小朋友話你知農曆新年最想做的是…「過年唔好講讀書」、孝順仔想「幫嫲嫲買腸粉」︳親子熱話

小孩心聲︳農曆新年快到，讓孩子最開心的相信莫過於逗利是、吃各式各樣的賀年美食。是次走訪了秀明小學及亞斯理衞理小學，集合12位同學的心聲。童言童語固然讓人不禁會心微笑，當中有不少同學提及自己親友，彰顯了家人在他們心目中的重要地位。家長們也來了解一下孩子對農曆新年的看法和願望，共同享受這個充滿喜慶與團圓氛圍的節日。

同學仔問題：

1. 過年最期待做啲乜？
2. 點用利是錢？最想收到咩款式嘅利是封？
3. 最鍾意食嘅賀年食品？

同學仔吳柏希：去日本旅行

去日本旅行！已經去過兩次，有好多嘢玩，而且嗰度嘅playhouse感覺乾淨啲，試過喺香港嘅playhouse見到地下濕晒，有灘黃色嘅液體，好嘔心！氹氹轉、跳彈床、搖搖板⋯⋯我都鍾意玩，特別有個圓形嘅喺中間會砰砰砰，彈下彈下，仲可以喺上面跳，香港好少見。新年仲會同堂家姐拜年，我都好期待，因為佢哋會畀錢我，咁樣就可以用啲錢去日本玩，已經儲咗三年，最想收到Spider Man嘅利是封。（賀年食品呢？）髮菜，我最鍾意食菜同魚。（知唔知髮菜有咩寓意？）食完可以令我生多啲頭髮！（食髮菜係寓意發財啊！）

同學仔蔣沅錡：過年唔好講讀書

梗係逗利是啦！咁樣就可以儲起啲錢入銀行，通常會儲起一半，爸爸媽媽、學校老師自細已經教我分清楚想要同需要。而我比較鍾意印有祝福字句的利是封，如健健康康、平平安安，代表着長輩畀我哋嘅祝福。最掛住表哥表姐，一年可能只係見到幾次，而且我哋年紀差唔多，一齊玩好開心。（長輩會問你成績嗎？）過年最好講啲開心嘢，唔好再講關於學習上嘅嘢啦！ 

同學仔鄧琋殷：收到自己有份整嘅利是封

過年可以同公公、婆婆，仲有叔公、姑婆食團年飯，好熱鬧。佢哋用嘅利是封係媽媽親手整嘅，我同爸爸都有份幫手㗎！可以從長輩手上收返自己整嘅利是封，特別有意義，但灑金粉嗰陣好容易整到一地都係，要好小心。上年學校薦我參加繪本創作，我就揀咗棉花糖為題材，因為我好鍾意食甜嘢，例如年糕、糖蓮藕，都係我「至愛」嘅賀年食品。仲用利是錢將作品印制成實體書，放喺學校圖書館畀其他同學仔借閱，令我覺得好自豪！ 

同學仔林詩詩：用利是錢買文具

最期待拜年！因為有啲親戚朋友住喺國內、澳門，唔係成日見，但新年嗰陣就可以聚埋一齊，然後逗利是。媽媽無特別要求我將利是錢交畀佢，所以我會將利是放喺枕頭底，過完年再一封封咁拆。我會將部分錢用嚟買筆記簿、文具，亦會同（鄧）琋殷一樣，用利是錢買返自己創作嘅繪本。另外當然唔少得食啦，百力滋、梳打餅，比較健康之餘又可以同家人、朋友分享，一齊食特別滋味！（但呢啲唔係賀年食品喎！）

同學仔張茜晴：同媽媽一齊「入貨」

拜年，順便逗埋利是，以及同親朋戚友敘舊，如婆婆、嫲嫲。佢哋會問我一啲近況或者成績。（會唔會反感？）畢竟佢哋係長輩，出於關心啫，我會用委婉嘅方式回答或盡快轉移話題。到於利是錢，我會主動畀媽媽幫我保管，咁樣買嘢前佢可以畀到適當嘅建議。同時會拎一部分出嚟做善事，幫助有需要嘅人，將長輩嘅祝福傳遞出去。另外，我都非常期待每年同媽媽一齊「入貨」，準備全盒，特別鍾意糖冬瓜、糖蓮藕、糖蓮子等帶點甜味嘅小食。

同學仔鍾安晉：幫嫲嫲買腸粉

探嫲嫲！始終佢年紀都大啦，不止新年，暑假都會返清遠鄉下探佢、照顧佢。佢行動唔係咁方便，平時只可以煮粥食，但我喺度就可以踩單車去買腸粉畀佢食。雖然要搭幾個鐘車，但我唔覺得辛苦，可以見到嫲嫲係一件好開心嘅事！

同學仔黃梓珊：食最愛的瓜子

鍾意同屋企人玩集體遊戲，特別係同家姐一齊玩五子棋，因為成日都係我贏，我有時都想讓佢㗎，但我行到邊佢跟到邊⋯⋯（無奈的表情）。而且多數過年先玩，平時放學返屋企都要趕住做功課、溫書，無時間玩。過年會到婆婆屋企拜年，可以見到好耐好耐冇見嘅親朋戚友，如表姐、表妹、哥哥⋯⋯一齊玩。今年學校整咗小賣部，可以用利是錢買，最抵係紫菜，五蚊有兩包，魚蛋燒賣嗰啲我驚太飽，無胃口食午飯。（學校午餐好食嗎？）好食，最鍾意食D餐，有通心粉、烏冬、燒賣、粟米，同埋米線。新年可以食瓜子、黑瓜子、紅瓜子⋯⋯只要係瓜子我都鍾意食，仲有蜜糖炸雞、薯條，但我天生就唔鍾意食漢堡包，我都唔知點解。

同學仔鄭竣暉：一家人一齊玩

過年可以收利是，又熱鬧，最開心係可以同家人、朋友一齊玩桌遊，大富翁、飛行棋⋯⋯卡通人物如Pokémon，同傳統款式嘅利是封我都鍾意，福字代表長輩對我哋嘅祝福、全家人平平安安。利是錢全部都會畀媽媽儲起，如果依家用咗，之後有鍾意嘅嘢都買唔到。（咁你過年會食咩？）瓜子、年糕、蘿蔔糕⋯⋯最鍾意黑瓜子，因為佢甜甜地又鹹鹹地，好特別！ 

同學仔麥浩龍：返國內放鞭炮、煙花

與表弟表妹見面，因為佢哋喺國內生活，只有放長假先有機會見面。新年返到去可以同佢哋一齊放鞭炮、煙花，依啲平時喺香港都唔做得。細個嗰陣比較「為食」，拜年見到唔同食物會上網查有關資料，知道湯圓代表團圓。而賀年食品入面，我最鍾意食年糕，煙煙韌韌，又甜甜地，非常特別。

同學仔李信睎：食四大長老整嘅嘢

去親戚朋友屋企拜年，同埋逗利是！最想見爺爺、嫲嫲、公公、婆婆，因為佢哋成日都會整啲好好味嘅嘢畀我食，例如蘿蔔糕、年糕等。仲有油角、瓜子、糖蓮藕、咸水角⋯⋯我最鍾意油角，因為好脆、好香口，但唔可以食太多。利是嘅話，我期待收一啲可以循環再用環保利是封，可以用嚟做勞作或者學校放完年假都會舉辦利是封回收活動，避免造成浪費。

同學仔陳樂娜：用利是錢買香港無嘅零食

逗利是，可以買零食跟家人、表姐、表弟及鄰居分享，婆婆屋企附近有好多香港無嘅懷舊零食，入面有啲果汁，可以倒轉啜出嚟⋯⋯（啜啜冰？）唔係！（到最後記者都唔知係咩）表姐好好人，每次返去都會準備好多小食、雪糕畀我。過年仲有好多嘢食，例如糖不甩、瓜子、年糕、馬蹄糕、蘿蔔糕⋯⋯咁多樣最鍾意年糕，每逢新年，嫲嫲都會親手整好多底年糕，分畀不同嘅親友。

同學仔戴敏樂：一家人團圓

拜年可以收好多利是、好多錢，有100張，有啲係100蚊，有啲係50蚊。我會將利是錢畀媽咪，因為佢生我好辛苦，幫我交學費、書簿費，仲要每日好早起身幫我整早餐同飯盒，花好多時間、心機喺我身上。另外我都好期待同爺爺、嫲嫲、公公、婆婆、舅父一齊食新（團）年飯，因為平時唔係成日見。過年嗰陣最鍾意食湯圓，代表一家人團團圓圓。 

文：林詩敏
圖：PhotoAC、林詩敏 

相關文章︳小朋友最想要的聖誕禮物是…想跟哈利波特一起冒險？去澳洲過夏日聖誕︳親子熱話

相關文章︳母親節︳「媽媽值幾少分？」小孩心聲：媽媽像多啦A夢、有時很惡扣一分！

相關文章︳「爸爸變孫悟空用72變同我玩」 孩子最想爸爸變做邊個「卡通人物」或「超級英雄」？︳小孩心聲