學生大呻學校旅行去「冇火龍果嘅火龍果園」 場地似廢墟又「無嘢玩」引熱議
發佈時間：00:50 2022-12-19
小時候非常期待學校旅行，小學時更為旅行而「失眠」，每年的學校旅行就更為學生時期的美好回憶。不過，有學生則在網上發文指，學校旅行未能前往主題樂園等地點，只可以到「冇火龍果嘅火龍果園」，又批評場地似廢墟，相關言論隨即引起熱議。
學校旅行無得去主題學園
該名學生日前向Instagram專頁「名校Secrets」投稿，指學校旅行的目的地為火龍果園，但指自己對農田沒有興趣，而且不滿「其他學校都可以去主題樂園，得我哋去呢啲地方」。在眾人登上旅遊巴後，導遊表示由於現時並非火龍果的季節，因此在到埗後看不到火龍果。樓主直言，聞言後感到「滿頭問號」，並心想「冇火龍果叫乜火龍果園」。
場地污糟似廢墟
樓主續指，在到達目的地後的第一個活動是整茶果，但批評「場地非常污糟，好似個廢墟咁，而且啲茶果材料好污糟，整完之後都冇人想食」，又隨後跟隨導遊參觀其他植物，但現場「勁多昆蟲同糞便，當時真係勁想快啲走！」樓主又提到，由於通告上列出會一共會參觀兩個地點，因此原本以為可到其他地方拍照，但指「點知最後學校懶得去，直接叫我哋喺嗰個廢墟嗰度等成一至兩個鐘」。
樓主又大呻「嗰度又收唔到Wi-Fi，又冇嘢玩，淨係喺度呆等，簡直係浪費時間囉！」樓主續指，「真係唔知學校係窮，唔畀我哋去主題樂園定係點」，並直言「人哋個個去學校旅行都有好多好好嘅回憶，我哋就係啲差嘅回憶，完全唔知我哋學校發生咩事」。
網民：「咁似長者一日遊嘅」
相關帖文隨即引起熱議，有人表示，「已經好好㗎喇，我今年last year 陸運會同畢業旅行都冇」、「超級慘」、「以前都話去保良局渡假村旅行，依家啲學校旅行越搞越不倫不類」、「唔洗上堂已經好好」。有人則笑言，「咁似長者一日遊嘅，請問樓主讀邊間老人院」、「你哋以為火龍果園啫實質係火龍果完」等。
點擊圖片瀏覽網民回應：
另有人則支持校方的安排，並指「支持一吓本地農業啦。你大個仲會約人去主題公園，但唔會無啦啦去呢啲地方」、「幾好丫，親近下大自然，又無Wi-Fi大家可有多啲傾偈互動」、「去迪士尼幾時去都得，呢啲機會唔係成日有」、「上網成癮啦你。農地係農夫嘅生財工具畀你話係廢墟，好好體驗吓啦。去主題樂園都無咩好回憶，你第時都會去百幾次，中學去過都好快忘記」、「你成世人幾何會去接觸到整茶果，又嫌污糟，又話冇Wi-Fi，你去打機定旅行」、「學校送你哋去農場就係唔想你哋用電話，要你用心感受一下農場一日嘅生活。雖然火龍果園冇火龍果又真係有啲好笑，但起碼依家你有個難忘嘅回憶。到時一班同學再相聚食飯嘅時候，提起呢件事嘅時候，我肯定你哋都只會笑下就算架啦」等。
帖文來源：「名校Secrets」
《頭條日報》授權轉載
