小一100日同學心聲│小一啟蒙禮播「成長片段」感動家長 將軍澳循道衛理小學校長：孩子適應力比想像強
發佈時間：07:15 2024-12-17
小一100日同學心聲│將軍澳循道衛理小學的同學仔，可說最殺人措手不及，一個說「早就見過你！」，一個又說「你唔係嚟教書咩？」，最厲害「你識我哋校長 ！」，然後有兩個發現包包上的公仔，反問「响邊度買？」、「係咪媽媽買畀你？」 —— 我都好想有媽媽買！
同學仔問題：
- 最期待上咩堂？
- 最friend同學叫咩名？
- 學校飯盒好食嗎？
小一張思言：我識Anson Lo
1.最鍾意上音樂堂，第一堂學識唱校歌，好好聽，平時無乜聽歌，不過我識Anson Lo，因為响電視睇過佢唱歌跳舞，（你都好想好似佢咁唱歌跳舞？）係！我可唔可以呀？（你都可以 ）——
後來才知道，思言好想參加學校的「將循大舞台」，不知小神徒踏上了舞台沒有？
2.講三個得唔得？張浩誠、朱芷嫣和馮倩儀，因為我哋四個都係班長，經常一齊出動。
3.响學校食飯食得好快，試過快過老師 ！因為上咗咁多堂已經好肚餓，最期待「小食餐」，有燒賣、魚蛋同好多嘢，無飯但有個包包或通粉，每次食晒都好飽。
小一張曦雯：白飯好好食
1.鍾意唱歌，所以上音樂堂好開心，最近學識《小小的宇宙》（基督教詩歌）。
2.識咗好多新朋友，卓昕、葉影君和施希彤，係第一次放小息時一齊散步、一齊傾偈，跟住就做咗好朋友。
3.飯盒好食呀，我今日食第二個，都試過食第一個。（咩叫食第一個？）即係食飯時老師會檢查飯，我第一個食完囉！（哦）飯盒啲白飯好好食，（學校同屋企啲白飯有咩唔同？）因為有菜嘅味道！
小一洪卓昕：學識用油粉彩畫畫
1.如果只可以揀一科最喜歡，我揀視藝；首先，有個視藝室，入到去好大好大，幼稚園只係用木顏色畫畫，我啱啱學識用油粉彩畫長頸鹿，嘩，真係好靚！
2.所有女同學都係我嘅好朋友，特別係曦雯，因為第一日返學佢
坐我隔離，佢問我可唔可以做朋友，嘻嘻。
3.我食飯都好快，曦雯食第一個我就係第二個，因為學校啲飯有汁。
小一李玥晞：小食餐係至愛
1.星期一嘅英文堂係最鍾意，可以用iPad上堂。
2.好朋友係曾卓欣，我哋讀同一間幼稚園，但嚟到小學至識。我哋响「Joyful Friday」一齊去玩英文遊戲，仲睇咗《玩轉腦朋友》 —— 姐姐，原來學校有電影睇！
3.最鍾意食糯米雞，（小食餐？）係，仲會有燒賣（開始七嘴八舌想數仲有咩小食，但數來數去都係燒賣），每次媽媽訂餐我都會睇有無小食餐！（笑）
小一廖雋睿：識咗個女同學
1.返小一最開心係可以踩單車，體育課仲嘗試打網球，我接到波呀！
2.我識咗個女同學叫黃雪嫣，老師將我哋編埋一組，我哋小息時會去教員室搵班主任拎座右銘卡，要做好一啲任務至會有。
3.我係媽媽送飯嘅，最鍾意佢整飯糰、烏冬，（咁你想唔想食佢哋啲飯盒？）唔想。
將軍澳循道衛理小學林德育校長 小一是人生之啟蒙
將軍澳循道衛理小學會為小一同學慶祝滿月，舉行「小一啟蒙禮」，當中會有宗教意味的燃點燭光，也有牧師分享與祈禱。「意思是學生來到小學這30天學到上帝的說話、做人道理和不同的知識，就像人生啟蒙的開始，在慶祝同時也希望同學對學校更有歸宿感，往後更投入校園生活。」人生啟蒙，誠為寶貴，學校除了會送上小禮物，又會在活動中播放同學這30天課堂上的照片，往往家長都深受感動。
對於小一同學，林校長給他們兩個字：進步。「進步即N加1，希望同學在心裏記住：我現在是小一，會有六年時間在這所小學，只要每天能進步一點點，到六年級時就非常好了。」至於家長，林校長不諱言請他們放手，也給孩子時間慢慢成長。「有些事情他們真的懂，綁鞋帶、去廁所、吃飯都不用擔心，學校氛圍向來輕鬆舒坦，師兄師姐、老師照顧周到，事實小朋友學習能力比我們快，請對他們有信心。」
文：劉佩樺 圖：鄭慧盈、受訪學校提供
相關文章︳小一100日同學心聲│中華基督教會全完第一小學辦小一百日宴 小一生各司其職家長眼淚缺堤
相關文章︳小一100日同學心聲︳聖公會油塘基顯小學小一生最關心「食」 校長向小一生送上三個字
相關文章︳升中派位2025│2025/26升中攻略 一文整合18題Q & A：點知Banding？
相關文章︳升中派位2025︳吳永雄校長分析：甚麼是「成績次第」？何謂「自殺式填表」？面試4個大忌要戒
