冷門亨利決定敲巫偉傑，今期佢出馬得三匹，勝在隻隻皆精，高難度換高回報不妨小注試試。

亨利拆局│練馬師王吼巫偉傑

更新時間：02:00 2024-09-25
發佈時間：02:00 2024-09-25

上期本欄貼中希斯練馬師王，又係靠符碌撞棍，因為「天時明駒」預期有機卻三甲不入，反而「人和家興」估估下就攞12分，再次證明練馬師王確實好玩，令我享受賽馬樂趣！

回顧季內兩次谷戰都跑八場，原以為練馬師王會低分收場，結果前次34分，上次更開36分，即是起碼要2冠1亞才叫胡，難度非常高！環看今次有資格起孖者不在少數，伍、沈、呂、希、廖、巫各有兩三隻實力馬，形勢拉得平均，看誰手風順一點而已。計出馬數量，伍鵬志佔壓倒優勢，但賠率難免乏味。冷門我決定敲巫偉傑，今期佢出馬得三匹，勝在隻隻皆精，高難度換高回報不妨小注試試。

重心馬方面，根本三隻缺一不可，個人心水則秤先「巴薩諾瓦」，上仗跑道模式不利追都衝上贏馬，巫偉傑妙手回春，呢件綵衣養馬濶綽，佢一定肉緊招呼；「精英至尊」勝在忠心，排三檔有幫助；「爭金奪冠」上仗對手水準高，賽績可信。

目標：巫偉傑

賠率：35

全日惡馬第八場：巴薩諾瓦

練馬師王最佳投注時機：第五場前