救護車出動遇阻滯 將軍澳富寧花園保安拒開閘與街坊爆衝突 女保安已停職|Juicy叮
發佈時間:11:21 2023-07-22
![救護車出動遇阻滯 將軍澳屋苑保安疑拒開閘 街坊睇唔過眼爆衝突](https://image.hkhl.hk/f/1024p0/0x0/100/none/9733c67f4da387dcec0e7a18c828d93c/2023-07/20230722_news_Ambulance_ch.png)
救人如救火,應爭分奪秒。將軍澳一屋苑的保安日前卻懷疑拒開閘,反而要求救護車兜路進入,在場看不過眼的街坊勸籲保安員開閘時,雙方一度爆發口角,雙方粗口橫飛。網民看在眼裏不禁搖頭嘆息,批評「真係唔識執生」、「應該要開嘅門唔開,世界級管理!」;另有人記仇地指「呢個女管理員態度好很差!」,估計「佢新年就知報應」。
事發於本月19日,事件引起當區區議員關注,事後更在fb附上管業處就事件的回應。本身為富寧花園居民的區議員陳耀初回覆《星島頭條》查詢時表示,日前跟管業處溝通時,管業處認為兩位保安員(特別是女保安員)表現不符合公司要求,會將今次事件在人事檔案作記錄。而管業處職員今日(22日)中午過後向《星島頭條》證實,涉事的女保安員已被停職。
街坊與保安員口角逐格睇 + 網民搖頭嘆息回應↓↓↓↓
事發於坑口富寧花園。樓主在社交網站facebook專頁「家繫富寧 Home@FuNing」上載長約55秒的口角片段時,講述事件詳情:
樓主:救護員落車抬擔架前去
「今日(19日)大概(晚上)10點,我返到近將軍澳醫院閘口,見到一輛救護車停泊喺附近,救護員要求保安開閘,保安員(片中男人)詢問控制室,控制室要求救護員兜坑口村迴旋處入,救護員表示迴旋處塞車會阻礙救人時間,控制室保安(片中女人),竟然要求救護員行入去,仲講咗句:4座咁近,行入去啦。我同另一位街坊睇唔順眼要求保安開閘,救護員同時以行路方式抬住擔架去4座。控制室保安出嚟之後,我哋一路要求開閘,竟然畀佢用粗口問候。如果消防閘連救護車都唔用得,唔知幾時先可以用呢……」。
區議員引述管業處回應
事發後,當區(富藍區)區議員陳耀初前去視察,並拍照指「......管業處已經更換咗把鎖,相信佢哋都知道呢個係一個隱憂。至於昨晚(19日)嘅事管業處有冇咩睇法,將來會點處理,會唔會有清楚指引,我已經聯絡咗佢哋,等緊回覆」;陳耀初接著於21日深夜發帖,上載管業處就事件的有關回應——
「有關前晚(19日)有住戶同保安因為開閘畀救護車問題爭執嘅事,我今日(21日)同管業處傾咗陣,報告如下:
•管業處確認從來都冇話唔可以開醫院呢邊嘅鐵閘,事實上(根據管業處講)以往亦有為緊急車輛開過
•管業處已經訓示所有保安人員,要為緊急車輛開閘
•管業處認為鐵閘需要上鎖,因為以往曾經有人嘗試私自打開鐵閘。管業處解釋每一個保安身上都有全屋苑鎖頭嘅鎖匙,所以唔存在「要花時間搵鎖匙」嘅問題
•之前把鎖個樣係舊啲,但係開到嘅,管業處亦已經換咗一把新嘅
•管業處亦在鐵閘外面(向街方向)貼咗新嘅顯眼告示,等緊急車輛知道可以 call 24 小時保安室要求開閘
•管業處認為當晚涉事保安態度欠佳,不符公司要求。所以除咗口頭訓示之外,亦會根據公司內部人事程序跟進,作出正式記錄
我記得嘅係咁多,已經盡量準確記錄管業處嘅回應。大家有問題或者建議亦可以呢度講,管業處會有人睇到」。
網民回應:真係唔識執生
網民看過街坊與保安員的口角短片後,批評「呢個女管理員態度好很差慨嘆「開個閘都咁難㗎」,並提到一系列的安全情況:
•「黃金時間救命喎,救遲咗有咩不測邊個負責,無論係咩原因都唔應該叫救護車去另一入囗。個保安主管直情離晒譜」;
•「救人如救火,火警會唔會叫消防車走返出迴旋處先,真係唔識執生」;
•「救人係應該拿拿聲開門,話晒呢邊又近醫院,遲一分鐘分分鐘有生命危險」;
•「其實應該靈活處理,唔好死古古要經過幾關先開到門,鎖匙放喺門口看更度,有關於生命危險要即刻開門,又方便唔使通知保安,跟著先再行過嚟開門」。
另有街坊指,「多謝街坊拍片讓我們知道管業處的保安可以有幾離譜」,還有人提到「唔係第一次,上次又係咁,我叫佢開閘畀救護車入,佢話呢個閘唔開得,反應冷淡,好似完全唔關佢事咁」。其他網民回應請瀏覽上圖↑↑↑↑。
街坊與保安員口角錄節:
......
男街坊:喂,我同你講,你X我老尾
女保安:我X你咩,我X佢(同事)咋麻
男保安:唉,佢話我啫,唔好理
男街坊:你咁X惡
無入鏡男街坊:好啦,好啦,算啦
男街坊:你咁X惡㗎,X你老尾
女保安:(向拍片人講)你唔使影相呀......
無入鏡男街坊:好啦,聽日去投訴佢
男保安:唔好嘈啦
......
無入鏡男街坊:呢度唔係一定死㗎,一定生㗎
男街坊:呢度你話開唔X到,得,冇X問題㗎
無入鏡男街坊:一定要生㗎
......
無入鏡男街坊:嗰邊塞車呀
男街坊:咁X惡,你真係好X嘢呀真係,我住咁X耐,都未見過咁X惡嘅實Q
無入鏡男街坊:呢度一定要生呀,唔好死呀吓
富寧花園1990年落成
富寧花園屬私人參建居屋,1990年落成,位於將軍澳坑口以北,位處坑口村及將軍澳醫院之間,是坑口區內首個落成的屋苑。
救護車相關新聞:
移英港人呻醫療服務效率慢 家人跌倒苦等救護車4句鐘
![移英港人呻醫療服務效率慢 家人跌倒苦等救護車4句鐘 移英港人呻醫療服務效率慢 家人跌倒苦等救護車4句鐘](https://image.hkhl.hk/f/1024p0/0x0/100/none/ffe31901c7b2849664461476b8517665/2023-07/noname23.png)
西環3救護員無懼風雨擔遮助病人上車獲網民大讚
女子沖涼時「口部入水」call白車救護員「啞口無言」
—————
《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ