波子提買回家即變「腐屍」港女疑生果檔偷龍轉鳳店家對質時大爆金句｜Juicy叮

更新時間：11:45 2025-02-15 HKT
發佈時間：11:26 2025-02-15 HKT

有港女前日（13日）在油塘一街市花93元買購買靚波子提，回家晚飯後卻發現原本靚靚的提子「全部凍到熟咗」，似「腐屍」，懷疑磅秤時遭偷龍轉鳳。為討回公道，昨日（14日）到涉事生果檔與職員對質，結果對方大爆金句反駁，樓主於是把錄音和相片一同放到網上讓網民評理。

港女疑生果檔偷龍轉鳳逐張睇＋網民不齒↓↓↓↓

樓主：阿姐背住我磅提子

樓主前日晚上在facebook群組「油塘人之家」發第一道帖文，大呻「買海鮮會俾人偷龍轉鳳，我就聽得多，原來買生果都會，今日真係踩中蕉皮」，當中提到「阿姐攞去磅嘅時候，背脊對住我，當時我都有少少覺得奇怪（完全冇俾我望到個磅係幾重）」，接著指「今次我好肯定自己唔係唔好彩，係俾人掉咗包」，帖文全文見下圖↓↓↓↓

樓主第一道帖文。fb「油塘人之家」截圖

生果檔阿姐爆金句：明買明賣

到昨日，樓主為自己討公道後再發第二道帖文，上載當面與生果檔阿姐對質的錄音和相片。對質對間，得來對方的「明買明賣」金句，帖文全文見下圖↓↓↓↓，錄音全記錄也見下文↓↓↓↓

樓主第二道帖文。fb「油塘人之家」截圖

樓主上載的錄音長約1分23秒，內容如下——

樓主：「2025年2月14日下午6點09分，我去街市搵阿姐對質，阿姐係咁樣講嘅：

阿姐：阿妹你要咩呀？
樓主：唔係呀，我想問下呢，我尋日呢，買呢隻提子呢，$38磅吖嘛。
阿姐：係呀。
樓主：點解返到去呢，我揀嗰時好靚㗎嘛，點解返到去呢，全部變到熟曬嘅。
阿姐：你攞咗嘢囉。
樓主：有咩可能呀？我尋日乜都冇拎喎，就係咁樣攞住包提子咋喎
阿姐：咁我又唔係好清楚你。
樓主：返到去全部熟曬喎。
阿姐：你自己有睇㗎哦。
樓主：我就係信咗你，俾你攞去磅囉，跟住你磅完之後攞個紅袋裝住俾我，我就走；熟曬，凍到好似腐屍咁樣，超市嗰啲廿蚊都買到啦，你有乜可能收我93蚊賣包咁嘅提子俾我呀？
阿姐：哎呀，咁你點呀？明買明賣㗎嘛哦，我擺開賣㗎呀嘛。
樓主：唔怪得網上個個都話你啲生果有問題啦，你都承認呢。
阿姐：唉，我自己都擺開埋㗎。
樓主：你攞去秤吖嘛，你秤完之後攞紅袋裝住俾我吖嘛，咁我咪俾錢你囉，我俾錢後，返到去擺雪櫃呀嘛，我當時冇孭餸呀，淨係孭你袋提子咋阿姐，咁樣做生意，搵多啲啦你」。