小一100日同學心聲│中華基督教會全完第一小學辦小一百日宴 小一生各司其職家長眼淚缺堤
發佈時間：07:15 2024-12-16
九月份升讀中華基督教會全完第一小學小一的同學可說最幸福，因為中華基督教會全完第一小學剛於九月搬了新校舍，面積達5,800平方米。同學仔差不多個個都說「學校啲醬」好好味，結果要集齊五位同學仔「口供」，才搞得懂他們口中的「醬」是甚麼一回事。
同學仔問題：
- 最期待上咩堂？
- 最friend同學叫咩名？
- 學校飯盒好食嗎？
小一郭子瑩：視藝畫咗Jellyfish
1.返小一好開心，我最喜歡視藝堂，啱啱學咗畫海洋世界，我畫咗魚呀、龜呀，仲有jellyfish！
2.我最好嘅朋友就係佢（指着身旁的黎浠宜），我哋玩包剪揼識，小息我會陪佢玩呼拉圈，有時一齊睇風景。
3.媽媽每日拎飯畀我食，最鍾意佢煮菜，因為我鍾意綠色。
小一何謙和：投入學習手鐘
1.校逢星期四有「周四課外活動」，好多活動參加，我入咗武術，依家先練習動作（咁你鍾意體育堂？）我鍾意音樂堂，因為可以玩樂器，星期一有手鐘班，手鐘有太多嘢，書包裝唔晒，唔可以拎返屋企，所以每次上堂我都好……（期待）係係係。
2.郭銘淳就係我好朋友！因為大家都係班長，佢係我好拍檔，仲有黎浠宜，我哋會分工合作，有時都要叫同學靜啲，或者同學唔識寫個字，我就教吓佢。（幫到人好開心？）係。
3.食飯呢，有啲醬有粟米，好食，因為媽媽唔會咁樣煮。（粟米肉粒飯？）唔係。
小一歐祉瑤：飯盒嘅茄汁好食
1.最喜歡數學堂，之前學咗立體圖，啱啱學完雙位加減數，學識進位、借位！
2.Hailey（黎浠宜）。我哋會去睇動物，不過我只夠膽睇龜，蜥蜴有少少驚。 （Hailey陪你就唔驚啦？）係。
3.嘩，飯盒嘅茄汁好好食！（最喜歡有茄汁嘅菜？）唔係！（個飯有茄汁？）唔係，我都鍾意食牛肉（咁係茄汁牛肉飯？）唔係。
小一郭銘淳：釋破粟米汁之謎
1.我都鍾意視藝，但鍾意做手工多啲，熊貓BB出世，老師教我哋用紙整咗隻熊貓，好得意。
2.有兩個好朋友，梓英和天樂。有一日，我問可以做朋友？咁就做咗朋友；會一齊去圖書館睇書，上次借咗《屁屁偵探》。
3.幼稚園只有九個同學一齊食飯，依家同25個同學一齊食飯好有趣，但係好靜，要專心食飯。（你係咪又鍾意粟米汁）我鍾意茄汁和薑。（點解你哋全部都提到番茄和粟米？）小食餐！會有燒賣、魚蛋、麵包、雞髀仲有粟米汁（仲有茄汁？）無茄汁 —— 究竟茄汁係點嚟！
小一黎浠宜：破解茄汁的疑問
1.我喜歡睇英文書，特別喜歡英文堂，我有上Cambridge，所以依家有啲生字都學過。
2（你有好多朋友呀）嘻嘻，祉瑤都係我好朋友，我鍾意去操場睇大家玩呼拉圈，因為我啱啱開始學，未玩得好好，但跳繩就OK。
3.依家係食飯盒，但下個月屋企人會拎飯畀我。我都鍾意小食餐呀，有時係麵包，多數係漢堡包（粟米汁係咩？）唔係粟米汁，係一粒粒粟米（嘩，終於明啦，咁點解大家又話有茄汁呢？）茄汁係通粉同埋有菜（即係番茄通粉又有菜） 菜係混合番茄，撈埋一齊食。
中華基督教會全完第一小學譚光德校長 好好享受一年級
全完第一的「小一百日宴」有一個重頭節目，就是同學親自奉茶給家長，每年這個「特備節目」一出，家長都會眼淚缺堤。「奉茶是中國傳統文化，藉此令小朋友明白孝順和尊重。今年會較特別，我們早前買了些茉莉花種植，同學都有幫忙，之後我們會曬乾，再於今年『小一百日宴』沖沏茉莉茶來奉茶。」譚校長說小一100日跟同學出生的100日意義相同，從幼稚園到小學已經是一個里程碑，活動正好讓家長看到孩子這100日的學習成果。「小一同學會在整個活動各司其職，比如司儀、唱英文或普通話歌、跳舞、朗誦等，家長通常都不置信孩子已成長了那麼多。」不過譚校長笑言，雖然經常叮囑同學不要太快告訢家長自己負責甚麼，不過很快就「穿煲」。「返到屋企就忍不了告訴家長。」
對於小一同學仔，譚校長衷心希望他們好好享受這一學年的生活，努力適應。「小一是最無憂無慮，當越升越高班，少不免有各種壓力，所以今個學年他們在新校舍先享受小學生活。」因應新
校舍設計，譚校長說每當「自由午息」都鼓勵同學到操場進行各種體育活動，因為從課室踏入操場，簡單的體育用品如籃球、乒乓球、跳繩、呼拉圈等就在地上或掛在牆壁，任同學使用。
文：劉佩樺 圖：鄭慧盈、受訪學校提供
相關文章︳小一100日同學心聲︳聖公會油塘基顯小學小一生最關心「食」 校長向小一生送上三個字
相關文章︳升中派位2025│2025/26升中攻略 一文整合18題Q & A：點知Banding？
相關文章︳升中派位2025︳吳永雄校長分析：甚麼是「成績次第」？何謂「自殺式填表」？面試4個大忌要戒
