美女黨？兩女九龍城撩司機搭順風車 3男藏身街角疑不軌 事主爆後續｜Juicy叮
發佈時間：10:46 2024-12-30
美女黨出沒？有司機分享近日在九龍城被兩名女子，兜搭要求坐順風車，其後在車cam片發現，有3名男子緊隨其後藏身街角，疑似有不軌企圖，引發網民熱議。
事主在「車cam L（香港群組）」FB專頁分享這段「細思極恐」的經歷，與及後續發展如下：
美女黨？兩女九龍城撩司機搭順風車 3男藏身街角疑不軌 事主爆後續：↓↓↓↓
事發在本月（12月）21日下午約3時，事主強調「我唔係的士」，他駕私家車駛至九龍城衙前圍道及南角道交界，停車等轉燈時，有兩名女子突然走至，其中一人手拿一盒飯盒。
事主較下車窗，車cam片錄到當時的對話，兩名女子操流利廣東話，向司機表示：「先生，唔好意思，我哋有啲趕時間，可唔可以車我去荔枝角啊。」另一名女子亦幫口：「啱啱做完嘢收工，趕時間返荔枝角。」
事主聞言回覆：「我依家都好趕時間喎。」即時間接拒絕，但兩名女子仍不放棄，以微嗲聲線繼續「死螺」：「唔該啊，幫吓忙啊，唔該啊！」「唔該啊...」但事主不為所動，再次強調：「我都好趕時間啊，唔好意思啊！」女子這時知難而退，臨走前亦有禮貌地表示：「唔該晒！」
同場加映：港男羅湖遭「美女黨」糾纏實拍全過程 請飲嘢後出事：「佢拉住我唔畀我走！」↓↓↓↓
從車cam片看到，兩女子走近事主汽車時，側旁有3名男子跑近私家車，似在伺機而動。當兩名女子撩搭順風車失敗時，即跑向該3名男子，其中一名男子手指向前方，似有「新目標」，兩女子即急急沿方向跑去。
帖文引發網民熱烈迴響，不少人懷疑兩女與「跟尾」三男有不軌企圖：「件事唔簡單，後面三個佬跟到實。」「跟尾嗰3個男人，離遠觀察，以為可以上車先快步過嚟，賊！」有網民甚至聯想到深圳90年代六魔女色誘殺司機的舊聞。
網民疑新騙局：同地點「成日有人想黐車坐」
有網民又指該地點最近頻頻出現有人兜搭想「搭風車」的情況：「有啲人話呢個位成日有人想黐車坐，咁係咪成日都係呢班人？」
事主在回應網民留言時表示，當時無留意有三名男子隨後，有網民指如事主答應讓兩女搭順風車，「三條佬跟住上車」，事主亦認同這情況「可能」會發生。
不少人替事主暗捏一把汗：「你咁大膽唔識都開車窗講野，唔怕佢地噴你（迷暈）煙？」「後面仲有三條仔跟尾，上咗車容咗你都未知咩事啦。」「最大機會上咗之後畀人脅持又或者屈司機非禮吖，然後勒索。」
「5條友的士費都慳，不過可能上咗車有第2個故仔。」「可能係新騙局，大家小心。」
同場加映：廟街揼骨驚見女技師「咁做」呃錢 4大陰招內地男矇查查被劏 事主：買了見識！：↓↓↓↓
