獨生子謀住兩老層樓 揚言唔留唔裝香 網民眼火爆：父母唔稀罕你枝香｜Juicy叮
發佈時間：08:14 2023-10-20
有港男早前在網上「香港討論區」以「層樓留唔留畀我？一個答案係咪咁難？」為題發帖，向網民查問「你哋會唔會同仔女講遺產留唔留畀佢？」。結果被網民大肆教訓「省到立立令」，提醒「好仔不論爺田地，好女不論嫁妝衣」。
獨生子謀住層樓留言逐張睇↓↓↓↓
樓主：留就一個字 唔留就兩個字
樓主在帖文中稱「層樓留唔留畀我？留就一個字，唔留就兩個字，一個答案係咪真係咁難？
我係獨生，但我好肯定唔打算有下一代，所以我係個家族最後一代，如果畀我繼承我第時或者多多少少會執下個家啲手尾，過時過節嚟裝下香咁。
如果你情願玩逆按或套現Fing晒佢都唔留畀我，呢個家族就真係全劇終！我乜都唔會理！
想問下你哋會唔會同仔女講遺產留唔留畀佢？」。
獨生子謀住父母層樓 網民教訓式回應↓↓↓↓
樓主打開天窗說亮話，回應的網民也講得直接：
•「未到最後一刻都唔會講，親生仔不如近身錢」、
•「正常應該係咁，除非獨生子女真係太衰」、
•「如果得一個子女，應該唔駛講都係留返畀佢，除非個子女太衰，可能就有其他想法」、
•「一直唔講實，就係想畀機會你表現自己，如果到最後堅係唔留，咁都係你一手造成，係你唔值得擁有他們畢生努力嘅成果」、
•「普通人家的獨生子女理論上唔洗爭產，平時做好自己本份，自食其力，孝順父母，其他嘢唔洗諗咁多」、
•「問你一句！一句講晒你有冇供養父母？唔係每個月畀幾百一千就算，真係供養起碼每月畀5千」、
•「父母在生要好好好佢哋，要供養，過時過節要送禮，要陪佢地睇醫生，要聽佢地講心事，你做到幾多？乜都唔做，淨想要樓？」。
獨生子謀住父母層樓 網民教訓式回應↓↓↓↓
網民：冇錢就要逆按 唔通餓死
對於逆按，網民有這樣想法，「正常應該要咁做，如果唔係無飯開」、「冇錢生活都要去逆按㗎啦，唔通餓死」、「咁又係喎，如果佢得返層樓，又無生活費，唯有做逆按揭」、「無錢生活就要做逆按啦！」、「我都係喺網上睇啲消息見有人咁，佢話佢個仔好爛賭爭落人哋好多錢，冇錢畀佢，佢又冇晒錢生活唯有咁做」。
另有人指出「見有啲人有咁情況，就算佢而家有一間唔使供嘅樓，但係佢冇晒錢經濟生活開支都有問題，除非獨仔個個月畀家用養佢，如果唔係佢唯有變賣間樓或者做逆按揭做生活費囉」。
有部分網民更指，有為人父母的老早決定不給子女留遺產——「都有見過有父母立平安紙扣除殮葬費用，全數捐出」、「聽人講過，有個人死後捐晒畀教會，不留給子女」、「我識得有人是捐了給教會」。
網民教訓樓主：你父母唔稀罕你枝香
由於有網民嗅到爭產味，在言談間教訓樓主：
•「睇到你嘅post，我理解你父母」、
•「如果你咁講，我係你阿爸都唔會留畀你」、
•「樓主，你兩老會唔會諗，生舊叉燒好過呢？」、
•「問得出呢D問題嘅，人品有幾好？留畀你？睇怕難啦」、
•「第時直接海葬或者紀念花園，再唔係葬沙嶺，唔稀罕你枝香」、
•「果真孝子也，有錢有得傾，無錢話之你瞓天橋底，完全唔關我事，極品之中，真係大開我哋三觀！」、
•「樓主有咁諗法，已經知你有幾廢。老人家就係驚D仔女廢，自己無錢過下半世，先想留返間屋畀自己住到終老，有乜事都可以套現，到兩腳一伸，都唔知現世發生乜事，你唔去上香，who care（誰人在乎）？ 大把case（個案）間屋一轉名，就趕兩老出門口」、
於是有人力勸樓主「靠自己吧」、「好仔不問爺田地」、「好仔不論爺田地，好女不論嫁妝衣」。
一家唔知一家事相關新聞：
獲父蔭250萬資助買樓唔心足？ 港女眼紅已婚阿哥住父母大屋
老人交代銀行密碼爆爭議 孫女伺候數日無動靜 偷拍片揭後續超心寒......
與父母同住阿哥家姐唔畀家用 獨居港女：黐飲黐食就老馮......
—————
《星島頭條》APP經已推出最新版本，請立即更新，瀏覽更精彩內容：https://bit.ly/3yLrg
