「大掃除」！逾期停泊變「單車墳場」 網民撐德政：區區都有唔該清多啲
發佈時間：14:35 2025-01-28 HKT
屯門單車位新年大掃除？屯門輕鐵站附近一個本來泊滿單車的大型單車泊位，近日被網民發現疑有政府部門現身執法，利用貨櫃車將場內大部分逾期停泊的單車清走，只見現場僅兩部單車「有得留低」。今次行動獲網民支持，稱該處長期有大批已生鏽或無人認領的單車，形容是「德政」，清空後可以讓真正有需要的人士使用，也有市民留言指上水、元朗一帶亦有「單車墳場」的情況出現，希望政府部門可以一同處理。
屯門單車位新年「大掃除」！ 逾期停泊變「單車墳場」
日前，有網民在社交平台「屯門公路塞車關注組」表示：「屯門站嘅車友，你哋嘅愛驅已被轉移到安全地方」。據樓主上傳的照片所見，屯門輕鐵站附近一個大型單車停泊位已經被清空，附近有一輛貨車，內部已被多輛單車塞滿，亦有警員在場維持秩序，相信是相關政府部門執法，清走逾期擺放的單車。
網民撐「清得好」：真正想泊既人想泊都冇位泊
對於今次不少單車位「大掃除」，不少網民都表示支持，認為該處長期擺放大量舊單車，令真正有需要人士無法使用，「有去過呢度都知有八成以上單車都係甩頭甩骨棄用單車，真正想泊既人想泊都冇位泊，清得好丫，唔明點解咁多人反對清理棄車？」、「長期泊係度，生晒銹都唔扔，終於處理」；亦有人表示單車泊位規定只可泊24小時，逾期清空實為合理做法，「單車泊位只准泊24小時，提前通知也不移走這樣責任自然自負」。
與此同時，有網民藉此機會指出其實香港多區都有相同情況，如東涌、大圍、元朗等，希望政府部門處理，「加油清咁d棄置單車，區區大把單車墳場」。
此外，亦有網民表示清空後，單車反而容易被人偷走，「其實清唔清都係咁，清左你擺又比人偷野，唔清又阻住哂」、「我泊屋企樓下，泊一部被偷一部，偷咗3部，唔係貴野都偷，反而呢度咁多都無事，奇怪」。
據運輸署文件顯示，當局已於1月22日張貼通告有關杯渡路近輕鐵屯門站的單車泊車處清理行動：「為配合清理行動，由2025年1月22日上午9時至2025年1月24日下午5時，杯渡路近輕鐵屯門站的單車泊車處將暫停使用」，期間存放在該單車泊車處的單車及其他物品將會全被移走，當局亦強調已預先在單車泊車處張貼通告，提醒市民須在停用期前取回停放在單車泊車處的所有物品。惟有網民不滿張貼通告期限太短，「而家出通告兩日就清車真係黐線」、「得兩日通告又過份左少少， 起碼都一星期」。
文：LW
同場加映：藍田巴士總站忽然紅爆小紅書？昔日空氣質素最差車站1原因成打卡新熱點！內地網民大讚：太藝術了吧
