小一100日同學心聲│嶺南大學香港同學會小學予孩子「身份認同」 小一生：「原來咁多人食飯好唔同」
發佈時間：07:15 2024-12-18
小一100日同學心聲│踏入嶺南大學香港同學會小學校園時適逢小息，見同學們除了談天，竟然還有做功課！問同學仔點解做功課？「做咗返屋企唔使做」，同埋有人話小息好忙，一定要傾偈，因為「上堂唔可以傾偈」，真乖。
同學仔問題：
- 最期待上咩堂？
- 最friend同學叫咩名？
- 學校飯盒好食嗎？
小一殷栢晞：一齊食飯好特別
1.視藝，因為我真係好鍾意畫畫，學校仲搞咗個畫展（「文藝復興畫展」）畀我哋，有好多名畫睇！
2.我有好多朋友 ！（現場所見，個個都栢晞前栢晞後）要揀一個就傲兒。
3.平時係工人姐姐送飯，原來咁多人一齊食飯係好唔同平時。
小一何卓潼：轉12個呼拉圈
1.體育課，因為特別鍾意游水，已經學識四式，差不多每日都去練習。（怪不得你有個泳鏡印）噚日至游完，因為明天有學界比賽，我好攰啊！（盡力就ok）知道！
2.殷栢晞！我哋同班，佢係好開心嘅，最鍾意一齊去操場玩呼拉圈，我可以轉到12個。（同時？）同時！
3.學校飯盒都好食，無乜所謂食咩餸，飽就得啦！
小一黎天譽：無飯嗰餐最好味
1.最期待上常識堂，因為可以學到唔同嘅知識，我好留意太空，最近就睇緊一本《To Jupiter and Beyond》嘅太空書。
2.我個好朋友係何晞蕊，唔知點解成日返學都遇到佢，於是就識咗佢，跟住發現大家都係讀一年班，我哋成日去學校個公（花）園仔睇花。
3.（你喜歡食學校嘅飯？）我最喜歡食個餐係無飯嘅！有次，食咗個餐係熱狗，又飽又好味，可以响學校食到熱狗，好有趣。我食過一次咋！
小一陳昭穎：借書似返番幼稚園
1.最鍾意星期三嘅英文課，老師會帶我哋去圖書館借書，幼稚園時都有得借書，依家又有，好好。
2 同江洛儀坐同一班校車，我主動問佢「你係邊個？」，點知又係同一班，返學可以傾偈，放學又可以傾偈。其實我哋仲鍾意去操場買零食，有款蔬菜薯條乾乾哋又凍凍哋，好味道。（點樣凍凍哋？）因為小食部有雪櫃。
3.今個月有pizza食，希望下個月都有！
小一陳梓朗：我最鍾意上堂
1.體育堂最好，踢波、打籃球、羽毛球、跑步都鍾意，我跑得好快！又鍾意中文堂，可以學到好多中文字，我鍾意睇中文書。（最近睇咗咩書？）唔知。
2.識咗個朋友叫Phraell，小息時同佢一齊玩、食嘢。其實我最鍾意課室，小學嘅課室比幼稚園大好多，只要响課室就可以上堂，上堂就可以學嘢。（今日學咗咩嘢？）唔知。
3.日日都喜歡食學校飯，試過有菠蘿，酸酸哋，我鍾意酸味。（係咪咕嚕肉？）唔知。
小一黃祉燊：難忘第一日食牛肉飯
1.電腦堂，因為鍾意學電腦知識，自己好喜歡科學和動物。（當日手執National Geographic讀物介紹給我）。
2 栢晞，我同栢晞、何卓潼一齊坐校車，柏晞個人好細（細粒），好得意。
3.喜歡飯盒嘅雞扒、豬扒，最記得第一日响學校食飯，媽媽幫我訂咗最喜歡嘅牛肉飯，一打開盒飯就有牛肉，我嗰日特別開心呀！
嶺南大學香港同學會小學吳曉靈校長 與家長同行
為了讓孩子更容易適應小學生活，吳校長說整個小一學年都為同學「慶祝」。「由他們踏入學校開始，就會告訴他們已是小學生，給予他們身份認同。」學校也花心思在分班方面保留幼稚園模式。「每班是一位正班主任、三位副班主任，當中一位是外籍老師，師生比例似幼稚園（1比10），課堂上亦分組而坐，讓孩子感到仍像處身幼稚園般。」學校沒有特定的慶祝儀式，只因「慶祝」對象在家長身上。「學校着重家校合作，早於八月小一適應周時，爸媽也要來上課，九月份正式開學，首個星期也邀請爸媽來做義工，跟孩子一起過小息，每次場面很溫馨，親子不期然抱抱、吃茶點，同時讓他們意識到自己已是小學生的家長，要放心將孩子交給老師。」
常說孩子有無限潛能，嶺小亦為小一生作出長遠規劃。「早於適應課時，已請來教育心理學家團隊，於學生上課時觀察，開學後再來，如果有需要就會於10月份再訪校，為所有小一生撰寫一份多元智能發展報告，然後在家長日送給家長，這就是學校給每位小一同學的第一份禮物，讓家長掌握孩子的各項發展，並跟班主任商量如何協助孩子長遠適切發展。」吳校長寄語小一同學最重要是享受小學生活。「未來六年跟老師和同學好好相處，建立友誼，學習良好社交，因為懂得社交已能學懂很多不同範疇的能力。」
文：劉佩樺 圖：鄭慧盈、受訪學校提供
相關文章︳小一100日同學心聲︳聖公會油塘基顯小學小一生最關心「食」 校長向小一生送上三個字
相關文章︳小一100日同學心聲│小一啟蒙禮播「成長片段」感動家長 將軍澳循道衛理小學校長：孩子適應力比想像強
相關文章︳小一100日同學心聲│中華基督教會全完第一小學辦小一百日宴 小一生各司其職家長眼淚缺堤
