知道長勝有暗火

更新時間：03:00 2023-08-25
發佈時間：03:00 2023-08-25

昨朝千八米草地新季首日開放，立即有不少馬出試，一眾好手亦落力操馬，精彩鏡頭甚多。
「精準快車」董明朗助手跳兩段，走勢硬朗有彈力，細馬身亦夠壯，觀感唔差。
「心想事成」希威森草地跳兩段，快開越走越起勁，精神奕奕極具朝氣，外觀更養得好靚。
「金鑽貴人」潘頓拍「怪獸奇兵」副練草地跳兩段，同樣戴頭罩，前駒更見收斂，唔急唔搶快慢由人，步順力勁；後駒拍住馬王級佳駟竟不落下風，出腳爽勁貫注力強。
安遇健步如飛
「安遇」戴頭罩由梁家俊跳兩段，走來頗神氣，健步如飛火力俱備，毛色亮到發光。
「真感」戴頭罩由助手跳兩段，按住走神態活躍，大嚿飯好輕身，轉倉後持續見好。
「飛漲」希威森拍「龍來了」助手草地跳兩段，前駒暗力拉實，火氣唔錯，目光炯炯有神；後駒戴鼻箍，神色已無之前咁淡，力度亦比前提升，態有起色。
「一絕」戴眼罩由潘頓草地跳兩段，戴上眼罩走來特別起勁，步順動作暢順，火力充裕，甚惹好感。
快狠準雄渾有力
「快狠準」田泰安拍「飛來勁」助手草地跳兩段，前駒步幅開得闊，出腳雄渾有力，神態暢旺朝氣勃勃；後駒戴頭罩，跟得有點辛苦，始終未回復最佳時候。
「知道長勝」潘頓跳兩段，神態軒昂又夠墜手，暗火湧現，馬身亦收得靚。
「滿月」戴頭罩由田泰安跳兩段，雖然豎住尾走，但情緒都算集中，肯聽取鞍上人指示，力度亦不弱。
「勝利才子」戴頭罩由黃智弘草地跳兩段，按住順走從容不逼，展步輕巧彈力夠，大隻仔馬身脹卜卜。
「投資有利」希威森拍「祥勝霸駒」韋達跳兩段，前駒扣住走氣宇軒昂，有肌肉夠粗身，神采奕奕；後駒戴鼻箍，馬頭一貫岳得高，但步穩力足，馬身夠結實，論態非差。