政府燒烤場重開｜嚴選20個靚景方便隱蔽BBQ場呢幾個最就腳、大量爐位

更新時間：23:24 2022-10-28
發佈時間：23:24 2022-10-28

政府剛剛宣佈政府轄下燒烤場於下周起 (11月3日) 重開，等了將近3年的香港人，終於可以好好享受BBQ，明正言順去郊外舒展，想起可以一班朋友齊齊「燒雞翼，我最鍾意食」就興奮。久違郊野BBQ，就即為大家搜羅全港各大由政府管理的燒烤場，原來BBQ場有兩種：漁護署場地及康文署場地，原來漁護署場地位於郊野公園，而位於沙灘旁的就由康文署管轄，兩種BBQ場總數多達二百個，即刻跟大家嚴選20個熱門燒烤場看看哪個最值得去！

嚴選20個熱門燒烤場

靚景推介︰

大美督燒烤區
用家意見：「呢個算唔算燒烤場始祖？就算唔係最耐都一定係最多人聯想得到嘅好地，有海景有得泊車又有得租單車，冇得輸。」
美景指數︰*****
燒烤爐數目︰大量
方便程度︰*****
總分︰*****

（資料圖片）

大網仔燒烤區
用家意見：「坐西貢巴士經過大網仔一帶，成日都見到好多靚景燒烤爐，大部分都係望海，連隻雞翼都會特別好食，點可以唔打卡。」
美景指數︰*****
燒烤爐數目︰沿途有多號場地，中量
方便程度︰*****
總分︰*****

石澳泳灘燒烤區
用家意見：「夏天好多人去游水嘅石澳灘，有小巴、巴士仲有得泊車，而且又係海景，洗手間設置齊，最緊要係冬天相對少咗人，最啱燒烤。」
風景︰*****
燒烤爐數目︰中至少量
方便程度︰*****
總分︰*****

清水灣第一灣泳灘燒烤場
用家意見：「清水灣第二灘有車位，或者坐巴士去又得，不過燒烤就要行返去一號灘，但相對而言人潮就冇咁多，幾舒服。沙灘燒嘢食聽住海浪聲，心情特別好。」
風景︰*****
燒烤爐數目︰中至少量
方便程度︰****
總分︰****

南灣泳灘燒烤場
用家意見：「南灣係一個風景優美嘅泳灘，最緊要係冇淺水灣同赤柱咁多人，識游一定係揀南灣。所以燒烤場一樣係比較少人用，燒烤爐19個，應該唔會太多人爭。」
風景︰*****
燒烤爐數目︰中至少量
方便程度︰***
總分︰****

大棠燒烤區
用家意見：「紅葉季節就快到，有咩好得過係去完BBQ又可以行埋山睇紅葉先，不過要留意一件事，紅葉季節期間，大棠山道有半條都會封路，事情就唔會兩全其美，至於非紅葉季節嘅話，部車就可以泊上燒烤區附近，行去BBQ場一分鐘都唔使。」
風景︰*****
燒烤爐數目︰中量
方便程度︰****
總分︰*****

交通方便推介︰

黃石燒烤區
用家意見：「一程巴士94或者96R坐到尾站，雖然大家會覺得好似有啲遠，但係……真係好靚，又真係算方便，其實預咗BBQ都去玩一日，點解唔揀呢個場呢？」
風景︰*****
燒烤爐數目︰大量
方便程度︰*****
總分︰*****

北潭涌燒烤區
用家意見：「北潭涌亦是另一個有巴士、小巴、泊位嘅場地，而且真係有大量燒烤爐，入閘之後的傷建樂園燒烤場也是可選擇的場地，而呢一帶總數係有六個有編號的場，所以只要肯入去，基本上都唔難搵爐。」
風景︰***
燒烤爐數目︰大量
方便程度︰*****
總分︰****

（資料圖片）

鶴藪燒烤區
用家意見：「由粉嶺坐小巴直入就會到達鶴藪水塘附近，燒烤場全部在馬路旁邊，唔用「直達」呢兩個字真係講唔通。」
風景︰***
燒烤爐數目︰中至大量
方便程度︰****
總分︰****

駕車人士推介︰

涌背燒烤區
用家意見：「係，有車真係大晒㗎，因為你去到一啲其他人要好轉拆先到達嘅燒烤場，當中在新娘潭路邊嘅涌背燒烤場及營地，好多發燒友鍾意開車去，由於其他的交通工具比較難到達，班次又唔多，所以就轉咗係自駕人士的燒烤樂園。」
風景︰***
燒烤爐數目︰中量
方便程度︰***** (開車計)
總分︰****

大坑墩燒烤區
用家意見：「大坑墩燒烤區係香港最熱門的放風箏地點，即係大坳門所在地，個草坡靚到爆，而一般人要去係好麻煩，落巴士或小巴後要沿清水灣道行入去，但開車的話就可以直接泊入去，不過要留意，車位好少，要爭嘅!!!」
風景︰*****
燒烤爐數目︰中量
方便程度︰***** (開車計)
總分︰*****

城門燒烤區

用家意見：「城門水塘燒烤區亦好似係專程方便自駕人士而設咁，因為唔開車去的話，從小巴站真係要行上斜路再入去，當然，有好多行山人士唔介意，但BBQ要攞住咁重嘅美食就最好開車吧。」
風景︰****
燒烤爐數目︰中至大量
方便程度︰**** (開車計)
總分︰****